Nachribjetnik z drogami je 22lětny na Braunschweigskim dwórnišću zabył – a sej jón pola policije zaso wotewzać chcył. Muž bě wčera rano pola policije zazwonił a so prašał, hač je něchtó wačok wotedał. Zastojnicy tole wobkrućichu a najprjedy raz do nachribjetnika pohladachu. Tam namakachu marihuanu a amphetaminy. Jako 22lětny na stražu přińdźe, njedósta drogi, ale skóržbu ranjenja zakonja wo wopojnych srědkach dla.
Hnydom dwójce w dołhim rynku čakacych před kašćom zemrěteje britiskeje kralowny Elizabeth II. so nastupił je Londonjan Sam Mason. Tole rjekny wón nowinarjam. Prěni króć čakaše wón dwanaće hodźin. Po krótkej přestawce, w kotrejž dowjeze awto do porjedźernje, so Mason rozsudźi so hišće raz nastupić. „To je wulki stawizniski podawk a chcych dźěl toho być“, wón rjekny.
16. septembra před 150 lětami narodźi so w Chelnje wyši wučer a muzejownik Maćicy Serbskeje Michał Wjerab jako syn bura. Wón wopyta w Budyšinje Tachantsku šulu a Katolski wučerski seminar a započa w Zdźěri swoju pedagogisku słužbu. Wot lěta 1892 do 1920 wučerješe na Tachantskej šuli a bě potom dwanaće lět jeje nawoda. 1895 zastupi Wjerab do Maćicy Serbskeje. Wón bě jeje pokładnik a měješe jako zarjadnik tež čestnohamtsce jeje ležownosć ze Serbskim domom na Lawskich hrjebjach na starosći. Zaběraše so z kulturnostawizniskimi temami. Dopisowaše do Katolskeho Posoła za rubriku „Z cyrkwje a swěta“ a do časopisa Łužica. Z jeho pjera su „Serbski dom“, „Čornobóh – prastare mjeno abo snadź wupłód romantiskeje doby?“, „Stawizny serbskeje Łužicy“, „Wućahi z protokolow Maćicy Serbskeje“ a zeserbšćenje ruskeje bajki „Maruška“. Za protyku Krajan bě kalendarij zestajał. Wjerab bě čłon TCM a je 1902 sobu Budysku „Jednotu“ załožił, kotrejež pokładnik bě. Zemrě 2. měrca 1932 w Zhorjelskej chorowni a bu na Budyskim Mikławšku při zapadnej muri blisko rozwalinow Próšneje wěže pochowany.
Manfred Laduš
Zhorjelski wokrjes swoje busowe linije znowa rjaduje. Po wulkich protestach staršich a komunow maja so plany znowa wobhladować a potom hakle ke kóncej lěta přesadźić.
Trjebin (CK/SN). W Miłorazu nima wot januara 2023 bus hižo zastać. Swójby su wotpowědne pismo ze Zhorjelskeho krajnoradneho zarjada dóstali. Z nim chce zarjadnistwo potrjebu zwěsćić, zo móhła za druhim rozrisanjom pytać. To je tež zaměr Trjebinskeho wjesnjanosty Waldemara Locke (CDU). Pozadk je, zo wokrjes taktowy system busow w zjawnym dalokowobchadźe znowa rjaduje a z tym tež zwjazane přestajenje na nowe časy a wodźenje linijow. Změny mějachu hižo z tymle šulskim lětom płaćić. Masiwne protesty staršich a komunow pak su tomu zadźěwali a zawjedźenje noweho jězbneho plana na 1. januar 2023 přesunyli. Nětko bu pola krajneho zarjada za twar dróhow a wobchad dalše słyšenje postajene.
Chrósćicy (JK/SN). Posedźenje Chróšćanskeje gmejnskeje rady minjenu srjedu je zastupowacy wjesnjanosta Jan Wjesela zahajił, dokelž měješe w druhim dypku dnjoweho porjada spřisahać znowa wuzwoleneho wjesnjanostu Marka Klimana (CDU). Tón po złoženju hamtskeho sluba dalši nawod posedźenja přewza.
Dnjowy porjad ničo wusahowaceho njepředwidźeše, ale bě trěbne, zo k dwěmaj dypkomaj předsyda zarjadniskeho zwjazka „Při Klóšterskej wodźe“, Stefan Anders, radźićelam nadrobniše informacije poda. W tutymaj dźěše wo wotličenje kónclětnych wotzamknjenjow gmejny wot lěta 2014 hač do lěta 2024. Tute chce sakske krajne knježerstwo gmejnam wolóžić a je k tomu wosebite rjadowanja wudało, kotrež móhli při wotdźěłanju njelubych, ale trěbnych wotličenjow pomhać. Hač do lěta 2024 maja gmejny zarjadniskeho zwjazka wšitke kónclětne wotzamknjenja hač do 2020 wotličić. Tučasnje je wjetšina komunow pola lěta 2015.
Wojerecy (SN). Na iniciatiwu kliniki za dźěćacu a młodźinsku medicinu při Wojerowskim klinikumje Łužiska jězorina su dźěćacy lěkarjo, dźěćace sotry a baby wuradźowali pod hesłom „Zažna podpěra a prewentiwny škit dźěći wokrjesa Budyšin“. Wobdźělili su so mnozy partnerojo z kliniki a zwonka njeje.
BMW pokradnyli
Šěrachow-Korzym. Běły BMW 535 xdrive su dotal njeznaći zašły kónc tydźenja w času mjez pjatkom připołdnju w 12 hodź. a sobotu wječor w 19 hodź. z ležownosće hotela w Korzymje kradnyli. Jězdźidło z lěta 2013 ma hamtske šwicarske znamjo AG495344 a płaći tuchwilu něhdźe 20 000 eurow. Po informaciji wobsedźerja měješe wón w awće wosobinske dokumenty a dwě kolesy.