Z wudaća: štwórtk, 14 septembera 2023

Za předwidźane inwesticije chcedźa njetrěbne srědki na bance rozmnožić

Rakecy (JK/SN). Dokelž wjacore wjetše inwesticije kaž energetiske saněrowanje Rakečanskeje radnicy a zakładneje šule kaž tež nowu gratownju w Stróži lětsa hižo zwoprawdźić móc njebudźe, změje Rakečanska gmejna tójšto pjenjez wyše, kotrež najprjedy raz trěbne njejsu. Tohodla je so wjesnjanosta Swen Nowotny (CDU) ze swojim financnym wotrjadom na to dojednał, wěsty dźěl tuchwilnych ­likwidnych srědkow dowěrić bance a je tam tróšku rozmnožić.

Wojerecy. Akciski dźeń z darmotnym zastupom přewjedźe njedźelu, 17. septembra, Wojerowski kompjuterowy muzej ZCOM. Pod hesłom „Technika zetka pohibowanje“ čaka na wopytowarjow wot 10 do 17 hodź. mnohostronski program za wšitke starobne skupiny. Při tym ­prezentuje so ZCOM jako muzej k přimnjenju, kotryž so hiba, kwiči a šwórči a kotryž přeprošuje, zhromadne skutkowanje čłowjeka a mašiny spóznawać. Wopytowarjo budu historiske widejohry hrać móc, ale tež laserowe grawury a tekstilne ćišće zhotowić. Wjeršk budźe ­tak mjenowany „Drum Robot MR-808“ ­mjezynarodnje znateho medijoweho wuměłca Moritza Simona Geista. Z inter­aktiwnej instalaciju hodźa so analogne instrumenty napodobnić a z nimi swójska hudźba stworić. W 11.30 a 14.30 hodź. poskićuja wodźenja po stawiznach kompjuteroweho swěta.

Minjenu njedźelu dožiwištej Hodźijska gmejna a tamniša wosada bohaty program. Z wabjenskimi łopjenami a pla­katami „Hodźij swjeći zaso kermušu“ ­wabješe přihotowanski komitej na swjedźensku łuku a do stana při ćěłozwu­čowarni blisko gmejnskeho zarjada.

Kermušu zahajichu z Božej słužbu w cyrkwi. Superintendent Krystof Rummel a lektor Gerat Krawc spominaštaj mjez druhim na tysaclětnu tradiciju ­křesćanstwa w Hodźiju. Wobaj dźiwaštaj na proporcionalnu dwurěčnosć a wěnowaštaj so tež z wosebitej pasažu serbskim kemšerjam w jich maćeršćinje.

Jězbna knihownja je w Budyskim wokrjesu drje hižo wot lěta 1991 po puću. Dokelž pak bě tehdyši bus po lětach dosłužił, financowachu město a wokrjes Budyšin 1998 nowy bus, kiž swjeći jutře, pjatk, swój slěborny jubilej. Tohodla su wšitcy zajimcy ­jutře wot 9 do 15 hodź. na Budyske Žitne wiki na swjedźeń přeprošeni. Tu budu předewšěm mali wopytowarjo nowe medije wuspytać móc, mjez druhim tak mjenowane tonies. W 15 hodź. přizamknje so čitanje při kofeju a tykancu. Foto: Holger Hinz

Jubilejny koncert w Stróži móže bjezwěla móst do přichoda tworić

Klasiski koncert na předwječoru Němsko-serbskich wikow přirody w Stróži měješe minjeny pjatk slěborny jubilej. Čas je so minył, „ideje, lóšt a zaměrnosć“ po słowach Siegharda Kozela, zastupjerja sobuhosćićelskeho Domizniskeho towarstwa Radiška, popušćili njejsu. „Smy ideju a projekt pěstonili kaž małe dźěćo. Koncert je kulturny podawk. Što by było, njebychmy-li tutu ideju měli“, so wón na spočatku lětušeje „Serenady w zelenym“ prašeše. Z wida zarjadnistwa biosferoweho rezerwata Hornjołužiska hola a haty je to „cyle wažne zarjadowanje“, rjekny referatnica Susanne Bährisch.

Je rano, sedźu w awće, čakam… a moje žiwjenje popušćuje něhdźe w blachowej mjerwjeńcy. Dołhe awtokolony bjez kónca. Spočatk požnjenca je so w Čěskej nowe šulske lěto započało, štož rěka, zo je w Praze hnydom po puću tři abo štyri króć wjac wozydłow hač hišće zašły prózdninski tydźeń – dokelž starši swoje dźěći do šule wjezu. Potajkim sedźu, čakam, poskam serbsku hudźbu a sej přemysluju, što by nowa tema za fejeton w Serbskich Nowinach być móhła. A nadobo to wěm: tuta situacija!

Před 1 005 přihladowarjemi je wyši ligist Budissa Budyšin njedźelu popołdnju w druhim krajnym pokalnym kole jeno snadnje z 0:1 přećiwo regionalnemu koparskemu ligistej 1. FC Lokomotiwa Lipsk přěhrał. Rozsudne wrota docpě Djamal Ziane hižo w 17. min. W prěnich dwaceći mjeńšinach njeběchu hosćićeljo hišće prawje w hrě. Hakle potom bě Budissa runohódny přećiwnik. Dobre šansy pak njemóžachu so k wrotam wužić. Foto: Jörg Stephan

Kopańca, wokrjesny pokal

ST Lubuš II – SJ Chrósćicy II 0:4 (0:2)

SV Liegau-Augustusbad –

HZ Frankenthal 3:0 (2:0)

Wjazońca – Hnašecy-Dobruša 2:5 (1:1)

HZ Huska/Hodźij – Połčnica II 3:2 (1:1)

ST Lubuš – ST Ćisk 3:5 (1:2) p.tř.j.

Traktor Malešecy – ST Radwor 4:1 (2:0)

ST 1896 Wulka Dubrawa –

HZ Łaz/Běły Chołmc 2:3 (1:1) pp

TSV Połčnica II –

HZ Wóslink/Skaskow/Kulow II 2:0 (0:0)

ST Módro-běli Njeswačidło –

HZ Rakecy II/Minakał II 3:1 (1:0)

Budyšink/Malešecy II – ST Bart 2:0 (1:0)

Horni kraj-Sprjewja II – Wjelećin 4:8 (0:3)

ZSZ Załom-Wopaka –

SG Steinigtwolmsdorf 3:0 (2:0)

FV Ottendorf-Okrilla II –

Haselbachtal 2:1 (2:0)

ST Demicy-Tumicy –

HZ Ralbicy II/Pančicy II 5:4 (2:0) pp

HZ Wóspork/Bart II –

Wulka Dubrawa II/Radwor II 3:1 (0:1) pp

Wachau II – Halštrow/Hlinowc II 4:0 (2:0)

HZ Wujězd/Łaz/Běły Chołmc –

Wojerowski FC II 1:4 (1:1)

Hnašecy-Dobruša II – Drjewnica 4:0 (3:0)

Jednota Kamjenc –

HZ Bretnig-Hauswalde II 3:2 (2:1)

Mały Wjelkow – Bukecy 0:7 (0:3)

ST Porchow – Großnaundorf 1:2 (0:1) pp

Zeleno-běli Sepicy –

Wóslink/Skaskow/Kulow II 5:7 (0:1) p.tř.j.

Módro-běli Minakał –

HZ ST Horni kraj-Sprjewja II 4:3 (1:1)

Bretnig-Hausw. – Ottend.-Okrilla 5:1 (1:1)

ST Natwar Němske Pazlicy II –

TSV Wachau II 1:4 (0:1) pp

Kinspork/Łužnica – Hlinowc1:2 (0:1)

ST Traktor Malešecy –

ST Radwor 4:1 (2:0)

Zestawa hosći: Pěčak – Seiler (51. Wjacławk), Jendrewski, Glücklich, Paška, Mička, Omran, Hetaš (87. Dej), Nuk, Castejon, Schulze

W Radworju rozsudźichu so za pokalne koło, dokelž maja poprawom wulki kader. Nětko pak so wón přeco dale pomjeńšuje. Tola to njeměła přičina być jenož z poł mocu hrać, a to tež hišće přećiwo klasu niže hrajacemu přećiwnikej.

Hosćo spěšnje pytnychu, zo něšto njeběži. Žana ćělna napjatosć njenasta a tež koncentracija pobrachowaše. Přeco zaso přińdźechu dołhe bule z křidłow a wrota k 1:0 za Malešanow padny poměrnje zahe w 9. min. W 14. min. bě dołhi bul poprawom njeproblematiski, škitar a wrotar pak njeběštaj sej přezjednaj. Přećiwnik bu wot wrotarja hosći foulowany a pokutny kop wot traktorista k 2:0 do wrotow sadźeny. Maličkosće dachu hłowy Radworčanow dale wisać. Zadni hrajerjo hosći mějachu tež po zastatku dwojich wrotow dale dźěło dosć a nadosć. Z wida wokrjesneho wyšeho ligista bě hra katastrofalna. A to bu tež wótře wot trenarja komunikowane.