Z wudaća: pjatk, 15 septembera 2023

Radwor (BB/SN). W Radworskej gmejnje maja wjacore towarstwa a wjesne zjednoćenstwa, kotrychž domicile na gmejnskich płoninach steja. Štó pak je tam poprawom za što zamołwity? Za wěstotu na přikład, za wudawki abo tež za wudźeržowanje objektow? To wšak dyrbjało we wotnajenskim zrěčenju stać. Što pak, hdyž tajke dojednanja mjez towarstwom a gmejnu – jeli scyła – jenož ertnje eksistuja?

Wo tym je gmejnska rada srjedu wječor diskutowała. Radźićel Philipp Wjerš z Čorneho Hodlerja mjenowaše tuchwilnu situaciju „kaž w dźiwim zapadźe“. Tuž je wjesnjanostka Madeleine Rentsch ­přilubiła, naležnosć z towarstwami zrjadować. Cil je, zo maja wšitke samsne ­wuměnjenja a zo gmejna kóžde towarstwo jenak podpěruje.

Lěpše wuměnjenja změje bórze Radworska šulska kuchnja. W tutej drje dawno hižo sami njewarja, ale zwonka Radworja nawarjeny wobjed jenož wudźěluja. Nětko pak dóstanje wona za 19 000 eurow nowe meble. Tutón nadawk su srjedu firmje z Hnašec přepodali.

Wopiteho dwójce lepili

Budyšin. Policajscy zastojnicy su srjedu na Cyhelskim nasypje w Budyšinje wodźerja Fiata kontrolowali. Pola 45lětneho naměrichu 1,94 promilow alkohola w kreji. Policisća přikazachu, zo ma muž krej wotedać, a jemu dalšu jězbu zakazachu. To pak bě jemu po wšěm zdaću smorže. Połdra hodźiny pozdźišo mjenujcy muža znowa kontrolowachu, tónraz na Tuchorskej. Tam měješe wón mjeztym 2,0 promilow intus. Zastojnicy wupisachu wospjet chłostanske přizjewjenje a kluč awta sćazachu.

Hamor (AK/SN). Při Bjerwałdskim jězoru w Hamorskej gmejnje smětej so tež klětu wulkej festiwalej pod hołym njebjom wotměć. To je gmejnska rada na swojim zašłym posedźenju wobzamknyła. HOLI open air budźe 8. junija 2024 na Hamorskim pobrjohu. Je to mjeztym dźesate ­zarjadowanje tajkeho razu. Zarjadowar je předewzaće GBG z Niskeje. Jednaćel Toni Heide liči z něhdźe 5 000 wopytowa­rjemi.

Přewjesć smědźa tež festiwal „Break the Rules“, a to wot 25. hač do 28. julija 2024 na Klětnjanskim pobrjohu. Za to gmejna a Nišćanske předewzaće za gastronomiju a catering HKH zrěčenje wotzamknjetej. Z nim rjaduja wužiwanje jednotliwych ležownosćow. Tu liča z něhdźe 9 000 wopytowarjemi.

Što njewšědne wobsydstwo za gmejnu scyła woznamjenja?

Njeswačidło (UM/SN). Štó drje wo tym njesoni, měć swójski hród? Za Njeswačansku gmejnu je tónle són woprawdźitosć. Wona wobsedźi daloko znaty hród z parkom, kiž wjele wopytowarjow do gmejny sewjernje Budyšina přiwabja. Lětsa swjeći barokna připrawa, do kotrejež słušeja tohorunja wjacore pawiljony, 300. róčnicu. Wo tym swědči mjez druhim z wjele prócu zestajena wustajeńca w domizniskim muzeju. Što pak za mału wjesnu gmejnu kaž Njeswačidło woznamjenja, hród wobsedźeć? „Je to wjeselo a zdobom brěmjo“, wjesnjanosta Gerd Schuster (CDU) wuznawa, jako wón durje hrodu wotamknje. Wopytowar hnydom do dawnych časow zastupi. Na wulkej žurli jako žro hrodu je wjele pychi widźeć. Wot wulkeho swěčnika pućuje wóčko k wjerchej a sćěnam, kotrež su ze stukom a mólbami wudebjene.

W nazymje wobdźiwaja ludźo tu a tam krasne a wulke eksemplary kirbsow. Tak so zahrodkarjo samo wubědźuja, štó ma najćeši kirbs. Tohorunja eksistuja najwšelakoriše družiny, z kotrychž móža kucharjo a kucharki słódne chłóšćenki přihotować. Někotre wozdobne kirbsy pak njehodźa so w kuchni předźěłać a su jenož nazymska dekoracija. Tola turbanowy kirbs na wobrazu k tomu njesłuša, byrnjež za tym ­wupadał. Z njeho móža sej ludźo mjez druhim słódnu poliwku nawarić. Družina ­pochadźa ze Sewjerneje Ameriki a předewšěm optiki dla napadnje. Foto: Handrij Baumgärtel

Brětnja. Wojerowski region dožiwja ­kóžde lěto wulki dworowy swjedźeń. ­Jón přewjeduja wotměnjejo w Čornym Chołmcu, Ćisku a Brětni. Lětsa je poslednje ­mjenowana wjes na rjedźe. W Brětni ­přeprošuje jutře wot 10 hodź. dźewjeć ­ratarskich a dalšich statokow na hudźbu, kulinariske dožiwjenja, staru ratarsku techniku a prezentaciju rjemjeslnikow. W 10 hodź. wotewru swjedźeń před wobydlerskim domom. Tomu přizamknje so wubědźowanje młodźinskich wohnjowych woborow. W 12.30 a 17 hodź. před wobydlerskim domom demonstruja, kak su něhdy žito młóćili. W 14 hodź. započnje so na Tomczykec statoku modowa přehladka. W samsnym času póčnje serbska dźěćaca rejwanska skupina po wsy chodźić a tu a tam zarejuje. Wot 17 hodź. přewjedźe młodźinski klub žortne wubědźowanja. Wot 19 hodź. budu reje na Mjetaškec statoku. Na kóždym dworje wabja z wosebitymi jědźemi a napojemi. Zastup płaći za dorosćenych dwaj euraj. Dźěći hač do 14 lět maja darmotny zastup. Njedźelu w 9.30 hodź. budźe Boža słužba w bróžni na Mjetaškec statoku. Tomu přizamknjetej so tam rańše piwko a wobjed z pólneje kuchnje.