Berlin (dpa/SN). Płunowe płaćizny za wobydlerjow a předewzaća maja so hižo wot januara wobmjezować. Poprawom bě tole hakle wot měrca hač do nalěća 2024 předwidźane. Kaž z předležaceho zakonskeho naćiska wuchadźa, ma so za měsac měrc zwěsćena suma wolóženja za měsacaj januar a februar přewzać.

Planowane je tajke wobmjezowanje tež nastupajo płaćizny za milinu. Zwjazkowe knježerstwo reaguje z tym na sylnje stupace energijowe płaćizny a chce poćeženja za priwatne domjacnosće a předewzaća trochu złahodnić. W prěnjej kročeli běštej zwjazkowy sejm a Zwjaz­kowa rada jónkrótne płaćenje w decembrje wobzamknyłoj. Zwjazkowe knježerstwo je hladajo na wobmjezowanja płaćiznow fachowu komisiju zasadźiło.

Planowane wolóženja za industriju su na wuměnjenja wjazane. Tak njesmědźa so za čas naprawy stabilizacije zasadnje žane diwidendy wupłaćić, rěka w naćisku zakonja.

Na zjězdźe mjez druhim so z temu reichsbyrgarjow rozestajeli

Wojerecy (AK/SN). „Mjenuje so sam kral Němskeje. Peter Fitzek je ludźiłójer. Kreatiwnje wobeńdźe prawo. Ze swojej charismu přićahuje ludźi runja magnetej a zdo­budźe sej tak tež wjele młodych přiwisnikow“, tak rozłožuje sociologa Benjamin Winkler. Wón je fachowc za prawicarski ekstremizm pola cyłozwjazkoweje powšitkownowužitneje Załožby Amadeo Antonio. Na Wojerowskim zjězdźe „Ekstremizm“ nawjedowaše wón dźěłarničku „reichsbyrgarjo a ideologije zapřisahanstwa“.

Peter Fitzek je jedna z najznaćišich wosobow reichsideologiskeho miljeja. K jeho tak mjenowanemu „Kralestwu Němska“ słuša mjeztym tež hižo Bjerwałdski hród. Jemu poddani přiwisnicy jemu tajke inwesticije zmóžnja z tym, zo jemu wulke sumy pjenjez z priwatneho wobsydstwa daruja. Jako sobuzałožićel towarstwa „Nowa Němska“ wuwoła wón „Kralestwo Němsku“ we Wittenbergu a da so tam 2012 ke „kralej krónować“.

Vilnius (dpa/SN). Po tym, zo bě raketa zańdźeny tydźeń w susodnej Pólskej zadyriła, chce Litawska swoje powětrowe zakitowanje zesylnić. Narodna wěstotna rada baltiskeho čłona EU a NATO wčera wobzamkny, zo ma so nabytk wotpowědnych wotwobaranskich raketowych systemow pospěšić. Po słowach poradźowarja statneho prezidenta Gitanasa Nausedy planuje knježerstwo tute hižo klětu kupić a instalować. Dale wón naspomni, zo podšmórnje wrjesk rakety w Pólskej wažnosć kooperacije zwjazkarjow w NATO při wutwarje powětroweho zakitowanskeho systema cyłeho regiona. Tutón dypk dyrbjał při přihotach wjerška NATO klětu we Vilniusu na prěnim městnje stać, tak zo by so rozsud za nakup spěšnje zmóžnił a zo by Litawska dokładnje wědźała, hdy móže ze zwoprawdźenjom ličić.

Litawska mjezuje mjez druhim z ruskej eksklawu Kaliningrad a z ruskim zwjazkarjom Běłoruskej. Wójnu w Ukrainje widźa w małym baltiskim staće jako bjezpo­srědnje wohroženje narodneje wěstoty. Tohodla wužiwaja dźensa hižo powětrowe zakitowanske systemy typa „Nasams“.

Spěwaca knježna Cristina Scuccia je ­w Italskej castingowu show dobyła a nětko swój rjad wopušćiła. „Bě to změna we mni“, 34lětna w talkshowje „Verissima“ priwatneho telewizijneho sćelaka Canale 5 rozjasni. Wona bydli nětko w Španiskej a dźěła tam jako pinčnica, wona sobotu powědaše. Město z ćmowym šlewjerjom sedźeše wona moderatorce z nosowym piercingom a pinknym woblekom napřećo. Scuccia bě w lěće 2014 „The Voice of Italy“ dobyła. Šlewjer po 15 lětach nabožneho žiwjenja wotpołožić, běše jej ćežko.

Sydomlětny hólčec w Saarbrückenje bě so minjeny štwórtk po zwadźe ze swojej maćerju w swojej stwě zamknył a telewizor wótře stajał, policija wčera zdźěli. Wołanje a klepanje maćerje njeje wjace słyšał. Mać njewědźeše sej hižo rady a informowaše z wulkej starosću policiju a wohnjowu woboru. Wobornicy zamóžachu durje skónčnje wočinić a nadeńdźechu hólca, kiž bě sej mjeztym wusnył.