To a tamne (18.02.21)
Wjace hač 3 500 ludźi je so na wčerawšim internetnym posedźenju měšćanskeje rady w britiskim městačku Handforth njedaloko Manchestera wobdźěliło, dokelž chcychu hišće raz tajke chaotiske posedźenje kaž w decembru widźeć. Widejo woneho zeńdźenja ze zdźěla raznymi rozestajenjemi bě w socialnych medijach tójšto kedźbnosće zbudźił. Dokelž chcychu so nowi hosćo wčera tež na debatach měšćanskeje rady wobdźělić, su jim radźićeljo mikrofony wotpinyli.
Z wurěču „nimamy doma žadyn telewizor“ je wobdźělnik ilegalneho swjedźenja w Jendźelskej spytał so chłostanju wuwinyć, jako policija party z něhdźe 40 wosobami rozpušći. Njeje pječa wědźał, zo płaći we Wulkej Britaniskej lockdown z daloko sahacymi wobmjezowanjemi kontaktow a swobodneho pohibowanja. Hosćom hroža nětk bolostne pjenježne pokuty.
Von der Leyen ma plan
Brüssel (dpa/SN). Po raznej kritice pobrachowaceho šćěpiwa přećiwo koronawirusej dla je prezidentka komisija EU Ursula von der Leyen dźensa swoje plany w boju přećiwo wirusej rozłožiła. Tak chce w prěnim rjedźe přećiwo rozšěrjacym so wariantam wirusa postupować. Zaměr je, ručež móžno lěk přećiwo mutacijam wuwić kaž tež produkciju a zasadźenje šćěpiwa po skrótšenym puću dowolić. Za to chce von der Leyen europsku syć za kliniske testowanja załožić.
Japanska šćěpjenje zahajiła
Tokio (dpa/SN). Ani šěsć měsacow do planowaneho zahajenja Olympiskich lětnich hrow w Tokiju su nětko tež w Japanskej započeli, ludźi pře koronawirus šćěpić. Najprjedy maja sobudźěłaćerjo strowotnistwa serum firmy Biontech/Pfizer dóstać. Wot apryla su ludźo, starši hač 65 lět, na rjedźe. Ministerski prezident Yoshihide Suga dyrbi sej krizoweho managementa dla wjele kritiki lubić dać. Mjeztym mnozy dwěluja, hač so olympiske hry w lěću scyła přewjesć hodźa.
ESA pyta astronawtow
Twarc elektroawtow z USA Tesla njesmě lěs za swoju nowu fabriku w ...
Njeliča z dalšimi haćenjemi
Zwjazk korona- testy zapłaći
Berlin (dpa/SN). Financny minister Olaf Scholz (SPD) je přilubił, zo Zwjazk financowanje planowanych darmotnych spěšnotestow na koronawirus w apotekach, testowych centrach a praksach přewozmje. Na zarjadowanju bayerskeje SPD wón rjekny, zo chcył strowotniskeho ministra Jensa Spahna (CDU) w naležnosći podpěrać. „To móžemy sej nětko tež hišće dowolić“, minister Scholz rjekny.
Jens Spahn bě připowědźił, zo měli wšitcy wobydlerjo wot 1. měrca składnosć dóstać, wot kubłaneho personala so na koronawirus testować dać. Planowane su spěšnotesty w testowanskich centrumach, lěkarskich praksach a apotekach. Wuslědk ma w běhu 15 mjeńšin předležeć. Tak mjenowane antigenowe testy pak njejsu tak spušćomne kaž testy PCR. Pozitiwne wuslědki dyrbja na kóždy pad w laborje přepruwować.
Žadaja sej dalše korektury
Berlin (dpa/SN). Hospodarske zwjazki žadaja sej po wčerawšich wuradźowanjach ze zwjazkowym ministrom za hospodarstwo Peterom Altmaierom (CDU) dalše korektury nastupajo pomoc w tuchwilnej koronakrizy. „Srědki drje masiwne straty pomjeńšeja, dołhodobnje pak je to wězo přemało, zo móhli předewzaća w kraju wuchować“, rjekny prezident Zwjazka němskeho turistiskeho hospodarstwa Michael Frenzel po wuradźowanju z Altmaierom. Zastupnicy zwjazka běchu sej přezjedni, zo móhli wobšěrne darmotne testy na koronawirus perspektiwa za bórzomne wotewrjenje być.
Turistiska branša sej žada, mjez rizikowymi kónčinami a regionami ze snadnej ličbu infekcijow jasnje rozeznawać. Pućowacym dyrbjeli wěste koridory wupokazać, po kotrychž móža so hibać. Tež winowatostna karantena za ludźi, kotřiž so z rizikowych kónčin nawróćeja, měli skónčnje wotstronić.
Zwjazk wikowarjow žada sej runostajenje wobchodow a hosćencow při wupłaćenju pomocnych srědkow.
To a tamne (17.02.21)
Bosy je policist w Zhorjelcu kołpjej pomhał, kotryž w lodźe tčeše. Wobydlerjo běchu policiju wołali, dokelž bě ptak w jězoru zamjerznył a njemóžeše sej hižo sam pomhać. Zastojnik, kiž so w swobodnym času sam w zamjerznjenych hatach kupa, wuzu sej črije a nohajcy, dźěše na hat, roztepta lód wokoło strachoćiweho kołpja a jeho wuswobodźi. Spočatnje trochu chabłacy tón skónčnje wotleća.
Woda kofejoweje mašiny je woheń w jednym z hosćencow badensko-württembergskeho Plochingena zhašała. Kaž w policajskej rozprawje steji, je so plastowe sudobjo za wotpadki zapaliło, po tym zo bě něchtó zbytki z popjelnika do njeho ćisnył. Płomjenja zeškrěchu hadźicu, kotraž kofejowu mašinu z wodu zastaruje. Na to so woda wuliny a płomjenja podusy. Škoda wosta z 500 eurami poměrnje snadna.
Přepytuja nadpad na Kapitol
Washington (dpa/SN). Nimale šěsć tydźenjow po namócnym zdobyću Kapitola w stolicy USA Washingtonje je předsydka Domu reprezentantow Nancy Pelosi zasadźenje njewotwisneje přepytowanskeje komisije připowědźiła. Gremij měł pozadki a sćěhi „nutřkokrajneho teroroweho nadpada“ kaž tež zadźerženje wěstotnych mocow přepytować. Pelosi komisiju nětko zasadźi, dokelž bě jednanje k wotsadźenju Donalda Trumpa w Senaće zwrěšćiło.
Generalojo njepowalni
Naypyidaw (dpa/SN). Po wojerskim puču w Maynmaru a z toho nastawacych protestow wostawaja generalojo njepowalni. Po brutalnym zasadźenju přećiwo demonstrantam su minjenu nóc po cyłym kraju internet wotpinyli, kaž aktiwisća rozprawjeja. Wčera běchu dźesaćitysacy ludźi najebać přiběracu wojersku prezencu přećiwo wojerskemu režimej protestowali. Demonstranća sej žadaja, zasadźić wolene knježerstwo ministerskeje prezidentki Aung San Kyi.
Miliony ludźi bjez miliny
Rekordne zmjerzki minjenych nocow su wšelke lodźane skulptury ...
Wo połoženjena mjezy šło
Drježdźany (dpa/SN). Sakske krajne knježerstwo je dźensa wo połoženju na mjezy Čěskeje wuradźowało. Nutřkowny minister Roland Wöller (CDU) informowaše wobdźělnikow wo najnowšim wuwiću. Při tym móžeše na to pokazać, zo je so situacija porno njedźeli a póndźeli změrowała. Přiwótřenych rjadowanjow zapućowanja mutacijow koronawirusa dla bě na němsko-čěskej mjezy, wosebje pak na awtodróze A 17, ke kilometry dołhim haćenjam dóšło. Šoferojo dyrbjachu dlěje hač dwě hodźinje čakać.
Po informacijach zwjazkoweho knježerstwa smědźa wot njedźele jenož hišće ludźo z Čěskeje a Tirola do Němskeje přijěć, kotřiž maja tu bydlenje. Wuwzaća płaća za sobudźěłaćerjow strowotnistwa a šoferow nakładnych awtow. Rjadowanje bě w Čěskej a Awstriskej protesty zbudźiło. Čěscy aktiwisća žadaja sej „wjećbu“ za postupowanje Němskeje.
