Z Bilzom rěčał
Drježdźany (SN/JaW). Połoženje Serbow w ewangelskim wosadnym zwjazku tworješe srjedźišćo wčerawšeje rozmołwy předsydy Domowiny Dawida Statnika z biskopom Ewangelsko-lutherskeje krajneje cyrkwje Sakskeje Tobiasom Bilzom w Drježdźanach.
W dwuhodźinskej rozmołwje rozprawješe předsyda Domowiny biskopej wo stawiznach a aktualnej situaciji serbskeho ludu. Mjez druhim Dawid Statnik wuzběhny, zo je „nimo swójby a kubłanišća cyrkej mnohim Serbam jenički rěčny rum“, rěka nowinskej zdźělence Domowiny. Nastupajo Hodźijsku wosadu poruči Statnik rozmołwu ze Serbskim wosadnym zwjazkom. Rozjimać měli předewšěm prašenje, kak Bože słowo w serbšćinje pod datymi wuměnjenjemi zaručić.
Wšitkich dorosćenych šćěpić
Washington (dpa/SN). Prezident USA Joe Biden chce šćěpjenski porjad w kraju zběhnyć a najpozdźišo wot 1. meje wšitkim dorosćenym w USA zmóžnić so pře koronawirus šćěpić dać. Zaměr je, dźeń njewotwisnosće 4. julija „normaliće zbližić“, kaž z Běłeho domu rěka. Knježerstwo chce zaručić, zo móža woprawdźe kóždeho dorosćeneho šćěpić. Tak chcedźa ličbu apotekow a strowotniskich centerow, w kotrychž šćěpja, jasnje rozšěrić.
Spahn: Serum wot apryla
Berlin (dpa/SN). Po přizwolenju noweho šćěpiwa předewzaća Johnson&Johnson njeliči zwjazkowy minister za strowotnistwo Jens Spahn (CDU) z tym, zo budźe serum hnydom k dispoziciji. Wón wočakuje najzašo srjedź abo kónc apryla prěnje posyłki, kaž sćelakej ARD rjekny. W tym zwisku chcył Spahn wědźeć, čehodla druhe kraje serum hižo dóstawaja a hdy budźe EU na rjedźe. Rozmołwy wo tym wjedźe Europska komisija. Serum pochadźa z USA, hdźež je faktisce zakazane šćěpiwo pře koronu wuwožować.
Šćěpjenje lěkarjam přewostajić
W Heidenauwje pola Drježdźan su wčera rano wohnjowu woboru na ...
Ultimatum nimo
Köpping za nowe kriterije šćěpjenja
Markkleeberg (dpa/SN). Sakska ministerka za strowotnistwo Petra Köpping zasadźa so za změnu kriterijow při wšoněmskim rozdźělowanju seruma přećiwo koronawirusej. We wosebje potrjechenych kónčinach, na přikład podłu saksko-čěskeje mjezy, dyrbjeli hinak postupować, rjekny politikarka SPD wčera w Markkleebergu, hdźež bě wona seniorski centrum wopytała.
Čěska je tuchwilu jedne z infekciskich ćežišćow w Europje. Sakska bě so tuž rozsudźiła, w susodnym Vogtlandskim wokrjesu šćěpjenski porjad zběhnyć a wšitkich wobydlerjow nad 18 lětami šćěpić. „Hdyž pak nam ze stron stata přidatny serum njepřewostaja, to rěka, zo dyrbju šćěpiwo druhim wzać“, rjekny Petra Köpping. Kriterije šćěpjenja měli so tuž po wšej Němskej znowa rjadować.
Ze šćěpjenjom wosebje wohroženych wobydlerskich skupin, na přikład w starownjach a hladarnjach, su mjeztym nimale hotowi, kaž ministerka zdźěli.
Dalše pady afriskeje swinjaceje mrětwy
To a tamne (12.03.21)
Traktor wosrjedź bydlenskeje stwy je muža w badensko-württembergskim Hoßkirchenje wustróžił. Wozydło z připowěšakom, połnym hnójnicy, bě z puća zjěło, sćěnu domskeho přełamało a z motorowej hawbu w stwě stejo wostało. 40lětny wobydler domu měješe wulke zbožo, kaž policija zwěsći. Jemu so ničo njesta. Škoda na twarjenju wučinja 220 000 eurow. Snadnje zranjeneho 29lětneho traktorista dowjezechu do chorownje.
Žałosćenje ćěšenka w kontejneru za staru drastu je w schleswigsko-holsteinskim Ahrensböku zasadźenje policije zawiniło. Wobydlerka bě wołanje słyšała a policiju informowała. Wohnjowi wobornicy kontejner rozrězachu a přepytachu. Při tym so wukopa, zo pochadźeja zwuki wot babyjoweje klanki, w kotrejž tčachu hišće baterije. Něchtó drje bě hrajku do kontejnera ćisnył.
W praksach šćěpja wot meje
Berlin (dpa/SN). Šef předsydstwa Zwjazka kasowych lěkarjow Andreas Gassen, z tym liči, zo móža w lěkarskich praksach najzašo w meji ludźi pře koronu šćěpić započeć a nic, kaž knježerstwo planuje, hižo srjedź apryla. Praksy njezměja w aprylu hišće dosć seruma k dispoziciji, rjekny Gassen dźensa w rańšim magacinje telewizije ZDF. Je-li šćěpjenje zaběžało, móhli w praksach tydźensce „bjez wjetšich napinanjow“ pjeć milionow ludźi přećiwo wirusej škitać.
Demonstrantow zatřělili
Yangon (dpa/SN). Wěstotne mocy su w Myanmaru znowa zaměrnje z wótrej municiju na demonstrantow třěleli a po informacijach swědkow znajmjeńša sydom z nich morili. Spočatnje bě policija sylzopłun a gumijowe kulki zasadźiła, na to pak tež wótrje třělała. Po wojerskim puču spočatk februara w juhowuchodoaziskim kraju wšědnje přećiwo wojerskemu režimej protestuja. Bjezstrašnostna rada UNO namóc raznje zasudźa.
Pomocny paket schwaleny
