Rjana iluzija
Woelki swójske zmylki přiznał
To a tamne (25.03.21)
Nimale 60 km/h spěšnišo hač dowolene je wodźer wosoboweho awta w Berlinje-Wilmersdorfje po puću był, jako jeho błyskač policije lepi. Awto smaleše ze 87 km/h po dróze, na kotrejž je jeno 30 km/h dowolenych. Nětko hroža šoferej 280 eurow pokuty, dwaj dypkaj w Flensburgu a dwaj měsacaj zakaza jězdźenja.
Pod wliwom drogow a bjez jězbneje dowolnosće je muž w Plauenje ze swojim awtom do wjacorych parkowacych jězdźidłow zrazył. Po tym zo bě tež jeho wóz zražkow dla wobškodźeny, jón 36lětny wotstaji a so zminy. Policija pak jeho krótko po tym dosahny. Test na drogi bě pozitiwny. Při přepruwowanju awta namakachu zastojnicy dalše wopojne srědki. Nětko dyrbi so muž wjacorych přeńdźenjow dla zamołwić, mjez druhim jězdźenja bjez jězbneje dowolnosće dla.
Nowemu dojednanju kročel bliže
Drježdźany/Budyšin (SN/JaW). Sakska přihłosuje nowemu, štwórtemu dojednanju wo financowanju Załožby za serbski lud, je sakski kabinet wobzamknył. Wo tym informowaše wčera připołdnju sakska ministerka za kulturu a turizm Barbara Klepsch (CDU) na nowinarskej konferency w sakskej stolicy.
Kaž ministerka rozłoži, běchu so wšitcy třo partnerojo na zakładźe přizjewjenja pjenježneje potrjeby załožby do toho na wobjim financowanja dojednali. „Spěchowanska suma – a měnju, zo je to jara dobre znamjo – bu, přirunujo z třećim dojednanjom, wo cyłkownje 5,3 miliony na 23,92 milionow eurow wob lěto zwyšena. Podźěl Sakskeje při tym na 7,9 milionow eurow (+1,77 mio.) lětnje stupa“, Barbara Klepsch wuwjedźe. Wjetšinu załožboweho etata zawěsća po dojednanju Zwjazk z 11,96 milionami eurow (+2,66 mio.); 3,99 milionow eurow (+0,89 mio.) přida Braniborska. Trěbne srědki su w dwójnym etaće Sakskeje za lětsa a klětu zapisane. Krajny sejm ma tomu hišće přihłosować.
„Jutrowny měr“ zběhnjeny
Berlin (dpa/SN). Po masiwnej kritice najnowšich wobzamknjenjow Zwjazka a krajow přećiwo koronapandemiji dla je zwjazkowa kanclerka Angela Merkel (CDU) dźensa rozsudźiła, rjadowanje k tak mjenowanemu „jutrownemu měrej“ zaso zběhnyć. To je wona dopołdnja ministerskim prezidentam zwjazkowych krajow na krótkodobnje zwołanej widejowej konferency zdźěliła. Popołdnju chcyše kanclerka w zwjazkowym sejmje na prašenja zapósłancow wotmołwjeć. Wočakowachu, zo su tež tam naprawy přećiwo koronje hłowna tema.
W Texasu wšitkich šćěpja
Washington (dpa/SN). W USA smědźa so wot póndźele tež w staće Texas wšitcy wobydlerjo pře koronawirus šćěpić dać, njewotwisnje wot staroby a móžnych schorjenjow. Kóždy móže tam wo termin prosyć. Wobydlerjow, kotřiž su starši hač 80 lět, jako prěnich šćěpja. W Texasu bydli 29 milionow ludźi. Dobre šěsć milionow su tam mjeztym hižo přećiwo wirusej šćěpili. Tež w dalšich zwjazkowych statach móža wotnětka wšitcy wobydlerjo nad 16 lětami injekciju dóstać.
Scholz planuje nowe kredity
Tež w Ruskej ludźo žadosćiwje na kónc zymy čakaja. Wčera su ...
Nowe naprawy wuskutkuja masiwnu kritiku
Drježdźany (dpa/SN). Planowane přiwótřenje naprawow přećiwo koronawirusej k jutram je w Sakskej masiwnu kritiku wuskutkowało. Zwjazk a kraje běchu so póndźelu na to dojednali, lockdown podlěšić a k jutram wosebite rjadowanje wukazać. Přiwšěm zbudźatej planowanej wotpočnej dnjej, zeleny štwórtk a ćicha sobota, wjele prašenjow.
Politikar FDP Torsten Herbst přirunuje planowane naprawy z „deklaraciju kapitulacije“. Němska je nastupajo koronu „zwrěšćeny stat“, kiž njeje kmany bój přećiwo koronawirusej na inteligentne wašnje zmištrować. „Zo nima statne knježerstwo žane zdaće, kak měł jutrowny lockdown za ludźi a předewzaća konkretnje wupadać, je wočiwidne.“
Drježdźanska Industrijna a wikowanska komora kaž tež Zwjazk sakskich rjemjeslnikow reagowaštej zludanej. Alarm mjez wobydlerjemi dale na wysokim niwowje dźeržeć je wopačny puć a chowa we sebi strach „bjezkónčnych restrikcijow za wobydlerjow“, wuzběhny předsyda komory Andreas Sperl. „Mnohe wobmjezowanja su so jako njekmane wopokazali. Je tuž načasu po nowych pućach kročić.“
Kretschmer: Cyrkej puć namaka
Drježdźany (dpa/SN). Sakski ministerski prezident Michael Kretschmer (CDU) je potwjerdźił, zo nochce swobodny stat cyrkwjam k jutram prezencne Bože słužby zakazać. „To njesměła politika přikazać“, rjekny Kretschmer wčera wječor w telewiziji ARD. Wón njedwěluje, zo cyrkej a nabožne zhromadźenstwa „mudry a zamołwity puć“ namakaja.
Po wuradźowanjach běchu Zwjazk a zwjazkowe kraje cyrkwje prosyli, zhromadźowanje k jutram jenož wirtuelnje wotměć. Katolska a ewangelska cyrkej pak zdźělištej, zo nochcetej so bjeze wšeho prezencnych Božich mšow a słužbow wzdać. Němska biskopska konferenca a Ewangelska cyrkej w Němskej běštej „překwapjenej“ próstwy dla.
To a tamne (24.03.21)
Pobrachowaceho podpisma dla dyrbja na Augsburgskim krajnym sudnistwje wobšěrny proces přećiwo wikowarjej drogow znowa přewjesć. To je Zwjazkowe sudnistwo rozsudźiło. Krajne sudnistwo bě wobskorženeho loni w juliju po tydźenje trajacym jednanju k wosom lětam jastwa zasudźiło. Bjezposrědnje po procesu bu hłowna sudnica do Mnichowa přesadźena, a na wućišćanym wusudźe pobrachowaše jeje podpismo. Bjez tajkeho pak wusud njepłaći.
Zwady mjez bratrom a sotru dla dyrbješe mać w Lindauwje nad Bodamskim jězorom policiju wołać. Razne rozestajenje wudyri, po tym zo bě mać internet w bydlenju wotpinyła. 15lětny 18lětnu sotru masiwnje za włosy ćahaše. Policija jeho nachwilnje sobu wza, zo njeby swoju sotru dale nadběhował. Přećiwo njemu nětko ranjenja ćěła dla přepytuja.
W Israelu zaso wolili
Jerusalem (dpa/SN). Hižo štwórty raz w běhu jenož dweju lět su wobydlerjo Israela dźensa nowy parlament wolili. Něhdźe 6,6 milionow wólbokmanych smědźeše swój hłós jednej z něhdźe 40 lisćin dać. Kaž běchu poslednje naprašowanja wujewili, móhła strona Likud ministerskeho prezidenta Benjamina Netanjahuwa najebać straty wólby dobyć. Wosebje organizowaneje šćěpjenskeje kampanje koronawirusa dla Benjamin Netanjahu mjez wolerjemi tuchwilu připóznaće žněje.
Chcedźa wo přičinach rěčeć
Bonn/Hannover. Katolska cyrkej w Němskej chce tež k jutram prezencne Bože mšě zmóžnić. Přeće Zwjazka a krajow so toho wzdać zamołwitych překwapja, zdźěli dźensa předsyda Němskeje biskopskeje konferency Georg Bätzing. Jutry su najwažniši swjedźeń křesćanow. Tež Ewangelska cyrkej w Němskej je připowědźiła, zo chce sej přičiny rozsuda wot zwjazkoweje kanclerki najprjedy raz jasnje rozkłasć dać.
Dźesać ludźi zatřělił
