Altmaier před wuběrkom
Berlin (dpa/SN). Z woprašowanjom zwjazkoweho ministra za hospodarstwo Petera Altmaiera (CDU) nastupajo falšowane bilancy předewzaća Wirecard je přepytowanski wuběrk dźensa rozsudnu fazu dźěła zahajiło. Politikarja běchu sej skazali, dokelž bě jeho ministerstwo za dohladowanje hospodarskich pruwowarjow zamołwite. Wirecard AG bě swoje bilancy falšowała a tak hoberski hospodarski skandal zawiniła. Wuběrk pruwuje nětko zamołwitosć politiki.
Wočakuja wusud w procesu
Minneapolis (dpa/SN). Jedyn z najbóle wobkedźbowanych kriminalnych padow w stawiznach USA leži nětko w rukach přisažnikow: Woni maja rozsudźić, hač je běły něhdyši policist Derek Chauvin wina na smjerći Afroameričana Georgea Floyda. Chauvinej hrozy w padźe zasudźenja wjele lět jastwa. Wočakowanja su hoberske. Afroameričenjo w USA nadźijeja so z wusudom jasneho signala přećiwo rasizmej a policajskej namocy.
Produkcija pola BMW zlemjena
Wulkopósłanc Němskeje w Pólskej Ernst Freytag von Loringhofen je ...
„Šćěpjenski porjad zběhnyć“
Němska wotstopnjowana
Sakscy Zeleni: Atmosfera rozmacha
Drježdźany (dpa/SN). Sakscy Zeleni widźa po nominaciji Annaleny Baerbock za kanclersku kandidatku Zelenych atmosferu rozmacha. „W prašenju kanclerskeho kandidata zaběramy jasnu poziciju a njewotstorkujemy wažne rozsudy“, rjekny krajna předsydka Christin Furtenbacher wčera w Drježdźanach. To so při wólbach zwjazkoweho sejma a hladajo na dowěru ludźi wudani. Z Baerbock a Habeckom maja Zeleni wuběrnu nawjedowacu dwójku. „Jasne je, zo póńdźemy z woběmaj jako team po cyłej Němskej zhromadnje jako Zeleni do wólbneho boja, dokelž mamy historiski zaměr: Chcemy na zwjazkowej runinje zamołwitosć přewzać. Naš zaměr je cyle jasnje kanclerka Annalena Baerbock“, Furtenbacher podšmórny.
Přichodnu sobotu chcedźa sakscy Zeleni w Lipsku personalne wuhibki za wólby zwjazkoweho sejma stajić. Chcedźa krajnu wólbnu lisćinu nastajić. „Jenož derje nastajeni a zhromadnje docpějemy historiski wuspěch na zwjazkowej runinje“, Christin Furtenbacher wuzběhny.
Předsydstwo CDU za Lascheta
Rozestajenje mjez CDU a CSU wo kanclerskim kandidaće drje skónčene
Berlin (dpa/SN). Předsyda CDU Armin Laschet ma so po woli zwjazkoweho předsydstwa strony z kanclerskim kandidatom unije stać. To je wodźacy gremij strony minjenu nóc na wurjadnym digitalnym posedźenju rozsudźił. Po šěsć hodźin trajacym wuradźowanju wupraji so 31 čłonow předsydstwa za Lascheta. Dźewjećo běchu za jeho kontrahenta, předsydu CSU Markusa Södera, šesćo so hłosa wzdachu. Tak je dny trajace zjawne rozestajenje wo načolne zastojnstwo k wólbam zwjazkoweho sejma rozsudźene. Söder bě připowědźił, zo rozsud respektuje. Wčera popołdnju bě Söder prezidij CSU zwołał, zo by sej hišće raz podpěru zawěsćił. Tohorunja wčera bě hessenski ministerski prezident Volker Bouffier (CDU) swoju pomoc poskićił. Wón chcył mjez Laschetom a Söderom posrědkować, kaž rjekny. Rozmołwa w hessenskim krajnym zastupnistwje w Berlinje pak wosta bjez wuspěcha.
Něštožkuli wo Serbach přiwuknyli
Hodźij/Budyšin (SN/at). Wosada Hodźij a ewangelscy Serbja zhladuja w zwisku z rozsudom Drježdźanskeho Ewangelsko-lutherskeho krajneho cyrkwinskeho zarjada, w serbskej tradiciji stejace wosady zapadnje Budyšina do strukturneje jednoty z wulkowosadu Biskopičanskeje wokoliny stłóčić, na njeměrne měsacy. Nětko je bój přetraty, kaž serbski superintendent a Hodźijski farar Krystof Rummel našemu wječornikej rjekny. Po jeho rozmołwje z wyšim cyrkwinskim radu dr. Thilom Danielom su w krajnym cyrkwinskim zarjedźe kónc měrca přidatne wobzamknjenje schwalili, po kotrymž nimaja serbske wosady do němskeje wulkowosady přeńć. Rěčnica sakskeho krajneho cyrkwinskeho zarjada Tabea Köbsch pak nochcyše na naprašowanje Serbskich Nowin wobzamknjenje ani wobkrućić ani dementować. „Ze stron krajneho cyrkwinskeho zarjada njejsu w naležnosći aktualnje žane dalše stejišća planowane“, wona zdźěla.
To a tamne (20.04.21)
W póstniskim kostimje dinosawriera w nocy po puću był je muž w poruhrskim Mühlheimje, byrnjež tam zakazane było w nocy dom wopušćić. Sobudźěłaćerjej města staj jeho narěčałoj, zo je tež w nocy aktiwnym reptilijam zakazane wot 21 do 5 hodź. na dróhach po puću być, rěka w lóštnej zdźělence policije. Zastojnikomaj napřećo pokaza so muž kooperatiwny a so zminy – tež wonaj dyrbještaj so smjeć.
„Strašne zwěrjo“ w kerku je w pólskim Krakowje zasadźenje škitarjow zwěriny zawiniło. Wobydlerka wjaceswójbneho domu bě zadwělowana zwěrinoškitnu organizaciju zawołała: „Přijědźće a wzmiće je preč. Bruna kreatura sedźi hižo dwaj dnjej w kerku před platowym twarjenjom.“ Sobudźěłaćerjo pak wuhladachu tam jeničce croissant, kotryž drje bě něchtó z woknom ćisnył.
Jenakosplažnych nježohnuja
Vatikan (B/SN). Kongregacija za wučbu wěry je wotpohlad, jenakosplažne partnerstwa žohnować chcyć, jasnje wotpokazała. Podpisał bě spis „Responsum ad dubium“ prefekt kongregacije, kardinal Luis Ladaria. Kaž z Vatikana rěkaše, cyrkej homoseksualne partnerstwa nježohnuje, dokelž „njemóže Bóh hrěch žohnować“. Georg Bätzing, předsyda Němskeje biskopskeje konferency, k tomu zwurazni, „zo dyrbi so Synodalny puć wobšěrnje z tymle prašenjom roze-stajeć, tež trěbnosć dalewuwića cyrkwinskeje wučby wěry nastupajo“.
Starosći so wo katolsku cyrkej
Rěča wo nuzowym bordźidle
Berlin (dpa/SN). Wuradźowanja wo cyłoněmskim nuzowym borzdźidle koronawirusa dla přińdu tutón tydźeń do rozsudneje fazy. Frakciji CDU/CSU a SPD stej dźensa dopołdnja změnu zakonja wo škiće před infekcijemi rozjimałoj. Parlament bě minjeny tydźeń prěni króć wo tym wuradźował. Zajutřišim, srjedu, chcedźa wo nim wothłosować. Zaměr je, wobmjezowanja kaž zawrjenje wobchodow a nócny zakaz, dom wopušćić na zakładźe incidency centralnje rjadować.
USA: Połojca ludźi šćěpjenych
Washington (dpa/SN). Štyri měsacy po zahajenju šćěpjenja přećiwo koronawirusej je w USA po informacijach tamnišeho strowotniskeho zarjada CDC wjace hač połojca wšěch dorosćenych, něhdźe 130 milionow ludźi, znajmjeńša prěnju sykawu seruma dóstało. Dospołnje šćěpjeny je po tym mjeztym kóždy třeći wobydler. Dźěłowa skupina Běłeho domu informuje, zo w kraju tuchwilu wšědnje wjace hač wosom milionow ludźi pře koronu šćěpja.
Wo Ukrainje wuradźowali
