Nowe klimowe zaměry
Berlin (dpa/SN). Němski zwjazkowy minister za hospodarstwo Peter Altmaier (CDU) je optimistiski, zo knježerstwo w běhu dnja nowy klimowy zakoń schwali, cyle tak, kaž sej to Zwjazkowe wustawowe sudnistwo žada. Altmaier bě so ze zwjazkowej kanclerku Angelu Merkel (CDU) dojednał, zo Němska produkciju klimje škodźacych maćiznow hač do lěta 2030 wo 65 procentow pomjeńši. Frakciski šef Zelenych Anton Hofreiter sej porno tomu žada, zo Němska mjenowany zaměr na znajmjeńša 70 proc. zwyši.
Spahn: Astrazeneca za wšěch
Berlin (dpa/SN). Zwjazkowy minister za strowotnistwo Jens Spahn (CDU) chcył šćěpjenje přećiwo koronawirusej ze srědkom Astrazeneca za wšěch zmóžnić a šćěpjenski porjad hnydom zběhnyć, kaž wón w telewiziji WDR připowědźi. Potom móhł so kóždy, kiž to chce, w lěkarskej praksy abo šćěpjenskim centrumje šćěpić dać. Na prašenje žurnalistow, hdy ma rjadowanje płaćić, minister rjekny: „Mój namjet rěka hnydom.“
Dialog w rozsudnej fazy
Felix Berger (nalěwo), direktor kliniki za přinarodźene defekty ...
Knježerstwo: Naprawy skutkuja
Berlin (dpa/SN). Po wšej Němskej płaćiwe rjadowanja nastupajo razniše naprawy při wosebje wulkich ličbach infekcijow z wida zwjazkoweho knježerstwa skutkuja. „Wot toho časa, zo smy nuzowe borzdźidło wukazali, widźimy nětko jasny přewrót“, rjekny šef kanclerskeho zarjada Helge Braun na wčerawšim woprašowanju čłonow knježerstwa w zwjazkowym sejmje. Tak pokazuje so po jeho słowach „wokomiknje woprawdźe ekstremne wotputanje w ličbach infekcijow, štož zbudźa nadźiju, zo tež přećeženje strowotnistwa woteběra“.
Wot zwjazkoweho sejma a Zwjazkoweje rady wobzamknjene nuzowe borzdźidło płaći wot 24. apryla, a to je-li na třoch dnjach za sobu sydomdnjowska incidenca hódnotu sto překročiła. Cyłoněmska incidenca je wčera na 132,8 spadnyła, dźeń do toho wučinješe wona hišće 141,4.
Wuradźuja wo wolóženjach
Sudnistwo próstwy wotpokazało
Karlsruhe (dpa/SN). Zwjazkowe wustawowe sudnistwo je wjacore chwatne próstwy přećiwo nócnemu zakazej, dom wopušćić, wotpokazało. „Z tym njeje rozsudźene, hač nócny zakaz Zakładny zakoń rani abo nic“, sudnistwo w Karlsruhe wčera zdźěli. Wo tym ma so we hłownym sudniskim jednanju rozsudźić. Wjacori skóržbnicy běchu sej žadali, zo sudnistwo z hnydomnym wukazom nócne wobmjezowanje swobodneho pohibowanja najprjedy raz zběhnje.
Knježerstwo ma wukaz za srědk, zo by dotal we wječornych hodźinach wotměwace so priwatne zetkanja wobmjezowało. „Zakaz słuži tak zasadnje legitimnemu zaměrej“, we wobzamknjenju rěka. Zdobom sudnicy zwěsćeja, zo fachowcy na tym dwěluja, hač je nócny zakaz kmany tutón zaměr docpěć. Na tamnym boku njemóža sudnicy spóznać, zo je naprawa „wočiwidnje přehnata“.
Po wšej Němskej zawjazowace rjadowanje płaći wot 24. apryla. We wokrjesach z incidencu nad sto njesmědźa ludźo mjez 22 a 5 hodź. dom wopušćić.
Žadaja sej skónčnje směrnicy
Apel turistiskich předewzaćow na zwjazkowe kraje nastupajo wotewrjenja
Berlin (dpa/SN). Nuza mnohich turistiskich předewzaćow z kóždym dnjom napołoženeje přestawki koronakrizy dla přiběra. Po najnowšim naprašowanju mjeztym kóždy štwórty přenajer dowolowych domow w Němskej wo tym rozmysluje, swój dom zawrěć. Dyrbjał-li turizm hakle wot junija zaso móžny być, by to dalšim 36,9 procentam ćežke brěmjo było, kaž z wčera wozjewjeneho naprašowanja Němskeho zwjazka wobsedźerjow dowolowych domow a Němskeho turistiskeho zwjazka wuchadźa. Runočasnje liča pućowanske běrowy a zarjadowarjo druhe lěto za sobu z masiwnymi hospodarskimi stratami.
Klimowa hysterija
Dalša rozmołwa
Budyšin (AD/SN). Zastupjerjo sakskich krajnych kołow, kotrež so w SPD, Lěwicy a Zelenych serbskim temam wěnuja, zetkachu so wčera k dalšej rozmołwje z wyšim měšćanostu Alexanderom Ahrensom (SPD) w Budyskej radnicy. Wospjet wobjednachu skutkownišu komunikaciju mjez zarjadnistwom a dźěłowym kruhom za serbske naležnosće města. Jeho rěčnik Benjamin Wirth poda ćežišća, kotrež měli najwšelakoriši zamołwići Budyšina w přichodnych měsacach rozjimać a rozsudnym gremijam k zwoprawdźenju poručić. Na přikład je w blišim času tajki dialog ze zamołwitej za kulturu kaž tež z wikowarjemi a turistiskimi předewzaćemi města planowany. Wažne je dale prašenje, kak móhli we wšitkich Budyskich kubłanišćach wjace wědy wo Serbach, wo serbsko-němskich poćahach a stawiznach młodym a młódšim wobydlerjam posrědkować.
Rozmołwni partnerojo běchu sej přezjedni, zo dyrbja zamołwići serbske naležnosće wobstajnje na wšěch runinach a při wšěch přiležnosćach w měšćanskim žiwjenju wobjednawać.
Pruwuja dźěło
To a tamne (06.05.21)
Na wšě dźewjeć dźěći porodźiła je žona z afriskeho Malija w marokkoskej klinice. Lěkarjo běchu ze sydom ćěšenkami ličili, su pak pjeć holčkow a štyrjoch hólčkow z maćerneho žiwota wurězali. Maćeri so derje dźe. Dźěći drje dyrbja hišće tři měsacy w chorowni wostać, dokelž njeje dotal jasne, hač wšitke přežiwja. Samodruhu žonu běchu kónc měrca do města Casablanca přiwjezli. Při porodźe bě 35 lěkarjow přitomnych.
Dwě wjewjerčce su wohnjowi wobornicy w Drježdźanach z dźesać metrow hłubokeho šachta wuchowali. Zwěrjatce běštej do šachta padnyłoj a njemóžeštej so samej wuswobodźić, kaž sobudźěłaćer energijoweho zastaraćela zdźěli. Wón bě wjewjerčce wuhladał a wobornikow wo pomoc wołał. Woni su zwěrjatce skónčnje z přikrywami popadnyli a na swobodu pušćili.
