Berlin (dpa/SN). Zwjazkowa wobora je započała wojerski material a wuhotowanje z Afghanistana do Němskeje přepołožić. Kaž zasadźenske komando dźensa zdźěli, chcedźa wjace hač 120 jězdźidłow a šěsć helikopterow wróćo transportować. Za to wužiwaja najwjetše nakładne lětadło Antonow AN-124. Prěnjej transportnej helikopteraj typa NH90 su hižo dźensa do Němskeje pósłali. Wulkolětadło wočakowachu w běhu popołdnja na Lipšćanskim lětanišću.

Tysacy eksklawu docpěli

Madrid (dpa/SN). Wjace hač 6 000 ćěkancow z Marokka je hač do dźensnišeho ranja španisku eksklawu Ceuta docpěło. Něhdźe 1 600 z nich su zaso do susodneho kraja wróćo pósłali, španiske knježerstwo zdźěli. Hišće nihdy njeje telko ludźi do małeje eksklawy z 85 000 wobydlerjemi přišło. Marokko bě kontrolu namjezneho přibrjoha přetorhnyło. Tysacy wu­žiwachu składnosć, hač k namjeznemu płotej doběžeć, a dyrbjachu jenož wokoło murje hač do Ceuta płuwać.

Kerry Maasa a Baerbock zetkał

Berlin (dpa/SN). Zwjazkowe knježerstwo chce za tři tydźenje tuchwilu płaćiwy kruty porjad šćěpjenja přećiwo koronawirusej zběhnyć. Tak mjenowana priorizacija po starobje a rizikowych skupinach wot 7. junija wjace njebudźe. To je zwjazkowy minister za strowotnistwo Jens Spahn (CDU) po wuradźowanju ze strowotniskimi ministrami zwjazkowych krajow připowědźił. Spahn prošeše wo sćerpnosć. Kónc šćěpjenskeho porjada njerěka, zo dóstanje kóždy w běhu něšto dnjow termin šćěpjenja.

Šef zjednoćenstwa kasowych lěkarjow Sakskeje warnuje hladajo na zběhnjenje priorizacije před přewulkimi wočakowanjemi. Tuchwilu nimaja hišće dosć šćěpiwa, zo móhli potrjebje wotpowědować, rjekny Klaus Heckemann powěsćerni dpa. Při tym dźe wosebje wo serum Biontech/Pfizer. Lěkarske praksy dóstanu w meji 1,5 milionow dozow, w juniju liča z 3,5 milionami. Bě derje, hač do junija ze zběhnjenjom šćěpjenskeho porjada čakać. „Hewak budźe přesłapjenosć wulka, hdyž so wočakowanja njespjelnja.“