Wo trajny měr so modlili
Drježdźany (B/SN). Židźa, křesćenjo a muslimojo su so minjeny měsac w Drježdźanach k zhromadnej modlitwje wo měr w Jerusalemje zetkali. Bě to znamjo dorozumjenja a měrliweho zhromadneho žiwjenja. „Stejimy za demokratiske zakładne hódnoty a za lubosć k blišemu“, podšmórny rabiner Akiva Weingarten. Na mjezynabožinskej modlitwje wobdźělichu so dale ewangelskaj superintendentaj Alfred Nollau a Christian Behr kaž tež katolski farar Norbert Büchner, wšitcy z Drježdźan. Přitomny bě tohorunja kantor židowskeje wosady Zhorjelc, Alex Jacobowitz. Muslimsku stronu zastupowaše Saad Elgazar, Drježdźanski imam.
Na rozbuchnjenje dopominali
Přepytowarjej Vatikana w Němskej
Köln (dpa/SN). Japoštołskaj wizitatoraj Andreas Arborelius ze Stockholma a Hans van den Hende z Rotterdama staj dźensa do Kölna dojěłoj, kaž rěčnica biskopstwa powěsćerni dpa wobkrući. Nowinarska konferenca njebě planowana. Biskopaj mataj w nadawku bamža Franciskusa „móžne misnjenja swojeje eminency, kardinala Woelkija“ přepytować a wotpowědnu rozprawu zdźěłać. Planowane su rozmołwy ze zastupjerjemi woporow splažneho znjewužiwanja.
Opozicija ze swójskej rozprawu
Berlin (dpa/SN). Zastupnicy opozicije w přepytowanskim wuběrku nastupajo jebanja w bywšim předewzaću Wirecard chcychu dźensa swoju rozprawu předstajić. Powšitkownje wočakowachu raznu kritiku nastupajo dźěło zwjazkoweho knježerstwa a předewšěm financneho ministra Olafa Scholza (SPD). Mnichowska firma Wirecard bě 2019 přiznała, zo njehodźi so 1,9 miliardow eurow z bilancow hižo namakać. Slědowaše insolwenca. Wuchadźeja z toho, zo bě firma wot lěta 2015 swoje bilancy masiwnje falšowała.
Lěkarjo: Přewjele njewočakować
Po dołhej přestawce koronapandemije dla turizm nad Baltiskim a ...
Wusud je„razna plista“ knježerstwu
Berlin (dpa/SN). Organizacija Němska wobswětowa pomoc ma wusud Europskeho sudnistwa z minjeneho štwórtka přećiwo Němskej přewulkeho zanjerodźenja powětra přez dusykowe dioksidy za hórku poražku zwjazkoweho knježerstwa. Zwjazkowy jednaćel organizacije Jürgen Resch rjekny w Berlinje: „Sudniske zasudźenje zwjazkoweho knježerstwa přez najwyše sudnistwo Europy je razna plista dieselowym lobbyistam na knježerstwowej ławce.“ Wobswětowa pomoc žada sej spěšne konsekwency. K tomu słušatej mjez druhim spěšny přetwar wobchadnych płonin na škitane kolesowarske šćežki a přetwar dźesać milionow dieselowych awtow na kóšty twarcow.
NATO chce zaso dialog z Ruskej
Berlin (dpa/SN). Tydźeń do wjerška NATO w Brüsselu je generalny sekretar sewjeroatlantiskeho pakta Jens Stoltenberg Rusku namołwjał so zetkać. „Chcu Rusku znowa přeprosyć, so bórze na posedźenju rady ,NATO-Ruska‘ wobdźělić“, rjekny Stoltenberg němskim nowinarjam. „Mamy tójšto wobrěčeć, štož je w našim zhromadnym zajimje.“ NATO bě Rusku hižo před lětom na nowe zetkanje přeprosyła, njeje pak na to žanu pozitiwnu wotmołwu dóstała, Stoltenberg wobžaruje. „Nětko dyrbi so Ruska hibać.“
Radu „NATO-Ruska“ běchu lěta 2002 załožili, zo bychu Moskwu wušo do dźěła transatlantiskeho zakitowanskeho zwjazka zapřijeli a dowěru mjez bywšimi přećiwnikami wutworili. Konflikta na wuchodźe Ukrainy dla bě dialog wot 2014 do 2016 přetorhnjeny. Po tym je so rada jenož hišće njeprawidłownje schadźowała. „Poćahi mjez NATO a Ruskej su mjeztym dypk docpěli, kajkiž njejsmy po kóncu zymneje wójny wjace dožiwili. Dialog, hdyž sedźa wšitcy za jednym blidom, wostanje tuž najlěpši puć.“
Wuslědk lěpši hač wočakowane
Wólby krajneho sejma w Saksko-Anhaltskej z jasnym wuspěchom za CDU
Magdeburg (dpa/SN). CDU saksko-anhaltskeho ministerskeho prezidenta Reinera Haseloffa je wčerawše wólby tamnišeho krajneho sejma z wulkim wotstawkom dobyła, a tak dobre tři měsacy do wólbow zwjazkoweho sejma tež kanclerskeho kandidata CDU Armina Lascheta zesylniła. AfD móžeše swoju poziciju jako druha najsylniša najebać mjeńše straty zakitować. Zeleni su so jeno snadnje polěpšili. SPD a Lěwica sunyštej so na nowe rekordne špatne wuslědki. FDP so nětko po dźesać lětach zaso do krajneho sejma nawróći.
To a tamne (07.06.21)
Na nakładnym ćahu k Baltiskemu morju po puću była je 27lětna žona z Čěskeje. Swědcy běchu železnicu wo tym informowali, kotraž na to policiju alarmowaše. Zastojnicy ćah pola braniborskeho Hohenleipischa zadźeržachu a namakachu 27lětnu pod planu. Žona přizna, zo bě w Bad Schandauwje na ćah do Rostocka zalězła. Tam chcyše dźeń při morju wostać a so na samsne wašnje domoj podać. Nětko dyrbi wězo pokutu płaćić. Zwotkel bě wědźała, zo ćah do Rostocka jědźe, a hač tomu scyła tak bě, policija njezhoni.
Nócne wołanje dweju skalneju wiwkow (Steinkauz) je w posaarskim St. Ingberće zasadźenje policije zawiniło. Ludźo sej myslachu, zo reaguje alarmowa připrawa na paduchow, a wołachu policiju. Njebě pak wjace hač wołanje ptakow, štož klinčeše woprawdźe kaž zwuki alarmoweje připrawy, samo zastojnicy wobkrućichu.
Z potencielnej naslědnicu Thomasa Jurka rěčeli
Budyšin (CS/SN). Z hosćom dźěłoweho kruha „Serbja“ sakskeje SPD bě wčera kandidatka za wólby zwjazkoweho sejma Kathrin Michel. Wona steji na wjele lubjacym 2. městnje krajneje lisćiny a móhła hornjołužiskeho zapósłanca Thomasa Jurka naslědować. Z Jurkom su, kaž praji 2. rěčnik kruha Benedikt Dyrlich, přeco spomóžnje hromadźe dźěłali. Nětko dźěše wo to, potencielnu naslědnicu Jurka do serbskeje problematiki zawjesć.
Dokelž je so w delnjołužiskim Baršću (Forst) narodźiła, čuje so jako Łužičanka, Kathrin Michel rjekny. Wona je wjelelětna zawodna radźićelka w předewzaću BASF w Carnym Gozdźe (Schwarzheide), dźěłaše pak tež w dohladowanskej radźe. Maćeri třoch dźowkow, z kotrychž je so jedna na Israelčana wudała, je wažne ludy zwjazujcy po puću być. Jeje temy we wólbnym boju su runostajenje, sobupostajowanje, wjazanje na tarify.
Voigt: Wšě naprawy zběhnyć
Berlin (dpa/SN). Načolny kandidat CDU k wólbam Krajneho sejma Durinskeje Mario Voigt sej žada, při sydomdnjowskej incidency pod 20 natyknjenjow na 100 000 wobydlerjow wšitke wobmjezowanja koronawirusa dla zběhnyć. „Njesměmy ludźom w Němskej lěćo z naprawami skepsać, kotrež su mjeztym njetrjebawše“, wón nowinarjam rjekny. Je trjeba „ludźom skónčnje dowěrić“. Ličba infekcijow w Durinskej dale woteběra, po cyłej Němskej wučinja wona 29,7.
Žane poručenje šćěpjenja
Berlin (dpa/SN). Předsyda stajneje šćěpjenskeje komisije Thomas Mertens do toho njewěri, zo komisija šćěpjenje strowych dźěći přećiwo koronawirusej generelnje poruči. Za to předležace daty dawno hišće njedosahaja, rjekny Mertens dźensa w rańšim magacinje ZDF. Komisija chce přichodne dny nastupajo šćěpjenje dźěći swój posudk předpołožić.
Z akcijemi wikować zakazał
