Za direktny zwisk
Přećiwo prawu na domjace dźěło
Berlin (dpa/SN). Dźěłodawarjo su so w debaće wo móžnosćach domjaceho dźěła po zběhnjenju naprawow koronawirusa dla přećiwo tomu wuprajili, prawo na homeoffice zakonsce zakótwić. Hłowny jednaćel zjednoćenstwa Němskich dźěłodawarskich zwjazkow Steffen Kampeter rjekny powěsćerni dpa: „Mobilne dźěło słuša w zawodach k wšědnej praksy. Přistajeni a dźěłodawarjo rjaduja to w swójskej zamołwitosći. Korona je nam wobšěrne móžnosće, ale tež hranicy pokazała.“ Kampeter měnješe, zo sprostnjene zakonske rjadowanja fleksibiliće a swójskej zamołwitosći njewotpowěduja. Njetrjebamy prawo na mobilne dźěło, ale „moderny zakoń wo dźěłowych časach“, kotryž wotwěra šansy a nowe móžnosće.
Předsyda Němskeho zwjazka dźěłarnistwow (DGB) Reiner Hoffmann bě sej žadał, zo dyrbjało dźěło doma dale srědk škita před infekcijemi wostać. Wuhibki za dołhodobne rozrisanje měli pak hižo nětko stajić, rjekny šef DGB.
To a tamne (18.02.22)
Po nasypje lećacu kruwu dale přez wuchodofrizisku krajinu pokazuje wobrazowa montaža, kotruž je policija wčera wozjewiła. Tónle wobraz dyrbješe ludźi před wohroženjemi orkana warnować, wosebje šoferow awtow, zo měli kedźbliwje jěć. Kaž policajska rěčnica mjeztym wozjewi, njetrjebaja so ludźo lětacych kruwow bojeć. Z montažu chcychu zastojnicy jeno sylnosć wichora na humorne wašnje wuzběhnyć.
Mini-swinko w bydlenju bě wčera tema na Hannoverskim sudnistwje. Přenajerka 35 kwadratnych metrow wulkeho bydlenja je přećiwo wotnajerjej skoržiła, dokelž sej tam hunčko bjez jeje dowolnosće dźeržeše. Hižo trójce je jemu wupowědźiła, 38lětny pak nochcyše dotal wućahnyć. Po krótkim jednanju je wón nětko tola zwólniwy ze swojim Bruceom bydlenje hač do kónca awgusta wopušćić.
Dalša pjenježna pomoc Kijewej
Strasbourg (dpa/SN). Hladajo na napjatosće z Ruskej je Europski parlament Ukrainje dalšu pjenježnu pomoc přewostajił. Zapósłancy w Strasbourgu hłosowachu z wjetšinu za to, bywšej sowjetskej republice 1,2 miliardźe eurow přewostajić. Nuzowy kredit ma wosebje hospodarsku a pjenježnu stabilitu Ukrainy zawěsćić. Pjenjezy chcedźa w běhu lěta w dwěmaj dźělomaj wupłaćić. Wot lěta 2014 je Europska unija Ukrainje hižo 17 miliardow eurow přewostajiła.
NATO sćele wojakow
Brüssel (dpa/SN). Zakitowanscy ministrojo 30 čłonskich statow NATO su hladajo na koncentraciju ruskich wojerskich jednotkow podłu ukrainskeje mjezy tomu přihłosowali, dalše bojowe jednotki do wuchodneje Europy přepołožić. Wojerscy rozkazowarjo jednotliwych krajow maja nadrobnosće zdźěłać a přichodny tydźeń předpołožić. Francoska je w tym zwisku připowědźiła, zo chcyła multinarodny wojerski zwjazk w Rumunskej nawjedować. Hač so Němska na bojowych skupinach wobdźěli, njeje hišće jasne.
Wulkopósłanča nastupiła
Wichorowa nižina „Ylenia“ je minjenu nóc tež Budyski a ...
Njewěritaj do cofanja Rusow
Berlin/Washington (dpa/SN). Strach ruskeho nadpada na Ukrainu je po posudku zwjazkoweho kanclera Olafa Scholza (SPD) a prezidenta USA Joewa Bidena dale wulki. W telefonaće běštaj sej wobaj přezjednaj, zo je połoženje w regionje hladajo na masiwnu koncentraciju ruskich jednotkow jara chutne. Widźomne cofanje ruskich wojakow z kónčiny njemóžetaj wobaj wobkedźbować. Politikarjej witataj porno tomu wuprajenja ruskeho prezidenta Wladimira Putina, zo měli kraje diplomatiske prócowanja dale wjesć. Ruska pak dyrbjała woprawdźite kročele k wotputanju połoženja zahajić.
W Moskwje su mjeztym potwjerdźili, zo so ruske jednotki po planje z manewroweje kónčiny do kasernow nawróćeja. K tomu pokazachu ćah z nakładowanymi tankami na Krimskim mosće.
Ćahi njejězdźili
Planuja wolóženja korony dla
Berlin (dpa/SN). Po měsacy trajacych wobmjezowanjach koronawirusa dla su daloko sahace wolóženja za dobre štyri tydźenje wotwidźomne. Wšelake zawěsćenja pak maja tež w nalěću dale wobstać. Zwjazkowy kancler Olaf Scholz (SPD) je so wčera z ministerskimi prezidentami zwjazkowych krajow na plan k poněčimnemu zběhnjenju hač k doskónčnemu kóncej wšitkich wobmjezowanjow po 20. měrcu dojednał, jeli połoženje w chorownjach to dowola. Tež po tym pak ma „bazowy škit“ z nahubnikami w nutřkownych rumnosćach, busach a železnicach z testami dale móžny być. Za to chcedźa po wšej Němskej płaćiwy prawniski zakład zdźěłać.
Konkretnje maja w prěnjej kročeli wobmjezowanja za šćěpjenych a wustrowjenych wotpadnyć. Za nich maja priwatne zetkanja zaso „bjez wobmjezowanja ličby wobdźělnikow“ móžne być, kaž we wobzamknjenju rěka. W mnohich krajach hižo zběhnjene prawidło 2G we wobchodach ma wotpadnyć. Škitny nahubnik pak je dale trěbny.
Strach, ale žana panika
Denys Trubeckoj rozprawja za Serbske Nowiny z ukrainskeje stolicy
Kijew. Po tym zo běchu tajne słužby USA wčerawši 16. februar jako teoretiski datum móžneje inwazije Ruskeje na Ukrainje wuslědźili, je jón prezident Wolodymyr Zelenskij jako tak mjenowany Dźeń zjednoćenja deklarował. Nimo cyłkownje štyri hodźiny trajaceho telewizijneho marathona z narěčemi politikarjow słušeše tež do programa aktiwitow rano w dźesaćich narodnu hymnu spěwać. Pod bywšim komikarjom Zelenskim, kiž warnowanja Washingtona dale skeptisce wobhladuje, su tajke „show“-zarjadowanja jasnje přiběrali.
To a tamne (17.02.22)
Mały pokazowak časnika na cyrkwinej wěži pokradnyli su njeznaći w porynskim Kranenburgu – a to 50 metrow wysoko. Paduši zalězechu na twarske róšty, kotrež su tam za ponowjenje cyrkwje myslene. Prawdźepodobnje zwrěšćichu při pospyće, tež wulki pokazowak wotšrubować a zawostajichu jón wobškodźeny. Po wšěm zdaću měrjachu so na metal pokazowaka katolskeje cyrkwje swj. Měrćina. Snano chcychu paduši tež jeno suweněr.
Přez sćěnu domskeho jěła je žona ze swojim awtom w sewjerorynsko-westfalskim Hagenje. Prawdźepodobnje bě wona kontrolu nad wodźidłom zhubiła. Jězdźidło přerazy płót zahrody, durje terasy a skónčnje sćěnu domu. Pomocnicy wućahnychu šoferku snadnje zranjenu z awta. Dom, kiž hrozy so sypnyć, dyrbješe Techniski pomocny skutk zawěsćić. Policija je test kreje 58lětneje wukazała.
