Skalne jewišćo w Rathenje zahaji swjatki z galomaj njedźelu a póndźelu hrajnu dobu 2022. Mjez druhim pokazaja w juniju inscenaciju za dźěći „Petterson a Findus“ kaž tež klasikar Johanna Wolfganga von Goetheho „Faust I“. Kooperaciski partner zarjadnišća PostModern je składnostnje wosebitu listowu znamku wudał, kotruž Alexander Hesse tu prezentuje. Foto: Steffen Unger

Wuznamny ekspresiwny tworjacy wuměłc Němskeje ze serbskimi korjenjemi Conrad Felixmüller narodźi so jako syn fabrikskeho kowarja 21. meje 1897 w Drježdźanach. Jeho poprawne mjeno bě Conrad Felix Müller. Wón wukubła so na Drježdźanskej šuli wuměłskich rjemjesłow a po tym studowaše na Akademiji wuměłstwa w sakskej stolicy. Felixmüller bě moler a grafikar a dźěłaše najprjedy za časopis „Sturm“. 1919 zastupi do Komunistiskeje strony Němskeje a załoži sobu lěwicarsku „Gruppe 19“. Dźěłaše potom za časopis „Die ­Aktion“ a jako swobodny ekspresiwny moler a grafikar. Nacije jeho twórby zatamachu. Po wójnje sta so 1948 z prěnim předsydu Koła serbskich tworjacych wuměłcow a profesorom za rysowanje w Halle. Jako předsyda serbskeho koła tworjacych wuměłcow stwori někotre wusahowace twórby ze serbskimi motiwami, najznaćiši je „Husler z Chrósćic“ (Jurij Mencl), „Serbscy ludowi wu­měłcy“ a „Budyšin we wječornym słóncu“. Wšelakich rozestajenjow ze serbskimi kolegami-wuměłcami dla, kotremuž běchu ­Felixmüllera twórby přemoderne a njeserbske, wzda so wón dalšeho čłonstwa. Wón zemrě 24.

Drježdźany (SN/bn). Sakske statne ministerstwo za kulturu a turizm (SMWK) spožči lětuše Myto Zejlerja za serbsku rěč informatikarjej a nawodźe Serbskeje centralneje biblioteki Witej Bejmakej. Zdźěla hornjoserbsce spisane wobkrućenje jury wuzběhuje předewšěm jeho „mnohostronske skutkowanje jako pućrubar wužiwanja serbskeje rěče wosebje w digitalnym swěće“. Medijowa zdźělenka SMWK cituje ministerku Barbaru Klepsch (CDU): „Gratuluju Witej Bejmakej wutrobnje a wjeselu so, zo so jeho wobšěrny angažement oficialnje hódnoći. Spožčenje z 5 000 eurami dotěrowaneho Myta Zejlerja je z wobstatkom 2. plana naprawow knježerstwa Sakskeje za sylnjenje nałožowaneje serbšćiny w swobodnym staće. Skutkowanje Wita Bejmaka pokazuje na přikładne wašnje, kak hodźi so rěč Serbow profesionalnje, kreatiwnje a iniciatiwnje na přichod wusměrić.“

Zły Komorow (AH/SN). Konopej a stare čitanske lampy na jewišću a prózdna, ćěmna wopytowarska žurla tworjachu kulisu za inscenaciju, z kotrejž so přichodny intendant Noweho jewišća Zły Komorow Daniel Ris předwčerawšim prěni raz zjawnje předstaješe. Wón naslěduje wot 1. septembra Manuela Soubeyranda, kiž je zastojnstwo wosom lět wukonjał. Ris, lěta 1965 w porynsko-westfalskim Leverkusenje narodźeny, bě hač do lońšeho dźiwadłowy festiwal „Burgfestspiele Mayen“ w Porynsko-Pfalcowskej nawjedował. Nimo toho bě towarstwo „Art but fair“ załožił, kotremuž dale předsyduje.