Turistiska a marketingowa towaršnosć Sakskeje je tónle tydźeń ...
pjatk, 01. decembera 2017
spisane wot: Serbske Nowiny
Turistiska a marketingowa towaršnosć Sakskeje je tónle tydźeń pućowanski program 2018 poskićerja Thomas Cook za jězby po cyłej Němskej předstajiła. Towaršnosć je składnosć wužiła a zajimcam tež Budyšin a Hornju Łužicu jako atraktiwny pućowanski cil předstajiła. Tak wobhlada sej 15 pućowanskich žurnalistow z Čěskeje Hornju Łužicu a sprjewine město pod aspektom serbskosće. Mjez druhim pobychu na Ralbičanskim kěrchowje a w Budyskim hosćencu „Wjelbik“. Foto: SN/Maćij Bulank
Kak nabožne wuwiće dźěći přewodźeć?
srjeda, 29. nowembera 2017
spisane wot: Marian Wjeńka
Smjerdźaca. Zhromadne zarjadowanje Serbskeho šulskeho towarstwa a Smjerdźečanskeho swójbneho srjedźišća LIPA zaběra so wutoru, 5. decembra, wot 16 do 18.30 hodź. w Smjerdźacej z prašenjom, kak hodźi so nabožne wuwiće dźěći přewodźeć a kak hodźitej so swójba a dźěćo w tymle wažnym prašenju podpěrać. „Dožiwja-li dźěćo přiwzaće a přichilnosć, wuwiwa wone hižo w zažnym dźěćatstwje dowěru do nadźijepołneho žiwjenja“, rěka w přeprošenju. Referentka tohole kubłanskeho popołdnja budźe Werónika Róblowa. Wobdźělenje na wosobu płaći 15 eurow. Zajimcy njech přizjewja so hač do 4. decembra pod telefonowym čisłom 03591/ 550 221 abo pod emailowej adresu .
Jurij Hantuš
pjatk, 24. nowembera 2017
spisane wot: Axel Arlt
Budź swěrny hač do smjerće, a dam ći krónu žiwjenja.
Zjew 2,10
z Radworja
*12. septembra 1925 † 23. nowembra 2017
W lubosći jeho dźakowne dźěći
Marka, Alojs, Ludmila, Alfons a Pětr
a jich swójby
Pusty wječor je njedźelu, 26. nowembra, wot 14.45 do 18 hodź. w Křižnej cyrkwi w Radworju. Pohrjeb a rekwiem budźetej póndźelu, 27. nowembra, w 15 hodź. w Radworju.
Na prawdu Božu je wotešoł naš nan, přichodny nan, dźěd a pradźěd
w Lejnje, Budyšinje, Drježdźanach, Parisu a Radworju
w nazymniku 2017
Muzej poskići adwentny program
štwórtk, 23. nowembera 2017
spisane wot: Serbske Nowiny
Budyšin (SN). W dohodownym času wabi Serbski muzej z wosebitymi poskitkami. Kaž wottam rěka, poskića njedźelu, 3. decembra, w 15 hodź. wodźenje po wustajeńcy „KRABAT – Muž – Mytos – Marka“ z Krabatom (Wolfgang Kraus), Čornym młynkom (Dieter Klimek) a pisarjom (Hans-Jürgen Schröter), kotřiž powědaja stawiznu wo Krabaće. W 16.30 hodź. přizamknje so kinowe popołdnjo z filmom „Čorny młyn“ z lěta 1975. Sobotu, 16. decembra, budźe swójbne popołdnjo. Zhromadnje chcedźa tam paslić. Přinošk za paslenski material wučinja dwaj euraj. Na dźěći čaka tohorunja mała překwapjenka.
Na Sprjewinej dróze blisko Hamorskeje milinarnje su tele dny sceny za ...
pjatk, 17. nowembera 2017
spisane wot: Marian Wjeńka
Na Sprjewinej dróze blisko Hamorskeje milinarnje su tele dny sceny za nowy kinofilm „Gundermann“ wjerćeli. W nim wopisuje so žiwjenje Wojerowskeho bagrownika a spěwytwórca Gerharda Gundermann, kotrehož hraje Alexander Scheer. Mjez druhim je widźeć scena, kak hudźbnik po puću na probu zranjeneho jěža nańdźe a do swojeho awta połoži. Gundermann je 1998 w starobje 43 lět zemrěł. Film budźe klětu w awgusće w kinje widźeć. Foto: Joachim Rjela
Tež přichodnje njetrjebaja wopicy, lawy abo hady kaž tež ...
pjatk, 10. nowembera 2017
spisane wot: Felix Pál
Tež přichodnje njetrjebaja wopicy, lawy abo hady kaž tež wopytowarjo we Wojerowskim zwěrjencu zymu mrěć. Wojerowske zastaranske zawody (VBH) su swoje zrěčenje zastaranja z milinu a tepjenjom podlěšili. Jednaćel VBH Steffen Grigas, wulkonopawa Bert a jednaćel cookultury Arthur Kusber (wotlěwa) so nad podlěšenym partnerstwom wjesela. Foto: Felix Pal
Tilich překwapił
pjatk, 03. nowembera 2017
spisane wot: Měrćin Weclich
Budyšin (SN). Tak kaž mnohich politikarjow po cyłej Sakskej je rozsud ministerskeho prezidenta Sakskeje Stanisława Tilicha (CDU), so wot decembra zastojnstwa wzdać, tež Serbow překwapił. 9. decembra chce wón swoju funkciju złožić. Jako naslědnika poruči Tilich Michaela Kretschmera, kiž je tuchwilu generalny sekretar CDU. Reakcije na Tilichowy překwapjacy rozsud a kotre konsekwency móhła změna na čole Sakskeje ewentualnje tež za Serbow měć, zhonja přihladowarjo jutře, 4. nowembra, w 11.45 hodź. w magacinje Wuhladko, w telewiziji MDR. Dalša tema wusyłanja rěka „Lipjo w nowym swětle“.
29. oktobra so lětni čas skónči a stajimy časnik wot ranja w ...
pjatk, 27. oktobera 2017
spisane wot: Měrćin Weclich
29. oktobra so lětni čas skónči a stajimy časnik wot ranja w třoch na dwěmaj wo hodźinu wróćo. Po woprašowanju forsa je přestajenje za swójby z dźěćimi wužadanje. Foto: SN/Maćij Bulank
Škody tež kónc tydźenja přizjewić
štwórtk, 26. oktobera 2017
spisane wot: Serbske Nowiny
Budyšin (SN). Tež kónc tydźenja a swjate dny chce Budyski krajnoradny zarjad wotnětka zaručić, zo sej sobudźěłaćerjo na městnje škody wobhladaja, hdyž su wjelki wowcy abo druhi skót zakusali. Škody přizjewić móža wobydlerjo wotydźenja w krajnoradnym zarjedźe pod telefonowym čisłom 03591/ 5251 68 001, kónc tydźenja a swjate dny pak we Wojerowskej integrowanej regionalnej dispatcherni pod tel. čo. 03571/ 192 96, kaž krajnoradny zarjad zdźěla.
Mjez wjacorymi prózdninskimi poskitkami Budyskeho Serbskeho muzeja ...
pjatk, 20. oktobera 2017
spisane wot: Dr. Cordula Ratajczakowa
Mjez wjacorymi prózdninskimi poskitkami Budyskeho Serbskeho muzeja bě tež wosebita dźěłarnička „Rjekojo z filca“. Pod nawodom Reginy Herrmannoweje zhotowichu młodźi wobdźělnicy sami pyšne ručne klanki. Regina Herrmannowa je diplomowa designerka, kotraž so wosebje rady figurinam a bajowym postawam wěnuje. Foto: SN/Maćij Bulank
