Archiwar přednošuje

Kamjenc. Kamjenscy měšćanosća zašłosće a přitomnosće su tema přednoška měšćanskeho archiwara w Kamjencu dźensa wječor w 19 hodź. w měšćanskej bibliotece G. E. Lessing. Thomas Binder rysuje žiwjenske puće wosobinow kaž tež jich zasłužby za Lessingowe město. Zdobom wón wuwjedźe, hač a kak su naslědnicy projekty swojich předchadnikow dale wjedli a swójske ideje zwoprawdźili.

Floppy Dolls w hosćencu

Ćisk. W hosćencu „K zelenemu wěncej“ w Ćisku steji njedźelu, 1. nowembra w 17 hodź. sydom cyle wosebitych hudźbnikow na jewišću. Woni su čłonojo band Floppy Dolls. Dźiwadźelnicy prezentuja na cyle swojorazne wašnje serbske a jendźelske hity.

Z nazhonjenjow wuknył

Kamjenc. Ničo njeje trajne. Z tohole nazhonjenja zběra psychologa a swobodny awtor Wolfgang D. Melzer w swojej aktualnej knize „Überfahrt“ teksty, kotrež njetworja nowe wěstosće, ale skerje k znapřećiwjenju namołwjeja. W Naumburgu při Solawje rodźeny a na zapadźe Łužicy bydlacy awtor čita ze swojeje knihi póndźelu, 2. nowembra, we 18 hodź. w Kamjenskej měšćanskej bibliotece.