Washington (dpa/SN). Wiceprezident USA JD Vance je připowědźił, zo USA po wutřělach na dweju narodneju gardistow we Washingtonje swoje prócowanja nastupajo wotsunjenja zesylni. „Najprjedy stajimy třělca před sudnistwo a potom dyrbimy swoje prócowanja podwojić, ludźi, kotřiž su bjez prawa w našim kraju, deportěrować“, piše Vance internetnje. Někotři medijowi zastupjerjo měnja, zo je politika USA přećiwo zapućowarjam přehruba, tak Vance. „Dźensniši wječor pokazuje, čehodla so w tym nastupanju myla.“ Wolerjo wočakuja, zo słowam skutki sćěhuja.

Njedaloko Běłeho domu bě muž wčera popołdnju na narodneju gardistow třělał a jeju smjerćstrašnje zranił.

Rom (dpa/SN). Bamž Leo XIV. je dźensa prěnju jězbu do wukraja nastupił, po tym zo běchu jeho před dobrym poł lětom za nawodu katolskeje cyrkwje wu­zwolili. Wón wopyta najprjedy Turkowsku, njedźelu pojědźe dale do Libanona. Cyłkownje šěsć dnjow přebywa pontifeks w muslimskimaj krajomaj, w kotrymajž su křesćenjo w mjeńšinje.

W Ankarje wočakowaše bamža turkowski prezident Recep Tayyip Erdoğan. Po tym poleći Leo XIV. do Istanbula, hdźež planuje při wopyće Módreje mo­šeje zetkanje z grjeksko-prawosławnym patriarchom Bartholomaisom. W Libanonje chce nawoda katolikow „měrowe poselstwo w Bliskim wuchodźe“ wozjewjeć a so za wujednanje zasadźić.

Lipsk/Drježdźany (dpa/SN). Wobě sakskej lětanišći stej loni najwjetši minus w swojich stawiznach nadźěłałoj. Kaž zhromadna třěšna towaršnosć Lipšćanskeho a Drježdźanskeho lětanišća powěsćerni dpa wobkrući, je předewzaće cyłkowny deficit 53,5 milionow eurow nakopiło.

Dobytki z wobrotow su wo 2,9 procentow na 186,2 milionaj eurow woteběrali. Cyłkowny wuslědk koncerna wučinješe bjez dawkow a danje minus 39,3 milionow eurow. Lońše lěto steješe pod sylnym wliwom „trěbnych wudawkow za ponowjenje“, rjekny nawoda před­sydstwa Götz Ahmelmann nowinarjam při předstajenju bilancy. Minus běchu w tymle wobłuku wočakowali. Wón njeje „wuraz zhubjeneje kontrole“, tak Ahmelmann. Zahajeny puć saněrowanja za­winuje přidatne wudawki za posudki, poradźowanje a prěnje naprawy.

Lětanišći w Lipsku a Drježdźanach słušatej Sakskej a Saksko-Anhaltskej. Loni dyrbještej krajej 145 milionow eurow připłaćić. Saksko-Anhaltska je připowědźiła, zo wot lěta 2027 ničo wjace njepłaći.

Koaliciski wuběrk CDU/CSU a SPD wuradźuje wo wažnych prašenjach

Berlin (dpa/SN). Wodźacy zastupnicy CDU/CSU a SPD pytaja dźensa wječor w koaliciskim wuběrku mjez druhim za rozrisanjom w prašenju renty. Dalše temy su za lěto 2035 planowany kónc bencinowych motorow, tepjenski zakoń a lutowanske naprawy za chorobne kasy. ­Jelizo so wobdźělnicy dojednaja, chcedźa zjawnosć jutře wo tym informować.

Koaliciski wuběrk je centralny planowanski gremij zwjazka CDU, CSU a SPD. Nimo zwjazkoweho kanclera Friedricha Merza (CDU) a wicekanclera Larsa Klingbeila (SPD) přisłuša jemu wosom muži a jedna žona – ministerka za dźěło a předsydka SPD Bärbel Bas.

Najwažniša tema wuradźowanjow je zwada wo rentowy pakćik, přećiwo kotremuž skupina 18 młodych zapósłancow unije rokoći. Woni niwow renty 48 procentow hač do lěta 2031 akceptuja. ­Wočakowanych kóštow sta miliardow eurow dla pak wotpokazuja, zo niwow renty po tym dale stupa. Jeli młoda unija při swojim měnjenju wostanje, je swójska wjetšina koalicije w zwjazkowym ­sejmje při wothłosowanju wo za­konju wohrožena.