Berlin (dpa/SN). Delegacija USA je so po rozmołwach w Berlinje wo móžnym přiměrje mjez Ukrainu a Ruskej pozitiwnje wuprajiła. W rozmołwach su wulke kročele doprědka zmištrowali, rěka w hódnoćenju wuradźowanjow, w kotrychž wurjadny pósłanc USA Steve Witkoff delegaciju USA nawjedowaše.

Witkoff zdobom potwjerdźi, zo z wuradźowanjemi dźensa pokročuja. Wčera běchu 20 dypkow wopřijacy měrowy plan, hospodarske prašenja a dalše temy intensiwnje wobjednali. Zetkanje w Berlinje z ukrainskim prezidentom Wolo­dymyrom Zelenskyjm a delegacijomaj USA a Ukrainy traješe dlěje hač pjeć hodźinow.

Wo kotrych namjetach so při roz­mołwach konkretnje dorozumichu, njeje dotal znate. Dźensa popołdnju wočakowachu zwjazkoweho kanclera Friedricha Merza (CDU) a ukrainskeho prezidenta Zelenskeho k němsko-ukrainskim hospodarskim rozmołwam. Wječor prosy Merz europskich statnych a knježerstwowych šefow do kanclerskeho zarjada.

Krawny nadpad na židowski swjedźeń w Awstralskej

Sydney (dpa/SN). Po zahubnym nadpadźe na židowski swjedźeń w Sydneyju z 15 mortwymi chce awstralske knježerstwo zakonje wo brónjach přiwótřić. Premierminister Anthony Albanese připowědźi, zo měło so mnóstwo brónjow wobmjezować a wobstejace licency za brónje přepruwować. Runočasnje awstralskemu knježerstwu wumjetuja, zo dosć přećiwo antisemitizmej nječini. Wčerawši nadpad je w Awstralskej wulke zludanje zbudźił. To bě najhórši wobrónjeny atentat w kraju po něhdźe 30 lětach.

Policija je wobeju nadpadnikow jako nana a syna identifikowała. 50lětneho nana zastojnicy na městnje atentata zatřělichu. Jeho 24lětneho syna pak zajachu. Wón leži ćežko zranjeny w chorowni. Nan bě čłon hońtwjerskeho towarstwa, čehoždla smědźeše wulke třělby wobsedźeć.

Prěni raz su towarstwa, iniciatiwy, wobydlerjo a gmejna wčera Adwentne kuzło na sydom městnach w Radworju zarja­dowali. Kaž organizatorojo měnja, bě to premjera a předewšěm pospyt. Wopytowarjo pak běchu sej přezjedni, zo njeměł tole jenož pospyt wostać. Hosćo zbliska a zdaloka kaž tež wobydlerjo wsy a gmejny sej najwšelakoriše poskitki lubić dachu. Tak wužiwachu składnosć za dobru rozmołwu při lěhwowym wohenju, woptawachu słódne chłóšćenki abo so prosće adwentneje atmosfery nasrěbachu. Tón abo tamny sej kreatiwny wudźěłk pod hodowny štom kupi. Kóždy z wuhotowarjow měješe při tym swójski koncept. Ludźo přirunowachu zarjadowanje samo z folklornym festiwalom w Chrósćicach, hdźež sej hosćo poskitki wot dwora k dworej pućujo wotkrywaja. Haj, Radwor je pisany. Tam pěstuja towarstwa, iniciatiwy a dalši akterojo wulkotnu zhromadnosć. Dobry wothłós njech je wšitkim z pohonom za pokročowanje. Bianka Šeferowa

W Bórkowach su minjeny kónc tydźenja mjeztym třinaty „Adwent na statokach“ přewjedli. Wopytowarjow dowjezechu z małymi busami na zdźěla chětro wotležane błótowske dwory. Šoferojo mějachu so po wuskich zatykanych dróhach bědźić. Za to bě přebytk na statokach ćim rjeńši. Cyłkownje je so lětsa dźesać swójbow na akciji wobdźěliło. Najwjetši nawal dožiwi statok swójby Liersch. Tam poskićowachu ­rjemjeslniske wudźěłki, čerstwe pječwo a dohodownu hudźbu. Hosćom so na ponowjenym dworje direktnje při Sprjewi přewšo lubješe. Ležownosć wšak je chětro schowana, tak zo ju turisća lědma widźa. Foto: Peter Becker