Wočakuje razne debaty w koaliciji
Berlin (dpa/SN). Nawoda krajneje skupiny CSU w zwjazkowym sejmje Alexander Hoffmann wočakuje tež klětu razne debaty w koaliciji CDU/CSU a SPD. Tole je hladajo na přichodne ćežke nadawki a na snadnu wjetšinu dwanaće hłosow w zwjazkowym sejmje wotwidźeć, rjekny předsyda skupiny zapósłancow bayerskeje CSU w sejmje powěsćerni dpa. Dołhož pak su wuslědki w porjadku, njejsu diskusije na škodu koalicije a tež krajej debaty nješkodźa, je sej wón wěsty.
Hoffmann njemóže so na žanu koaliciju dopominać, w kotrejž njebychu so wadźili. „Rozumju ludźi, kotřiž přeja sej koaliciju, kotraž měrnje a bjez zwady dźěła. Tole pak njeje w koaliciji poprawom scyła předstajomne.“
Prěnje wosom měsacow po spřisahanju čorno-čerwjeneje koalicije běchu so mjez druhim w prašenju noweje sudnicy na wustawowym sudnistwje abo nastupajo rentowu reformu raznje rozestajeli. Někotrych wobkedźbowarjow dopominaše tole na dočasny kónc amploweje koalicije. Klětu planuja socialne reformy, nimo toho wola w pjeć krajach nowy krajny sejm.
To a tamne (29.12.25)
Hobersku hromadu twjerdeho tuka, wolija a druhich wotpadkow su w Londonskej kanalizaciji namakali – zaso raz. Smjerdźata hora waži něhdźe sto tonow a je sto metrow dołha. Zastaraćel města z wodu Thames Water ludźi w tym zwisku napomina, horcy wolij a tučnu kuchinsku papjeru do kanalizacije njemjetać. Jendźelčenjo stajnje zaso horcy wolij po fritěrowanju do nuznika kidnu. W kanalizaciji tuk stwjerdnje a so nahromadźi.
Pozdatny tiger je na awtodróze njedaloko Ludwigshafena zasadźenje policije zawinował. Šoferka wosoboweho awta bě rubježne zwěrjo wuhladała a zastojnikow informowała. Policisća zwěsćichu, zo jedna so wo plyšowe zwěrjo, kotrež bě zhromadnje z dalšimi płatowymi klankami na dróhu padnyło. Prawdźepodobnje njeběchu na awće prawje přiwjazane. Plyšatka su nětko na policajskej straži.
Wobstawa na Grönlandskej
Washington (dpa/SN). Prezident USA Donald Trump je so w zwisku z debatu nastupajo přiswojenje Grönlandskeje na Rusku a Chinu poćahował. Na prašenje žurnalistow za nowym wurjadnym zamołwitym USA za Grönlandsku Trump rjekny: Štóž sej pobrjóh Grönlandskeje wobhlada, widźi wšudźe ruske a chinske łódźe. „Trjebamy Grönlandsku za swoju narodnu wěstotu. Njeńdźe wo wolij a druhe zemske pokłady.“
Lěkarske terminy centralnje?
Berlin (dpa/SN). Štóž trjeba w Němskej termin pola lěkarja, dyrbjał so po woli chorobnych kasow na centralnym portalu sam wo swobodnych terminach informować móc. „Dźensa je normalne, zo zrjaduješ wšo móžne z mobilnym telefonom“, rjekny zastupowaca předsydka Zwjazka chorobnych kasow Stefanie Stoff-Ahnis nowinarjam. Lěkarske praksy měli swobodne terminy přichodnje njewotwisnej platformje přizjewić, ke kotrejž maja zawěsćeni z app přistup.
Wočakuja ruske nadpady
Olympiski woheń je po puću na Olympiske zymske hry 2026 dźensa ...
USA twarja nowe wójnske łódźe
Biskop Bätzing w Swjatym kraju
Jerusalem (dpa/SN). Předsyda Němskeje biskopskeje konferency dr. Georg Bätzing poda so bjezposrědnje po hodźoch na štyri dny trajacy wopyt do Swjateho kraja. Wot 27. hač do 30. decembra 2025 chce so wón tam wo aktualnym połoženju informować a wusku zwjazanosć katolskeje cyrkwje Němskeje wosebje z křesćanskej mjeńšinu potwjerdźić. Planowany je wopyt w Tel Avivje, Jerusalemje a Betlehemje.
Dwaj měsacaj po dojednanju wo přiměrje mjez Israelom a palestinskej organizaciju Hamas je situacija w regionje dale napjata. Teror a wójna stej hłuboke rany w israelskej a palestinskej towaršnosći zawostajiłoj. Masaker 7. oktobra 2023 a dwě lěće trajaca wójna w Gazaskim pasmje stej wuhlady na měrniwu zhromadnosć Palestinjanow a Israelčanow w dalokej měrje zničiłoj. Humanitarna katastrofa w Gazaskim pasmje dale wobsteji a je so přez njedawne zliwki a zapławjenja dale přiwótřiła. Biskop Bätzing chce ze swojim wopytom tež nadźiju posrědkować.
UNO wuradźuje wo napjatosćach
New York (dpa/SN). Wěstotna rada UNO je dźensa na wurjadnym posedźenju wo napjatosćach mjez USA a Venezuelu wuradźowała. Knježerstwo w Caracasu bě sej posedźenje z podpěru Ruskeje a Chiny žadało.
Wot septembra USA stajnje zaso čołmy pozdatnych drogowych kurěrow w mjezynarodnych mórskich kónčinach nadpaduje a zniči. Při tym su dotal wjace hač sto ludźi morili. Minjene dny su USA tež wolijowej tankowcaj z Venezuele sćazali. Washington knježerstwu Venezuele wumjetuje, zo financuje z wikowanjom wolija mjezynarodny terorizm.
Čěska pruwuwje dodawanje granatow
Praha (dpa/SN). Narodna wěstotna rada Čěskeje chce na swojim posedźenju 7. januara wo přichodźe tak mjenowaneje municiskeje iniciatiwy na dobro Ukrainy rozsudźić. Tole je ministerski prezident Andrej Babiš po posedźenju knježerstwa w Praze připowědźił. Zasadnje je tale iniciatiwa dobra wěc, nastanje pak prašenje, hač je wona bjez korupcije a znjewužiwanja zastojnstwa wotběžała, 71lětny rjekny. Nawoda prawicarsko-populistiskeje ANO bě projekt we wólbnym boju wospjet kritizował.
Wón je zakitowanskemu ministerstwu přikazał, podłožki za skónčenje projekta přihotować. We wobłuku iniciatiwy su Ukrainje dotal 1,8 milionow granatow wulkeho kalibra přewostajili. Granaty pochadźeja z wjacorych krajow. K najwjetšim pjenjezydawarjam słušeja Němska, Danska a Nižozemska.
Ukrainski prezident Wolodymyr Zelenskyj je so na swojim wopyće w Praze za iniciatiwu dźakował a ju jako efektiwnu wuzběhnył. W Praze je minjeny tydźeń nowe knježerstwo nastupiło.
„Wostanjemy putnicy nadźije“
Bamž Leo XIV. wěriwych namołwja – biskopja Němskeje z poselstwom
Rom (dpa/SN). Bamž Leo XIV. je na połnje wobsadźenym Pětrowym naměsće w Romje přiběracy wotstawk mjez bohatymi a chudymi na swěće kritizował. „Bohatstwo swěta leži w rukach małeje skupiny ludźi, jara małeje“, rjekny bamž na swojej poslednjej jubilejnej awdiency w swjatym lěće.
Bohatstwo swěta koncentruje so njesprawnje w rukach tych, kotřiž nochcedźa na žałosćenje swěta a chudych słuchać. Bóh pak je pokłady zemje za wšěch postajił, zo móhli je wšitcy wužiwać. Zdobom bamž ludźi namołwješe, nadźiju njespušćić. „Wostanjemy putnicy nadźije“, wón přitomnym wěriwym přiwoła.
Po hodźoch so swjate lěto nachila, swjate wrota so zaso zawru. W swjatym lěće mějachu wěriwi składnosć, wotpusk za swoje hrěchi zdobyć. Jako prěnje zawru prěni swjaty dźeń hód wrota cyrkwje Santa Maria Maggiore.
6. januara 2026 so swjate lěto oficialnje skónči. Hody 2024 bě ze strowotnymi problemami so hižo chětro bědźacy bamž Franciskus w jězdnym stole sedźo swjate lěto zahajił a swjate wrota Pětroweje cyrkwje wotewrěł.
Našim čitarjam
Hodownych swjatych dnjow dla dóstanjeće přichodne wudaće našeho wječornika póndźelu, 29. decembra.
Redakcija Serbskich nowin
