Łódźe USA do Bliskeho wuchoda
Washington (dpa/SN). Po hroženjach přećiwo Iranej zesylnja USA swoje wójsko na Bliskim wuchodźe. Kaž nowina New York Times rozprawja, je lětadłonošak „USS Abraham Lincoln“ z dalšimi wójnskimi łódźemi z južneho chinskeho morja po puću do regiona. Tam maja za dwaj tydźenjej dojěć. Nimo toho USA dalše brónje a techniski material do Bliskeho wuchoda přepołoža. Tež wojerske lětadła maja sćěhować.
Po zahajenju masowych protestow přećiwo awtoritarnemu režimej islamskeje republiki před tydźenjomaj je Trump Iranej wospjet hrozył, zo wojersce zapřimnje. Při zražkach mjez demonstrantami a policiju su po informacijach aktiwistow w Iranje dźesatki ludźi morili.
Awstralska: Prěnje wuspěchi
Prezentacija přestorčena
Berlin (dpa/SN). Za dźensa dopołdnja planowanu prezentaciju noweje premije za elektroawta su krótkodobnje wotprajili. Kaž zwjazkowy minister za wobswět Carsten Schneider (SPD) rjekny, dyrbja w zwjazkowym knježerstwje hišće poslednje nadrobnosće zrjadować. Po słowach Schneidera chcedźa zjawnosć přichodnu póndźelu informować.
Zwjazkowe knježerstwo bě so na nowy spěchowanski program dojednało, z kotrymž chcedźa ludźi pohnuć, sej elektroawto kupić. Wotpowědujo dochodam, wulkosći swójby a dalšim kriterijam chcedźa premije mjez 1 500 a 6 000 eurow wupłaćić. Srědki stata dosahaja za 800 000 awtow. Podpěrować chcedźa wosebje swójby z mało dochodami.
Trumpej Nobelowu medalju dała
Washington (dpa/SN). Nawodnica opozicije we Venezueli Maria Corina Machado je swoju złotu medalju měroweho Nobeloweho myta prezidentej USA Donaldej Trumpej přewostajiła. To je wulkotna gesta mjezsobneho respekta, pisaše Trump po zetkanju we Washingtonje na swojej internetnej platformje Truth Social. Institut Nobeloweho myta je mjeztym wozjewił, zo njeje móžno, Nobelowe myto dale dawać. Machado bě stajnje zaso rjekła, zo ma so Venezuela Trumpej za toho podpěru dźakować, wosebje po zajeću dotalneho mócnarja Nicolása Madura a toho mandźelskeje. Tež Trump je wo tym přeswědčeny, zo je sej wón Nobelowe měrowe myto dawno zasłužił.
Machado wojuje po wotstronjenju Madura wo swoju přichodnu rólu we Venezueli. Trump je wospjet rjekł, zo nima žonu za kmanu, kraj jako prezidentka nawjedować, dokelž wona wotpowědnu podpěru luda nima. USA zepěraja so tuchwilu na zastupjerku Madura, wiceprezidentku Delcy Rodrigez. Ta bě po zajeću Madura zastojnstwo prezidentki přewzała.
To a tamne (16.01.26)
Přećiwo gripje měli so póstnicarjo do wjerška lětušeje sezony šćěpić dać. Tole doporuča Zwjazk apotekarjow Němskeje. Hižo nětko někotre šćěpiwa wjace k dispoziciji njesteja. Wosebje serum za ludźi nad 60 lětami lědma hišće dawa. Někotre lěkarnje šćěpiwo tuchwilu w Italskej kupuja, zo móhli pacientow zastarać. Předewšěm ludźo, kiž hižo wšelke chorosće maja, wšitcy nad 60 a samodruhe měli so šćěpić dać.
Do wjetšeje jastwoweje cele přepołožili su bywšeho brazilskeho prezidenta Jaira Bolsonara. Najwyše sudnistwo kraja je tomu přihłosowało, dokelž je so strowota 70lětneho minjeny čas pohubjeńšiła. Bolsonaro smě nětko wulku celu z kuchnju a balkonom wužiwać, kotraž je poprawom za štyrjoch jatych myslena. Bywši prezident sedźi wot nowembra 2025 planowaneho puča dla w jastwje.
Iran njeplanuje wotprawjenja
Washington (dpa/SN). Hladajo na masowe protesty w kraju Iran žane wotprawjenja njeplanuje. Tole je wonkowny minister Abbas Araghtschi zdźělił. W kraju nimaja wotpohlad, někoho wobwěsnyć, rjekny wón ameriskemu sćelakej Fox News. Prezident USA Donald Trump bě Iranej z raznymi reakcijemi hrozył, jeli kraj planuje, zajatych demonstrantow wotprawić.
Tarifowe jednanja a stawki
Podstupim (dpa/SN). Tarifowe jednanja za přistajenych zjawneje słužby su dźensa w Podstupimje dale wjedli. Sta sobudźěłaćerjow su so z teje přičiny dźensa k warnowanskim stawkam zešli. Hižo minjene dny běchu ludźo po namołwje dźěłarnistwow za swoje žadanja na dróhu šli. Dźěłarnistwo ver.di a zwjazk zastojnikow žadatej sej za 920 000 přistajenych zjawneje słužby sydom procentow wjace mzdy, znajmjeńša pak 300 eurow měsačnje wjace. Zwjazkowe kraje tole jako dospołnje přehnate wotpokazuja.
Reformuja wobydlerski pjenjez
Wobydlerjo města Minneapolis w zwjazkowym staće USA Minnesota ...
Na našćuwanje ludu reagować
Drježdźany (dpa/SN). Sakska justicna ministerka Constanze Geiert kritizuje planowane konsekwency za ludźi, kotřiž su našćuwanja ludu dla zasudźeni. „Dyrbimy přestać, na tajke zasudźujomne njeskutki hnydom z chłostanskim prawom reagować“, rjekny politikarka CDU sćelakej MDR. „Město toho měli so na to koncentrować, zo w našej demokratiji na našćuwanje ludu towaršnostnje reagujemy a nic zakońsce.“
Naćisk zwjazkoweho justicneho ministerstwa předwidźi, zo so ludźom, kotřiž su našćuwanja ludu dla zasudźeni, pasiwne wólbne prawo wozmje. Tak móhli potrjecheni prawo, so do zjawnych zastojnstwow wolić dać, na pjeć lět zhubić. Naćisk pak njeje hišće schwaleny.
Zelenskyjza nuzowy staw
Žane dojednanje wo Grönlandskej
Washington (dpa/SN). Po njewuspěšnej krizowej rozmołwje mjez USA, Danskej a Grönlandskej su Němska a dalše europske kraje wojersku wuskušowansku akciju na arktiskej kupje zahajili. Zwjazkowa wobora je dźensa skupinu wojakow do stolicy Nuuk pósłała. Francoscy wojacy su tohorunja po puću do Grönlandskeje, kotruž chcedźa sej USA přiswojić.
Rozmołwu we Washingtonje wo arktiskej kupje běchu wčera wječor bjez wuslědka skónčili. Danski wonkowny minister Lars Løkke Rasmussen rjekny, zo je zetkanje z wonkownym ministrom USA Marcom Rubiom a wiceprezidentom J.D. Vanceom fundamentalnje rozdźělne měnjenja wujewiło. Prezident USA Donald Trump njebě pódla. Na jeho reakciju nětko wšitcy čakaja.
Trump bě wospjet rjekł, zo trjebaja USA Grönlandsku za swoje narodne wěstotne zajimy, pokazawši na wohrožowanja ze stron Ruskeje a Chiny. Grönlandska ma tójšto wažnych zemskich pokładow. Při tym njebě wón wuzamknył, zo tež wójsko USA zasadźi.
