Damaskus (dpa/SN). Po nowych wojowanjach na sewjeru Syriskeje su so přechodne knježerstwo a wot Kurdow nawjedowane Syriske demokratiske mocy (SDF) na přiměr dojednali. Po informacijach ma přiměr najprjedy raz štyri dny trać. Wojerske jednotki noweho syriskeho knježerstwa su so minjeny čas wo­spjet do kónčin zadobyli, kotrež SDF kontroluja. Při tym je k wojowanjam dóšło. Kurdojo, něhdy najwažniši zwjazkarjo w boju přećiwo teroristiskej milicy IS, so boja, zo dyrbja teritorije, móc a wuwojowane prawa zaso wotedać.

Wčera běchu so Kurdojo jako stražnicy wuwołaneho lěhwa jatych islamistow al-Hol w Syriskej wróćo sćahnyli, po tym zo bě tam k wojowanjam dóšło.

Washington (dpa/SN). Najebać zdźeržliwu reakciju europskich zwjazkarjow je prezident USA Donald Trump dźensa wot njeho iniciěrowanu Měrowu radu załožił. Za to je wón w šwicarskim alpowym městačku Davosu tak mjenowanu Chartu měroweje rady podpisał. W běhu dnja wočakowachu narěč Trumpa k wažnym mjezynarodnym problemam.

Zwjazkowe knježerstwo njeje so dotal jasnje k Měrowej radźe wuprajiło. Prócowanja wo měr a wujednanje w Berlinje zasadnje witaja, rěčnik knježerstwa zdźěli. Za to pak bě swětowe zjednoćenstwo po zahubnej Druhej swětowej wójnje UNO załožiło, dale rěkaše.

Tež Francoska hišće jasnje reagowała njeje. Trump bě nimo zwjazkoweho kanclera Friedricha Merza (CDU) mjez druhim prezidentku komisije EU Ursulu von der Leyen, ruskeho prezidenta Wladimira Putina, turkowskeho prezidenta Recepa Tayyipa Erdoğana a pólskeho prezidenta Karola Nawrockeho přeprosył. Čłonstwo w Měrowej radźe Trumpa płaći miliardow dolarow.

Mamy so ćežko, za „Nachhaltigkeit“ wšo wopřijace słowo wužiwać. Hač wudźeržliwosć abo naslědnosć – w tutym modiskim němskim zapřijeću tči wjele bytostnych aspektow. Dokelž je němčina tradicionalnje rěč mocy, dźe knježacym wšelakich runin wo to, rjane młowojte słowa kreěrować, kotrež zaćišć posrědkuja, zo su na prawym puću. Najnowši spektakularny přikład je „Sondervermögen“, štož njeje zamóženstwo, ale gigantiski dołh na kóšty přichodnych generacijow. W serbšćinje, rěči ducha a duše, njemóžemy tak manipulatiwnje formulować, naše měritko je konkretne žiwjenje: Štó je što z kotrym praktiskim efektom za druhich činił? A po našich měritkach ma strategija wo­krjesa Sprjewja-Nysa dosć potenciala, spomóžne skutki inspirować. Zo zarjadnisce zamołwity z nazhonjenjow Afriki čerpa, hdźež ludźo tak běrokratisce kaž němscy planowarjo njemysla, je dobre wuchadźišćo. W tutym zmysle: Wjele wuspěcha po puću do přichoda! Marcel Brauman

Globus za 600 eurow je sej čěski ministerski prezident Andrej Babiš kupił – zo by dokładnje wědźał, hdźe Grönlandska leži. „Jemu pobrachuja zakładne šulske znajomosće“, jeho ludźo w interneće wusměšuja. Babiš argumentuje, zo wšak skutkuje arktiska kupa na kartach wjetša hač wona je. Hakle na globusu widźiš woprawdźity poměr mjez Grönlandskej a USA abo Europu.

Termometer do horceje pjecy tyknył je sydomlětny hólc w bayerskim Schwandorfje, zo by mać wo swojej zymicy přeswědčił. Prjedy hač móžeše „argument“ wućahnyć, termometer w 200 stopnjow horcych kachlach rozbuchny. Nimo wo­hnjoweje wobory tež policija přijědźe. Při detonaciji njeje so nichtó zranił. Jědojteho žiweho slěbra dla pak so kachle hižo dlěje za přihotowanje jědźow njehodźa. Swójba dyrbi sej nowe kupić.