Na šulach stawkowali
Berlin (dpa/SN). We wjacorych městach wuchodneje Němskeje su dźensa na šulach warnowanske stawki přewjedli. Tole je rěčnik dźěłarnistwa za kubłanje GEW zdźělił. Rozměr akcijow njebě dopołdnja hišće znaty. Runočasnje su po wšej Němskej přistajeni kubłanskeho systema na dróhu šli. Wjetše zarjadowanja wotměchu so w Berlinje, Hamburgu, Kölnje, Lipsku a Mannheimje. W Berlinje chcychu so tež přistajeni z Braniborskeje a Mecklenburgsko-Předpomorskeje wobdźělić.
Dźěłarnistwo sej žada, tarifowe dojednanja powšitkownje we wšitkich zwjazkowych krajach nałožować. Runočasnje dźěłodawarjam wumjetuja, zo njejsu dotal žadyn poskitk předpołožili. Dalše warnowanske stawki do hłowneho wuradźowanja 11. februara su tuž móžne.
Voigt zhubi doktorski titul – a skorži
Erfurt/Kamjenica (dpa/SN). Techniska uniwersita w Kamjenicy je rozsudźiła, zo njesmě durinski ministerski prezident Mario Voigt (CDU) hižo dlěje doktorski titul wužiwać. Voigt je mjeztym připowědźił, zo chce na zarjadniskim sudnistwje přećiwo rozsudej filozofiskeje fakulty skoržić. Wot fakulty kritizowane městna jeho doktorskeho dźěła wučinjeja runje 2,58 procentow cyłeho dokumenta, Voigt rjekny. „Wědomostne žro mojeho dźěła njeje wot wumjetowanjow potrjechene.“
TU w Kamjenicy njeje so dotal k tomu wuprajiła. Voigt bě tam lěta 2008 promowował. Swoje dźěło „Ameriski prezidentski wólbny bój. George W. Bush přećiwo John F. Kerryjej“ bě wón zwjetša w USA napisał. Wumjetowanja, zo njeje Voigt w swojim doktorskim dźěle swědomiće dosć dźěłał, běchu so hižo we wólbnym boju do wólbow krajneho sejma 2024 jewili.
Voigt je sej wěsty, zo su wumjetowanja njewoprawnjene. Wot uniwersity zasadźena komisija je pječa wobkrućiła, zo je doktorske dźěło w porjadku. Rozsud uniwersity Voigt tuž njerozumi.
Merz za lěpši škit infrastruktury
Kancler knježerstwowu deklaraciju w zwjazkowym sejmje předstajił
Berlin (dpa/SN). Zwjazkowe knježerstwo CDU/CSU a SPD chce kritisku infrastrukturu w Němskej w přichodźe lěpje škitać. Tole je zwjazkowy kancler Friedrich Merz (CDU) dźensa w swojej knježerstwowej deklaraciji w zwjazkowym sejmje připowědźił. Nadpad na milinowu syć w Berlinje spočatk lěta je pokazał, kak łoskoćiwa tuta naležnosć je, Merz rjekny. Wčera bě koaliciski wuběrk wo tym wuradźował a to samsne zwěsćił. Merz w tym zwisku rjekny, zo njesměli informacije wo kritiskej infrastrukturje hižo tak lochce zjawnje přistupne być. „Dźe wo geologiske daty a dalše, za wěstotu wažne informacije. Dyrbimy transparencu w tutej naležnosći wotstronić a reziliencu natwarić.“ Zwjazk a zwjazkowe kraje měli pruwować, kotre informacije wo wažnych objektach zjawnje spřistupnja a kotre nic. Nimo toho měli škody spěšnišo porjedźeć. Zwjazkowe knježerstwo je mjeztym naćisk zakonja „Kritis“ předpołožiło, kotryž ma zwjazkowy sejm nětko wobzamknyć.
Přewjele zarjadnistwa
Město we wječornym swětle powabne
„Awto jako bróń“w srjedźišću konferency
To a tamne (29.01.26)
Skućićelow, kotřiž běchu w Gelsenkirchenje před štyrjomi tydźenjemi wotnožku lutowarnje wurubili a při tym wjacore miliony eurow spakosćili, policija dale pyta. Paduši běchu z hoberskim točenskim nastrojom betonowu murju přerazyli a 3 100 kašćikow z hódnotnym wobsydstwom kupcow wurumowali. Na hodźiny trajacej harje točenja dla njeje so nichtó postorkował. Wěstotne systemy banki njeběchu kónc tydźenja pječa aktiwizowane.
Bruce Springsteen, legenda rockoweje hudźby, je wobydlerjam ameriskeho města Minneapolis protestny spěw wěnował, w kotrymž wón rabiatne akcije zarjada za zapućowanje ICE po přikazu prezidenta USA Donalda Trumpa šwika. W spěwje „Streets of Minneapolis“ kritizuje Springsteen priwatnu armeju krala Trumpa, kiž prawa ludźi tepta.
Poručeja rěčny pas za młodostnych
Rada za serbske naležnosće Braniborskeje w krajnym sejmje je so wčera na posedźenje w Podstupimje zešła. Tam diskutowachu wo wšelkich idejach za projekty. Tež Hornja Łužica bě tema.
Podstupim (SN/jp). Připowědźene zwyšenje srědkow Załožbje za serbski lud (hlej přinošk na tutej stronje) tyje spěchowanju kultury a rěče Serbow, štož je tež wažny nadawk braniborskeje serbskeje rady. Na wčerawšim posedźenju rady za serbske naležnosće witaše předsyda gremija Marcus Końcaŕ prof. Ulrike Liedtke, prezidentku Braniborskeho krajneho sejma.
Po tym předstaji Pětr Brězan, referent Domowiny za hospodarske a infrastrukturne naležnosće, dźěławosć Serbskeho kulturneho turizma kaž tež kooperaciju serbskeje narodneje organizacije z turistiskimi zwjazkami Delnjeje Łužicy. Hižo dwě do tři lět planuje dźěłowa skupina nowy projekt: Chcedźa kolesowarsku šćežku wuwić, kotraž cyłu Łužicu zwjazuje. Šćežka ma 480 kilometrow dołha być a wosom dnjowych etapow wopřijeć. Brězan trochuje wudawki za projekt na něhdźe 500 000 eurow – čim dlěje so zwoprawdźenje dliji, ćim dróše budźe.
Braniborska srědki zwyši
Koalicija chce jasnosć
Berlin (dpa/SN). Wodźacy zastupnicy CDU/CSU a SPD zeńdu so dźensa wječor na prěnje posedźenje koaliciskeho wuběrka w tutym lěće. Při tym chcedźa wo aktualnym mjezynarodnym połoženju a wo hospodarskej situaciji w Němskeje wuradźować. Konkretne temy maja reforma socialneho stata, wobmjezowanje zadołženja a škit kritiskeje infrastruktury być. Wuslědki njewočakuja. Nawoda frakcije CDU/CSU Jens Spahn rjekny, zo chcedźa sej wobdźělnicy „karty połožić“.
Zastojnikaj na muža třělałoj
Washington (dpa/SN). Po prěnim oficialnym wuhódnoćenju wěstotnych mocow nastupajo smjertne wutřěle na staćana USA Alexa Prettija w Minneapolisu je wěste, zo staj dwaj zastojnikaj na muža třělałoj. Tole rozprawja nowina New York Times. W rozprawje njeje hižo žana rěč wo tym, zo je Pretti pistolu w ruce měł a zastojnikow z njej wohrožował. W prěnjeje reakciji bě knježerstwo USA runje tole twjerdźiło. Smjerć muža je nowe protesty po wšej USA zbudźiła.
Zelenskyj a Putin so zetkataj?
