Personal přirodnje redukuja
To a tamne (20.02.26)
Nihdźe po cyłym swěće telko swjatych pochowanych njeje kaž w Assisiju w Italskej. Dohromady je jich pjeć: Franc z Assisija, Hańža, Klara, Rufinus a Carlo Acutis. Nětko chcedźa powostanki swjateho Franca w bazilice San Francesco wustajeć, a to po 800 lětach w rowje. Jenož něšto stow metrow dale česća w putniskej cyrkwi Santa Maria Maggiore swjateho Carla Acutisa, kotrehož bě bamž Leo XIV. loni swjateho prajił.
Slědźerjo carabidologije, potajkim nałožowaneho slědźenja wo běhacych brukach, so kónc tydźenja w Drježdźanach zetkaja. Towaršnosć slědźerjow chce při tym skutkownje na to pokazać, kajke wosebite, mnohostronske a ekologisce wažne bruki su. Na zeńdźenju w sakskej stolicy chcedźa zakładne slědźerske prašenja rozjimać. Za to planuja přednoški a prezentacije před fachowym publikumom.
„Bajkojte“ poskitki w jězorinje
Turistiski zwjazk Łužiska jězorina chce sezonu, kotraž je dotal wot apryla do oktobra trała, wot lětušeho podlěšić. Za to je nowe turistiske poskitki na temu „Bajki, powěsće a stawiznički“ wuwił.
Zły Komorow (AK/SN). W lěće 2012 załoženy turistiski zwjazk, kotryž skutkuje w kónčinach Braniborskeje kaž tež Sakskeje, zahaji swoju sezonu lětsa hižo w februarje. Tole podšmórny nawoda wotrjada za marketing Marcus Heberle na lětnym nowinarskim terminje.
„Po puću z rybarjom (bjez jeho žony)“ rěka nowy turistiski poskitk, kiž wopřija kołojězbu na Złokomorowskim jězorje a wopyt hatarskeho zawoda swójby Eulo w Baršću (Forst/Lausitz). W Hórnikečanskej Energijowej fabrice móža turisća lětsa pod hesłom „Na slědach plona“ za pokładom pytać. Na Horach chce zwjazk z wuměłskej rjemjeslnicu Birgit Patokowej w tamnišim kładźitym domje zhromadne zarjadowanja wo temje „Lutki – přećelne palčiki Łužicy“ wuhotować.
Prezidenta zasudźili
Seoul (dpa/SN). Dokelž je tehdyši južnokorejski prezident Yoon Suk Yeol w decembrje 2024 wojerske prawo wuwołał, su jeho dźensa k jastwu na čas žiwjenja zasudźili. Sudnistwo města Seoul jemu wumjetuje, zo je zběžk nawjedował a wustawu kraja podrywał. Statne rěčnistwo bě sej žadało, jeho k smjerći zasudźić. Prezident móže sej nětko hišće rewiziju wusuda žadać. Proces je prěni tajkeho rozměra w Južnej Koreji a je precedenca za dalše tajke jednanja.
Rada so prěni raz schadźuje
Washington (dpa/SN). Kontrowersnje diskutowana měrowa rada US-prezidenta Donalda Trumpa so dźensa prěni raz schadźuje. Jedna z hłownych temow prěnjeho posedźenja budźe prawdźepodobnje dalše wuwiće w Gazaskim pasmje. Trump bě do zeńdźenja připowědźił, zo chce paket wjacorych miliardow dolarow za humanitarnu pomoc schwalić. Měrowa rada ma nimo toho wojersku skupinu za rjadowanje měra w pasmje wutworić.
Eks-princa Andrewa zajeli
CEO koncerna Meta Mark Zuckerberg (srjedźa) měješe wčera před ...
E-awta prědku
Předaću zadźěwać
Krah njeje na wikach witany
Kancler hišće hotowy njeje
Popjelnu srjedu znowa składnosć za politisku wadźeńcu była
Trier/Apolda/Passau/Vilshofen (dpa/SN). Zwjazkowy kancler Friedrich Merz (CDU) so wo druhu legislaturnu periodu po planowanych wólbach zwjazkoweho sejma w lěće 2029 prócuje. „Planuju, tole trochu dlěje činić“, rjekny 70lětny na politiskej popjelnej srjedźe w Trieru a skedźbni na to, zo bě jeho nan w januaru starobu 102 lět docpěł. Na samsnym městnje sej Merz změnu mentality za wjace wukonliwosće žadaše, zo by so naš kraj dale wuwiwał. „Lifestyle a štyridnjowski dźěłowy tydźeń – to je wšo rjenje, to móža wšitcy rady činić“, rjekny wón na zarjadowanju. „Ale jeli chcemy sej swoje derjeměće zdźeržeć, dyrbimy so nětko wšitcy zhromadnje gratu přimać a so wo to prócować, zo w tutym kraju zaso woprawdźe dobre wukony nadźěłamy.“ Tež na zjědźe CDU pjatk w Stuttgarće chcedźa so z tutej tematiku zaběrać.
