Teheran/Washington (dpa/SN). Iranske wójsko je nimale tydźeń po zahajenju wójny připowědźiło, zo swoje napřećiwne nadpady rozšěri. Přichodne dny chcedźa njepřećela intensiwnišo a wobšěrnišo nadběhować, twjerdźi statny rozhłós, powołujo so na informacije centralneho staba wójska. Wčera su z trutami israelske wojerske zepěranišćo a radarowu staciju kaž tež wojerske objekty USA w Kuwaiće a Iraku nadběhowali.

Samsny čas prezident USA Donald Trump twjerdźi, zo je wójsko Irana w dalokej měrje zlemjene. „Nimaja žane lětadła wjace. Nimo toho smy 60 procentow wšěch raketowych systemow zničili“, wón rjekny. USA chcedźa z nadpadami na Iran pokročować.

Drježdźany (dpa/SN). Pozdatneju bombow z časa Druheje swětoweje wójny njedaloko bywšeho Carolineho mosta dla hotuja so w Drježdźanach přichodny tydźeń na nowe naprawy ewakuowanja. Hač budu woprawdźe trěbne, rozsudźa přichodnu wutoru, rěčnik wohnjoweje wobory zdźěli. Potom chcedźa namakance we Łobju njedaloko nowoměšćanskeho pobrjoha přepytować.

Jeli so woprawdźe wo rozbuchadle ­jedna, dyrbja wokolinu we wobkruhu jednoho kilometra hnydom zawrěć. Najpozdźišo srjedu rano dyrbja wšitcy wobydlerjo zawrjene pasmo wopušćić. Po informacijach města by něhdźe 18 000 ludźi potrjechenych było. Zawrjene pasmo wopřija wulke dźěle stareho města z kralowskim hrodom, Zwingerom a cyr­kwju Našeje knjenje, Awgustusowy a Albertowy móst kaž tež južny dźěl noweho města. Bomby běchu při přihotach twarnišća za nowy móst namakali.

Moskwa (dpa/SN). Ruska a Ukraina stej wospjet sta wójnskich jatych wuměniłoj. 200 wojakow je so po informacijach ­ruskeho wonkowneho ministerstwa z Ukrainy do swojeje domizny nawróćiło. Wuměnu su Zjednoćene arabske emiraty a USA posrědkowali.

Ukrainski prezident Wolodymyr Zelenskyj je wobkrućił, zo je 200 zakitowarjow města Mariupola a kónčin Donjecka, Luhanska a Charkiwa zaso w Ukrainje. Wón dźakowaše so USA za posrědkowanje. Dźensa chcychu dalšich 300 wójnskich jatych wuměnić. W Genfje běchu so dojednali, tysac wójnskich jatych na kóždej stronje přepodać. Naposledk běštej wobě wójnskej stronje před dobrym měsacom jatych wuměniłoj.

Köln (dpa/SN). Wjetšina ludźi w Němskej wójnu USA a Israela přećiwo Iranej wotpokazuje. Po wuslědku tydźenskeho woprašowanja sćelaka ARD ma 58 procentow woprašowanych wojerski nadpad za njewoprawnjeny, 25 procentow porno tomu za woprawnjeny.

Něhdźe tři štwórćiny ludźi začuwaja aktualne politiske połoženje na swěće tež w Němskej jako wohroženje. 59 procentow ma to za wohrožace, 18 procentow samo za jara wohrožowace. To je cyłkownje 77 procentow wobydlerjow a z tym 23 procentow wjace hač spočatk februara 2022, potajkim do wudyrjenja wójny w Ukrainje. Aktualnje posudźuje jenož hišće 21 procentow ludźi połoženje w Němskej jako lědma resp. scyła nic wohrožowane. Knježerstwo CDU/CSU a SPD njeje so dotal jasnje wuprajiło, hač nadpad na Iran zasadam prawa ludow wotpowěduje abo nic. Institut Infratest dimap bě so w nadawku sćelaka 1 317 ludźi w Němskej za jich měnjenjom prašał.