To a tamne (03.03.26)
Policija warnuje před internetnymi wobšudnikami, kotřiž tuchwilny chaos překnihowanja lětow w krajach Bliskeho wuchoda znjewužiwaja. Žona w Delnjej Bayerskej bě při tym 2 500 eurow přisadźiła. Ludźo měli jenož oficialne internetne strony lětarskich předewzaćow wužiwać, policija namołwja. Pytajo za móžnymi nowymi zwiskami z krajow, w kotrychž wójna howri, dóstanu so mnozy na dubiozne strony wobšudnikow.
Wopity, bjez jězbneje dowolnosće a z wopačnymi čisłowymi tafličkami na awće bě šofer Citroëna po puću, jako jeho policisća w Erfurće kontrolowachu. Test alkohola wunjese 2,6 promilow. Jězbnu dowolnosć muž scyła njewobsedźeše a čisło Citroëna njesłušeše k awtu. Muž dyrbješe zastojnikow na policajsku stražu přewodźeć. Tam jemu krej wotewzachu a chłostanske jednanje zahajichu.
Wojerski konflikt so rozšěrja
Israel a USA nadběhuja Iran – Libanonska Hisbollah třěla rakety na Israel
Tel Aviv/Beirut/Teheran (dpa/SN). Konflikt na Bliskim wuchodźe so po morjenju iranskeho statneho nawody Ajatollaha Chameneija dale rozšěrja. Libanonska milica Hisbollah je minjenu nóc wjacore rakety na Israel třěliła a je tak po boku Irana do boja přećiwo herbskemu njepřećelej zapřimnyła. Israel reagowaše na to z nalětami wojerskich lětadłow na južne dźěle libanonskeje stolicy Beiruta. Runočasnje bombardowachu israelske lětadła iransku stolicu Teheran. Tež wójsko USA po informacijach prezidenta Donalda Trumpa Iran dale nadběhuje.
Křižowe puće
Bonn (B/SN). Na křižowym puću katolscy wěriwi před 14 stacijemi stejo abo klečo ćerpjenje Jězusa wopominaja. W srjedźowěku su franciskanojo křižowe puće w Jerusalemje zawjedli, a wone so spěšnje po cyłym swěće rozpřestrěchu. Najznaćiši křižowy puć bamž kóždolětnje w romskim Koloseju nawjeduje.
Pětrowa cyrkej wohrožena
Vatikan (B/SN). Italski koncern Eni je při wobšěrnych přepytowanjach najwjetšeho Božeho domu křesćanstwa wjacore wobškodźenja zwěsćił. Dokelž steji Pětrowa cyrkej na njerunym spódku, je wona zemjerženjam wustajena. A dokelž ju jara wjele ludźi wšědnje wopytuje, budźe restawracija nuznje trěbna. Cyrkej bě bamž Urban VIII. 18. nowembra 1626 po 120 lět trajacym twarskim času poswjećił. Składnostnje 400. jubileja budu w njej wjacore kulturne a liturgiske zarjadowanja.
Ekumeniske přijeće
Merz po puću do Washingtona
Berlin (dpa/SN). Dwaj dnjej pod nadpadach USA a Israela na Iran je so zwjazkowy kancler Friedrich Merz (CDU) dźensa do Washingtona podał. Tam wočakuje jeho jutře prezident USA Donald Trump. Druhi wopyt zwjazkoweho kanclera w Běłym domje po nastupje zastojnstwa před dźesać měsacami bě dlěje planowany. Nadpady na Iran steja pak nětko bjezdwěla w srjedźišću wuradźowanjow w běrowje prezidenta USA we Washingtonje.
Němscy wojacy potrjecheni
Berlin (dpa/SN). Po eskalaciji mjez USA, Israelom a Iranom su po informacijach Zwjazkoweje wobory nětko tež wojerske objekty wot nadpadow potrjechene, w kotrychž su tež němscy wojacy zaměstnjeni. Sobotu a njedźelu běchu iranske truty tež do mjezynarodneju zepěranišćow Erbil na sewjeru Iraka a Al-Asrak w Jordaniskej zrazyli, operatiwne komando nawjedowanja zdźěla. Wojacy sedźa njezranjeni w škitnych bunkrach, Zwjazkowa wobora informuje.
Nadpady Irana zasudźene
Skorža přećiwo awtotwarcej
Macronza atomarny škit
Île Longue (dpa/SN). Francoski prezident Emmauel Macron chcyše dźensa nowe plany za atomarne wottrašenje swojeho kraja předstajić. W narěči na zepěranišću francoskich atomarnych podnurjakow chce so Macron nimo toho k tomu wuprajić, kak móhli europscy partnerojo na francoskim nuklearnym škitnym systemje sobu dźěłać.
Na Mnichowskej wěstotnej konferency před tydźenjomaj bě debata wo sylnišim atomarnym wottrašenju Europy znowa nastała. Zwjazkowy kancler Friedrich Merz (CDU) bě rjekł, zo z Macronom w tutej naležnosći hižo wuradźuje. Francoska a Wulka Britaniska, kiž matej wobě atomarne brónje, stej swoje styki w tymle prašenju hižo zesylniłoj.
Ewakuaciju Němcow wuzamknył
Rěčeć a třěleć
To a tamne (02.03.26)
Šefa drogoweje cwólby je policija w sewjerorynsko-westfalskim Ratingenje zajała. 34lětneho Němca su do přepytowanskeje jatby dowjezli. Muž je podhladny, zo je we wobłuku mjezynarodnje dźěłaceho kruha wikowarjow drogow znajmjeńša dwanaće tonow kokaina z Južneje Ameriki w hódnoće sto milionow eurow do Němskeje importował. W domje muža namakachu zastojnicy luksusowe twory za 800 000 eurow. Pola přiwuznych muža sćazachu imobilije w hódnoće znajmjeńša 15 milionow eurow.
Spěwarka Sarah Engels pojědźe za Němsku na Eurovision Song Contest do Wiena. 33lětna je so sobotu w Berlinje přećiwo wosmjom požadarjam přesadźiła. Ze swojim spěwom „Fire“, kiž ma wosebje žonam móc a žiwjensku radosć spožčić, je sej wona najwjace dypkow zdobyła. Finale w stolicy Awstriskeje je 16. meje.
Bill Clintom před kongresom
Washington (dpa/SN). W zwisku z přeslědźenjom skandala wokoło seksualneho złóstnika Jeffreyja Epsteina hotuja so dźensa wječor na njewšědny podawk: Prěni króć po lětdźesatkach chce so z Billom Clintonom bywši prezident USA před parlamentom wuprajić. Clinton znaješe lěta 2019 zemrěteho Epsteina, kiž bě wjele lět system znjewužiwanja młodych žonow wudźeržował. Wčera bě hižo mandźelska Clintona, bywša wonkowna ministerka Hillary Clinton, na prašenja zapósłancow wotmołwiła.
Wójsko přećiwo trutam zasadźić
Berlin (dpa/SN). Zo móhła wobydlerjow lěpje před spionažu, sabotažu a nadpadami škitać, dóstanje Zwjazkowa wobora wjace prawow při wotwobaranju trutow. Zwjazkowy sejm je wotpowědnu změnu zakonja za škit powětroweho ruma wobzamknył. W nim je wuraznje zapisane, zo smě wójsko při wotwobaranju njewobsadźenych lětacych objektow pomhać a je w nuzy tež wottřělić.
Změnja prawo na azyl
