Hladaš wědomje preč?
Miliony ludźize snadnej mzdu
Berlin (dpa/SN). Nimale kóždy pjaty dźěławy w Němskej je loni mjenje hač 15 eurow brutto na hodźinu zasłužił. Po najnowšich ličbach bě jich loni w aprylu 7,7 milionow přistajenych (19,3 procenty). Tole wuchadźa z wotmołwy zwjazkoweho knježerstwa na naprašowanje frakcije Lěwicy w zwjazkowym sejmje.
Něhdźe dźesać milionow přistajenych zasłuža mjenje hač 16 eurow na hodźinu, něhdźe pjeć milionow ma mjenje hač 14 eurow. Wot knježerstwa mjenowane ličby pochadźeja z přehlada Zwjazkoweho statistiskeho zarjada nastupajo zasłužbu w Němskej. Socialny zwjazk Němskeje mjenuje ličby hrózbne. Zakonska minimalna mzda w Němskej wučinja tuchwilu 13,90 eurow. Wona ma so spočatk 2027 na 14,60 eurow zwyšić. Předsydka socialneho zwjazka Michaela Engelmeier žada sej „minimalnu mzdu, kotraž chudobje zadźěwa“. Wotpowědujo směrnicam EU dyrbjało tole znajmjeńša 60 procentow přerězneje mzdy wučinjeć. Mzdy w delnim dźělu mzdoweje tabulki płaća na přikład w hosćencach a hotelach. Tola tež w zamkarnjach awtow abo we wobłuku posłužbow su mzdy jara niske.
Nalěćo skónčnje bliži so
Sakska je dobra dołžnica
Drježdźany (dpa/SN). Sakska je z wida mnohich financnych ekspertow dale wosebje spušćomna dołžnica. Ratingowa agentura Standard & Poor‘s je swobodnemu statej znowa najlěpši predikat „AAA“ spožčiła. Z tym móže sej kraj na kapitalnych wikach dale pjenjezy za poměrnje přijomne kondicije požčować. Wuhlady do přichoda posudźuja fachowcy nětko jako stabilne, sakske financne ministerstwo zdźěla.
Loni drje bu Sakska wot Standard & Poor‘s tohorunja najlěpje pohódnoćena, strukturnych njedostatkow w krajnym etaće dla pak je agentura wuhlady skerje negatiwnje posudźowała. Tak bě dobra bonita tehdy z namołwu zwjazana, wobstejace strukturne deficity w hospodarskim planje konsekwentnje wotstronić.
W swojej aktualnej rozprawje chwala sej eksperća po informacijach ministerstwa wosebje prócowanje knježerstwa, lutować a strukturne deficity w dwójnym etaće za 2027/2028 přewinyć. Jeli so wurunany etat njeradźi, móhł so posudk fachowcow wo spušćomnosći Sakskeje nastupajo wotpłaćenje kreditow pohubjeńšić.
To a tamne (12.03.26)
Twarski kran je so wutoru w Erkrathće pola Düsseldorfa při składowanju twaršćiznow powalił a na hruby twar padnył. Hoka krana pak zrazy do susodneho bydlenskeho domu. Fachowcy trjebachu hač do wječora, zo bychu kran zaso zběhnyli. Wjacore twarjenja dyrbjachu ewakuować. Wobydlerjo přebywachu tak dołho pola znatych. Hakle wječor wokoło 22 hodź. smědźachu ludźo zaso do swojich bydlenjow.
Po hodźiny trajacej hawariji wšitke nuzowe telefony podłu awtodróhow Němskeje zaso funguja. Tuchwilu nuzowe stacije zaso normalnje funguja, awtodróhowy zawod Zwjazka zdźěla. Wutoru wječor běchu telefony podłu awtodróhow wupadnyli. Přičina bě techniski defekt pola eksterneje firmy, kotraž system dohladuje. Po wšej Němskej steji 17 000 nuzowych stacijow.
Ratarski minister Łužicu wopytał
Porsche swój dobytk přisadźił
Stuttgart (dpa/SN). Přidatne kóšty, kiž běchu podlěšeneje produkcije bencinowych awtow dla nastali, su dobytk twarca sportowych awtow Porsche loni wurunali. Wuslědk koncerna je přirunujo z 2024 wo 91,4 procenty na jenož hišće 310 milionow eurow spadnył. Tole koncern w Stuttgarće zdźěli. Lěta 2024 bě koncern hišće nimale 3,6 miliardow eurow zasłužił. Tež awtotwarc Volkswagen bědźi so z bolostnymi stratami: Loni je dobytk VW wo 44 procentow woteběrał.
W palacym so busu zahinyli
Kerzers (dpa/SN). W linijowym busu w Šwicarskej je ke katastrofje dóšło. Při wohenju je šěsć sobujěducych žiwjenje přisadźiło, štyrjo dalši a sanitetar so zranichu. Po informacijach swědkow je so muž w busu sam z bencinom pokidał a zapalił. Třo ćežko zranjeni su přeco hišće w smjertnym straše. Podawk je w Šwicarskej wulke zludanje zbudźił.
Trump hrozy Iranej minow dla
W Japanskej su ludźo dźensa wopory zemjerženja a slědowaceho ...
Günther: Socialne medije zahubne
Kiel (dpa/SN). Z hišće doraznišimi słowami hač dotal je ministerski prezident Schleswigsko-Holsteinskeje Daniel Günther swoje žadanje za zakazom socialnych medijow za młodych ludźi potwjerdźił. „Jeli dale činimy kaž dotal, bjez toho zo zapřimnjemy, powjedźe to našu towaršnosć do zahuby“, rjekny politikar CDU nowinarjam. Tež mjez dorosćenymi njewostanje intensiwne wužiwanje socialnych syćow „bjez sćěhow“.
Podźěl brać drje je wažne, Günther rjekny. „Tola kotre dźěćo chce podźěl brać na widejach połnych namocy, wotprawjenjow, wočornjenjow a skomolenych idealow rjanosće, kiž je do depresijow ćěrja“, so wón praša. „Smy minjene lěta ćežko hrěšili, dokelž smy tole přepozdźe spóznali a ničo přećiwo tomu nječinili“. Mjez młodymi ludźimi mamy wšitcy „wulke škody sobu zamołwić, dokelž njejsmy jako stat swoju škitnu funkciju spjelnili.“ Günther žada sej tohodla spěšny zakaz socialnych medijow. Wotpowědna wjetšina w zwjazkowym sejmje je wotwidźeć, je sej wón wěsty. „Kóždy měsac, kiž čakamy, dźěćom a młodostnym zeškodźi. Sym stajnje ke kompromisam zwólniwy, w tymle prašenju pak nic.“
18 000 ludźi ewakuować dyrbjeli
Drježdźany (dpa/SN). Wulku akciju znješkódnjenja bomby z Druheje swětoweje wójny su dźensa rano njedaloko bywšeho Carolineho mosta w Drježdźanach zahajili. Policija je hišće raz na to skedźbniła, zo maja wšitcy ludźo, kiž bydla we wobkruhu tysac metrow wokoło bomby, swoje bydlenja wopušćić. Nuzowe přebywanišća na arealu Drježdźanskich wikow běchu wot 7 hodź. přistupne. Město je busy za transport ludźi zasadźiło.
Bombu běchu zašły tydźeń při přepytowanju podłohi za nowy móst našli. Po tym zo bě jasne, zo jedna so woprawdźe wo 250 kilogramow ćežke rozbuchadło, su akciju přihotowali.
Za to dyrbjachu dźensa wulke dźěle nutřkowneho města ewakuować. Něhdźe 18 000 wobydlerjow je potrjechenych. Bomba je powostanka ćežkich bombowych nadpadow 13. februara 1945, při kotrychž bě 18 000 ludźi zahinyło.
