To a tamne (09.12.25)
Njeluba překwapjenka na swjedźenju swjateho Mikławša w braniborskim Wikowje (Elsterwerda): Wobsedźer bydlenja dyrbješe sobotu wječor zwěsćić, zo su njeznaći z jeho bydlenja myjadło a cyłu kupansku wanju pokradnyli. Paduši běchu při tym durje bydlenja chětro wobškodźili a tež dalše wěcy pokradnyli. Što z myjadłom a wanju chcedźa, policija nětko přepytuje.
Na wšěch 130 hodownych štomow su paduši z mobilneho předawanišća w Choćebuzu pokradnyli. Sobudźěłaćerjo njeskutk wčera rano zwěsćichu a policiju informowachu. Prawdźepodobnje běchu so paduši kónc tydźenja do předawanišća zadobyli. Policija njeskutk přepytuje. Cyłkownu hódnotu rubizny trochuja na wjace hač 4 000 eurow. Kriminalna policija tuka, zo spytaja paduši hodowne štomy na prowizoriskim stejnišću za tunju płaćiznu předać.
Zhromadne wěrywuznaće
Istanbul (B/SN). Bamž Leo XIV. a ortodoksny patriarch Bartholomais staj na swjedźenju swjateho Handrija, załožićela ortodoksneje cyrkwje, w měsće Istanbulu potwjerdźiłoj, zo staj „po puću měra a rosćaceje zhromadnosće katolikow a ortodoksnych wěriwych“. Bamž Leo XIV. dopominaše na swojej prěnjej wukrajnej jězbje na zhromadne wěrywuznaće wšěch křesćanow, kotrež bu před 1 700 lětami na prěnim koncilu w Niceji formulowame.
Šula město fabriki
Aachen (B/SN). Hwězdni spěwarjo 30. decembra swoju akciju pod hesłom: „Šula město fabriki – hwězdne spěwanje přećiwo dźěćacemu dźěłu“ w Freiburgu zahaja. Prezident katolskeho dźěćaceho misionskeho skutka Dirk Bingener so za to zasadźuje, „zo móža dźěći do šule chodźić a zo njedadźa so jako tunje dźěłowe mocy znjewužiwać“.
Žony w NDR a na zapadźe
Merz a Netanjahu so wujednałoj
Jerusalem (dpa/SN). Zwjazkowy kancler Friedrich Merz (CDU) a israelski ministerski prezident Benjamin Netanjahu staj turbulency minjenych měsacow w poćahach wobeju krajow z wulkeho dźěla přewinyłoj. Na wopyće Merza w Jerusalemje staj wobaj zwadu skónčiłoj, kotraž bě po nachwilnym přetorhnjenju wojerskich eksportow do Israela wudyriła. „Přichadźam jako přećel Israela, kiž derje wě, kak wažne němsko-israelske přećelstwo je“, zwjazkowy kancler rjekny.
Liči z wyšimi přinoškami
Berlin (dpa/SN). Nawoda chorobneje kasy technikarjow Jens Baas z tym liči, zo přinoški do chorobnych kasow klětu znowa stupaja. Tole rjekny Baas w sćelaku ARD. Ministerka za strowotnistwo Nina Warken njeje lutowanski program zwoprawdźić móhła. Na druhim boku su wšitcy přewidźeli, zo dyrbja tež chorobne kasy zaso pjenježne rezerwy wutworić, Baas rjekny. Tež přiběrace wudawki za přijimarjow wobydlerskeho pjenjeza kasy poćežuja.
Powalenje Assada woswjećili
Šěsć tydźenjow po tym, zo bě swój prěni wopyt cofnył, je ...
Nowy namjet nastupajo rentu
EU za mjenje běrokratije
Europa rěči wo měrje w Ukrainje
Němska wo dobru radu njerodźi
Wěstotna strategija USA porokuje krajam Europskeje unije
Washington/Doha (dpa/SN). Nowa wěstotna strategija USA je ze swojej raznej kritiku napřećo Europje nowe napjatosće w transatlantiskich poćahach zawinowała. Runočasnje Washington Europu dale nadběhuje. Społnomócnjena EU za wonkowne naležnosće Kaja Kallas spyta, napjatosće wottwarić. „USA su přeco hišće naš najwjetši zwjazkar“, rjekny Kallas na diplomatiskej konferency, kotraž so kóždolětnje w Doha wotměwa. Němski wonkowny minister Johann Wadephul (CDU) wo dobru radu USA njerodźi.
Knježerstwo USA bě minjeny štwórtk swoju nowe wěstotnu strategiju wozjewiło a w dokumenće chětro struchłe połoženje Europy rysowało. Tuchwilne wuwiće po měnjenju prezidenta USA Donalda Trumpa samo ameriske zajimy wohrožuje. Awtorojo posudka skorža, zo so demokratija a swoboda měnjenja pozhubjatej. Woni su přeswědčeni, zo dyrbjała EU swoju politiku nuznje korigować.
