Nowe směrnicy za tepjenja jasne
Berlin (dpa/SN). Wobsedźerjo imobilijow smědźa tež přichodnje nowe wolijowe a płunowe tepjenja do swojich bydlenjow zatwarić. Na to su so zastupnicy CDU/CSU a SPD při swojich wuradźowanjach wo reformje tak mjenowaneho tepjenskeho zakonja z časa koalicije SPD, Zelenych a FDP dojednali.
Najebać to dyrbja płunowe a wolijowe tepjenja podźěl klimje přichilenych energijowych žórłow poněčim zwyšić.
Podružnikow, kotřiž nimaja žadyn wliw na wašnje tepjenja, chcedźa „před přewysokimi pódlanskimi kóštami“ škitać, kotrež móhli jim ze zatwarom njeefektiwnych tepjenjow hrozyć. Nadrobnosće k tomu njejsu hišće dojednane.
Fachowcy wočakuja, zo dóńdźe při dokładnym zrjadowanju zakonja hišće k zwadźe mjez uniju a SPD, dokelž su nastajenja stronow hladajo na škit klimy hišće dosć rozdźělne.
Na jeničkej njedźeli
Powołanske móžnosće zeznali
To a tamne (25.02.26)
Do chorownje zapokazali su norwegskeho krala Haralda V. na kupje Teneriffa. Tole zdźěla kralowski dwór w Oslu. Krala lěkuja tam natyknjenja a wusušenja dla. Wosobinski lěkar krala chce so po najspěšnišim puću na kanarisku kupu podać, zo by Haralda při wuhojenju podpěrował. Norwegski monarch bě před dnjemi swoje 89. narodniny woswjećił.
Dwanaćelětny namócny skućićel je so po brutalnym nadpadźe na 26lětneho w Berlinje-Neuköllnje pola policije přizjewił. Tole je rěčnik policije powěsćerni dpa zdźělił. Dwanaćelětny bě 26lětneho minjenu njedźelu w Berlinje po schodźe dwórnišća teptał. Muž so při tym zrani. Njepołnolětny je so předwčerawšim, wutoru, wječor na policajskej straži zastojnikam stajił. Třo dalši skućićeljo w starobje 15 a dwójce 14 lět su so po njeskutku tohorunja pola policije přizjewili.
Karoline Krawcec z prěnjej personalnej přehladku
Choćebuz (NC/JFK/SN). Kak móhli sej serbski futurizm předstajić? Z tym zaběraše so intensiwnje w Lipsku bydlaca serbska wuměłča Karoline Krawcec. Wuslědki jeje wuměłskeho rozestajenja widźiš w jeje wustajeńcy „jama: pśichod/Grube: Zukunft“, kotraž bu minjeny pjatk w Braniborskim krajnym muzeju za moderne wuměłstwo (BLMK) wotewrjena. Multimedialna instalacija wobswětluje serbske tradicije zwonka ryzy folklory. Wopytowarjo móža so po wšelakich tematiskich kapitlach hibać a při tym dožiwić, kak wuměłča na kolektiwnym pomjatku dwěluje a w čim so perspektiwy identitow, přisłušnosćow a sebjereprezentacijow jewja. Byrnjež so Krawcec na swójske serbske korjenje złožowała, so na nje njewobmjezuje. W jednotnym rumje prezentuje mnohe ze symboliku kipjace objekty, k tomu wideja, keramiku a tak mjenowanu augmented reality. W jich zhromadnym skutkowanju so zašłosć, přitomnosć a přichod runočasnje wuwiwaja a kulturne procesy wotbłyšćuja.
Merz po puću do Chiny
Berlin (dpa/SN). Zwjazkowy kancler Friedrich Merz (CDU) je so na swoju prěnju jězbu do Chiny podał. Jutře wočakuje jeho w Pekingu statny prezident Xi Jinping. Wobaj chcetaj wo hospodarskim zhromadnym dźěle a wo wěstotnych politiskich temach rěčeć. Merz chce tež čłowjeske prawa w Chinje narěčeć, wón do wotlěta přilubi. Ćežišćo hospodarskich rozmołwow su rědke surowizny, kotrež w Němskej a Europje nuznje trjebaja.
Warnuje před strachami wójny
Washington (dpa/SN). Šef generalneho staba wójska USA Dan Caine je prezidenta USA Donalda Trumpa pječa před tym warnował, Iran wojersce nadpadnyć. Caine pokazuje na wulke strachi, kotrež bychu wojakam USA hrozyli, rozprawjeja wjacore medije USA. Trump je powěsće mjeztym jako „wopačne“ wotpokazał. Iran mjez druhim twjerdźi, zo ma brónje, z kotrymiž móže hoberskej lětadłonošakaj USA před pobrjohom Irana zničić.
Wilmer nawoda biskopow
Sněhowy wichor je amerisku metropolu New York zlemił. Wobydlerjo ...
Von der Leyen do Kijewa dojěła
Kijew (dpa/SN). Prezidentka komisije EU Ursula von der Leyen a prezident Rady EU António Costa staj składnostnje štwórteje róčnicy nadpada Ruskeje na Ukrainu na wopyt do Kijewa dojěłoj. Von der Leyen rjekny, zo ma wopyt pokazać, zo steji Europa tež w tutej krutej zymje pjenježnje a wojersce njepowalnje po boku Ukrainy. Costa chcył zmužitosć a rozsudźenosć ukrainskeho ludu mytować, kotryž so mjeztym štyri lěta ruskemu nadpadźe wobora.
Zasćinjeny je wopyt wot blokady nowych sankcijow přećiwo Ruskeje ze stron Madźarskeje a Słowakskeje. Madźarska bě swoje weto přećiwo rozsudej EU zapołožiła, Ukrainje nowy kredit 90 miliardow eurow přewostajić.
Šmjatki cłow dla
Słowakska wotpinje Ukrainje milinu
Bratislava (dpa/SN). Słowakski ministerski prezident Robert Fico je připowědźenu „přećiwnu naprawu“ přećiwo susodnej Ukrainje zwoprawdźił. Dokelž dale žadyn ruski zemski wolij přez wolijowód „Družba“ přez Ukrainu do Słowakskeje njeběži, je Fico wukazał, dodawanje słowakskeje miliny do Ukrainy přetorhnyć.
Fico w tym zwisku zdźěli, zo je do toho ukrainskeho prezidenta Wolodymyra Zelenskeho naležnje wo telefonat prosył. Dokelž pak bě tón hakle jutře, srjedu, k tomu zwólniwy, bě Słowakska nuzowana, swójske naprawy přesadźić. Ručež transit wolija zaso funguje, tež milina do Ukrainy zaso ćeče, Fico přilubi.
Słowakska dóstanje přez wolijowód zemski wolij z Ruskeje, dokelž je energetisce wot toho wotwisna. Wot kónca januara žadyn wolij wjace njedochadźa, dokelž je pipeline pječa přez ruske bomby wobškodźena. Słowakska a Madźarska Ukrainje wumjetujetej, zo wolij wotpohladnje blokuje. Kónc tydźenja bě słowakske knježerstwo nuzowy staw wukazało a statne rezerwy wolija mobilizowało.
