Drježdźany (dpa/SN). Wjacore tysac ludźi su w sakskej stolicy přećiwo pochodej prawicarskich ekstremistow składnostnje wopominanja zničenja města w Druhej swětowej wójnje protestowali. Na wjacorych městnach běchu sej prawicarjo a přećiwni demonstranća tak bliscy, zo so widźachu a słyšachu. K direktnej konfrontaciji pak njeje dóšło. Na přećiwnu demonstraciju bě něhdźe 3 000 demonstrantow přichwatało, prawicarjow naličichu něhdźe 2 000. Policija žane oficialne ličby njewozjewi.

Najebać mjeńše rozkory z policiju bě napřećiwny protest přewažnje měrliwy, rjekny rěčnik policije Thomas Geithner. Wosebje na spočatku demonstracije běchu přećiwni demonstranća spytali, čaru prawicarskeho „pochoda wopomnjeća“ ze sydanskimi blokadami přetorhnyć. Při tym běchu demonstranća tež policiju nadběhowali. Zastojnicy dyrbjachu tuž popjerjowy spray wužiwać. Dohromady 2 200 policistow bě sobotu w Drježdźanach zasadźenych, mjez nimi běchu tež zastojnicy na konjach.

Je so na konferency w Mnichowje woprawdźe přećelski zwuk přesadźił?

Mnichow. W Bayerskej wotmě so kónc tydźenja zaso wěstotna konferenca. Wot lěta 1963 schadźuje so tam lětnje mjezynarodna diplomatiska, politiska, intelektualna a žurnalistiska elita, zo by wo přichodźe swěta rěčała.

Loni je wotewrjenska narěč ameriskeho wiceprezidenta J. D. Vanca europskich partnerow zadźiwała a zamjerzała. W njej běše Vance Europje wotsalenje wot idealow swobody a wohrožowanje demokratije wumjetował. Jako přikład mjenowaše wot europskeho sudnistwa w lěće 2024 jako njepłaćiwe deklarowane prezidentske wólby w Rumunskej. Hladajo na tutu narěč běše atmosfera do spočatka lětušeje konferency napjata. Wobdźělnicy běchu wćipni, što wonkowny minister USA Marco Rubio w swojej narěči tematizuje.

Furore je na Mnichowskej konferency předwčerawšim diskusija „Rozdźělenje zapada: Što wostanje ze zhromadnych hódnotow?“ zbudźiła. Mjez druhimi disku­towachu tam něhdyša wonkowna ministerka USA Hillary Clinton, pólski wonkowny minister Radosław Sikorski a čěski wonkowny minister Petr Macinka. Tón bě konflikt ze staršimaj kolegomaj zahajił, jako je Clintonowej prajił, zo „wočiwidnje Trumpa njeznjese“, a njelubje překwapjenemu Sikorskemu, zo „w Europje demokratija njeknježi, dokelž europski parlament poćah k wolerjam nima“. Čěscy liberalni Macinku jako politisku hańbu wobhladuja, konserwatiwni jeho chwala. Wón sam kaž dobyćer na to pokazuje, zo su jeho The Times of India abo ameriske Fox News citowali, dokelž je skónčnje něchtó Clintonowej direktnje mjezwoči znapře­ćiwił. Kaž widźimy, njejsu jenož ludy politisce dźělene, ale cyły swět. Kotre zhromadne hódnoty da mamy? Lukáš Novosad

Zranjeny kormoran je so wóndano w Bremenskej klinice předstajił. W jeho pysku tčeše hoka wudy. Z pyskom bě ptak wjacekróć wo wokno nuzoweje stacije chorownje na lěwym brjohu rěki Weser dypał a sobudźěłaćerjow na sebje skedźbnił. Na to wohnjowu woboru zawołachu, kotraž zhromadnje z mediciniskim personalom hoku z pyska wotstroni. Po tym ptaka do parka klinikuma pušćichu.

Wjelka dla dyrbješe póstniski přećah w sewjerorynsko-westfalskim Leverkusenje sobotu skrótka pozastać. Popołdnju běchu wobydlerjo policiji zdźělili, zo běchu wjelka w měsće wuhladali, zdźěli rěčnik policije w Kölnje. Tež zamołwiteho za přećah wo tym informowachu, kotryž ćah z teje přičiny přetorhny. Zastojnicy na městnje za wjelkom pytachu a jeho tež nańdźechu, dokelž bě jara spłóšiwy.