Lipsk/Magdeburg/Erfurt (dpa/SN). Po warnowanskich stawkach je zjawny bliskowobchad w Sakskej, Durinskej a Saksko-Anhaltskej dźensa zaso zaběžał. Tak zdźělichu wobchadne zawody mjez druhim w Halle a Lipsku dźensa rano na swojich internetnych stronach, zo je warnowanski stawk skónčeny. Pola Drježdźanskich wobchadnych zawodow je informacija wo běžnym stawku z internetneje strony šmórnjena. Tramwajki a busy zaso normalnje jědu.

Druhe wobchadne zawody kaž w Magdeburgu, Kamjenicy abo Erfurće běchu hižo wčera připowědźili, zo su busy a nadróžne wot dźensnišeho ranja něhdźe 2.30 hodź. zaso po puću.

Dźěłarnistwo ver.di bě wčera w běhu tuchwilnych tarifowych jednanjow do cyłodnjowskeho warnowanskeho stawka namołwjała. Busy a tramwajki zwjetša wjace njejědźechu. Potrjechene běchu štyri wulke města w Sakskej, tři města a regiony w Saksko-Anhaltskej a jědnaće w Durinskej. Wosebje w powołanskim wobchadźe so tole sylnje wuskutkowaše.

Vogtlandske město wuhotuje 2027 znowa „Dźeń Saksow“

Plauen (dpa/SN). Město Plauen hotuje so z połnej paru na to, wuhotować jako hosćićel „Dźeń Saksow 2027“. Staflowy stab je wyši měšćanosta Stefan Zenner (CDU) wčera wot wyšeho měšćanosty Sebnitza Ronalda Kretschmera přewzał. Sebnitz bě loni 31. Dźeń Saksow wuhotowali. Najwjetši swjatk swobodneho stata zarjaduja wot lěta 2023 jenož hišće po dwěmaj lětomaj.

Vogtlandski Plauen pokazuje přede­wšěm na swoje nazhonjenja: Lěta 1997, runje před 30 lětami, běchu tam hižo raz z hosćićelom ludoweho a towarstwoweho swjedźenja. „Je to wulke a zdobom naročne wužadanje. Zdokonjamy pak to“, wyši měšćanosta Zenner rjekny.

Při wšěm planuja hižo nětko nowostku w Plauenje: Klětu wotměje so swjedźeń wot 18. do 20. junija. Tak njezarjaduja wulki wjeršk swobodneho stata wjace prěni kónc tydźenja w septembru, ale runočasnje z tradicionalnym Plauenskim swjedźenjom cankow.

Pad čwělowaneho psa je lubowarjow zwěrjatow a předewšěm wobsedźerjow psykow loni chětro zludał. Medije po cyłej Němskej wo tym rozprawjachu. Wjac hač 40 króć je 48lětny z powětrowku do hłowy psa třělił a zwěrjo z tym čwělował a ćežko zranił. Tři operacije dyrbješe psyk z mjenom Keks přetrać a je wo swoje žiwjenje wojował. Sudnistwo w Budyšinje je wčera w tym padźe bywšemu wobsedźerjej pjenježnu pokutu 1 650 eurow jako chłostanje napołožiło. Tohorunja njesmě wón dwě lěće žadyn skót plahować abo zwěrjata wobsedźeć. To je definitiwnje pře­miły wusud. W tajkich padach hroža mjenujcy tři lěta jastwa. Za Bronjana je wusud tuž wulke zbožo a tuž mje zadźiwa, zo jeho prawiznik wo tym rozmysluje, wusud njepřiwzać. To je fatalne a hubjene znamjo. Za ludźi, kiž zwěrjata čwěluja, to mjenujcy woznamjenja, zo njetrjebaja so ćežkich konsekwencow bojeć. Trjebamy jasnje wótriše zakonje, zo so tajke něšto njewospjetuje. Julius Paška

Před sudnistwom zamołwić dyrbi so wot dźensnišeho najstarši syn norwegskeje krónprincesny Mette-Marit. Marius Borg Høiby je po přeswědčenju statneho rěčnistwa wjacore žony wumocował a splažnje znjewužiwał. Někotre z nich je wón znjewužiwał, jako spachu a je njeskutki filmował. Cyłkownje 38 dypkow skóržby wopřijeja tež domjacu namóc, wobškodźenja a drogowe a wobchadne delikty. Wobskorženeho su sobotu zajeli.

Šěsć dalšich tydźenjow zymy w USA je sławny bobak (Murmeltier) Phil ludźom wěsćił. W městačku Punxsutawney w zwjazkowym staće Pennsylvania su so jeho na swjedźenju Swěčka Marije – połojcy zymskeho počasa – z oraklom prašeli, hač so zyma bórze pominje abo nic. Prašenje bě, hač widźi Phil swój sćin. Bohužel bě wuslědk na njedobro wšěch, kotřiž so bórzomneho kónca zymy nadźijeja.