Wosrjedź bližaceho so zymskeho njewjedra su přistajeni dróhotwarskeho zarjada a z nim zwjazanych nadróžnych słužbow w Mecklenburgsko-Předpomorskej dźensa stawkowali. Dźěłarnistwo bě jich k tomu namołwjało. Zamołwići kraja warnuja ludźi w tym zwisku před hładkimi dróhami, dokelž zymska słužba njedźěła. Hač sobudźěłaćerjo jutře dale stawkuja, njeje dotal znate.

Mjeztym zo bědźa so ludźo w Europje ze zymu a krutym zmjerzkom, wojuja wobydlerjo Awstralskeje přećiwo wuskutkam njewšědneje horcoty. We wjacorych kónčinach kraja knježa ekstremne temperatury. Wosebje potrjecheny je juh kraja wokoło metropole Sydneyja. Tam knježi hižo něšto dnjow horcota z temperaturu nad 40 stopnjemi. Po informacijach wjedrarjow je to něhdźe 15 stopnjow wjace hač normalny přerězk lěća.

Peking (dpa/SN). China je wot prezidenta USA Donalda Trumpa připowědźene zasahnjenje do wolijoweje industrije Ve­nezuele raznje kritizowała. „Nješwarna namóc a wotpohlad USA, wolijowe hospodarstwo Venezuele kontrolować, rani mjezynarodne prawo a prawo venezuelskeho ludu“, zdźěla wonkowne ministerstwo w Pekingu. China kupuje we Venezueli wulke mnóstwa wolija. Krajej stej zwjazkarjej. Trump chce 50 milionow barrelow wolija Venezuele přewzać.

SPD za wyši dawk namrěwcow

Düsseldorf (dpa/SN). SPD chce nastupajo namrěwstwowy dawk po wusudźe zwjazkoweho wustawoweho sudnistwa bórze swójski reformowy namjet předpołožić. Za wulke zamóženja chcedźa sej wjace ­namrěwstwoweho dawka žadać, rjekny frakciski předsyda w zwjazkowym sejmje Matthias Miersch nowinarjam. „Bohaći namrěwcy dyrbjeli so bóle na derjeměću towaršnosće wobdźělić, to je wěc sprawnoće. Dotal maja přewjele móžnosćow, so dawkej wuwinyć.“

Ludźi w krizy lěpje škitać