Budyšin (SN/bš). Wosebitu premjeru swjećachu wčera w Němsko-Serbskim ludowym dźiwadle z nowej inscenaciju za dźěći „ABC“. Je to pismikowa keklija, kotraž wjedźe hrajersce přez alfabet a wabi tak hižo najmjeńšich přihladowarjow. Hra bu spisana wot klankodźiwadźelnicy Anny Taraszkiewicz, kotraž běše nimo toho za wuhotowanje a režiju zamołwita. Do premjery witaše něhdźe 55 pěstowarskich a 20 dorosćenych přihladowarjow zastupjerka intendanta za serbske dźiwadło Madleńka Šołćic, kotraž přewza zhromadnje z Karolinu Wernicke dramaturgiju. Mjez publikumom běchu dźěći Malešanskeje Witaj-pěstowarnje „K wódnemu mužej“ a Budyskeje serbskeje pěstowarnje „Jan-Radyserb-Wjela“. Po witanju přińdźeštej hrajerce Anna Marie Lehmann, kotraž jako hósć sobu skutkuje a Marie-Luise Müller, a wuwabještej z wustupowanjom kaž klawnaj hižo prěnje smějkotanja publikuma. Pantomimisce předstajištej po rynku jednotliwe pismiki alfabeta a podkładźeštej tute ze serbskimi a němskimi wurazami. Z jednorymi srědkami sej při tym wupomhaštej.

Budyšin. Wuběrny koncert dožiwi ně­hdźe 20 serbskich a němskich připosłucharjow a lubowarjow klasiskeje hudźby njedźelu dopołdnja na małej žurli Muzeja Budyšin. Tam wustupi młody pólski smyčkowy trijo, dobyćer lětušeho hudźbneho festiwala Silesia Sonans on tour w Jelenej Górje. Festiwal, kiž so tam k 25. razej wotměwa, chce klasisku hudźbu młodym ludźom spřistupnić a młodych wuměłcow w hraničnej kónčinje přez hudźbu a dźiwadło hromadźe wjesć. K druhemu razej wuhotowa Němsko-serbske ludowe dźiwadło koncert dobyćerjow festiwala a zwjaza jón z tuchwilnej wosebitej wustajeńcu muzeja wo židowskim žiwjenju we Łužicy.

Wopytowarjo Frankfurtskich knižnych wikow wotkrywaja sej čitajo w pawiljonje hóstneho kraja Španiskeje zajimawe poskitki a so do knihow zanurja. Knižne wiki běchu wot minjeneho pjatka hač do wčerawšeho za wšitkich zajimcow přistupne. Wjace hač 180 000 wopytowarjow je lětsa přišło, při tym wučinješe fachowy publikum z 93 000 hosćimi něšto wjace hač połojcu. To zarjadowarjo k zakónčenju wikow wčera zdźělichu. Dohromady prezentowaše 4 000 wustajerjow z 95 krajow swoje nowostki. Foto: pa/Sebastian Gollnow

Wjerbno (HA/SN). Z wjace hač 190 stronami je Serbska pratyja za lěto 2023 zaso jedna z najwobšěrnišich publikacijow Ludoweho nakładnistwa Domowiny w delnjoserbskej rěči. Wot tych dohromady 52 dlěšich a krótšich přinoškow je 32 z pjera dźensnišich delnjoserbskich, hornjoserbskich a němskich awtorow a awtorkow. Jich je cyłkownje 27, kotřiž su do noweje Pratyje dopisowali. 15 z nich je swój přinošk w delnjoserbskej rěči napisało, třo w hornjoserbskej a dźewjećo w němskej. Tele ličby wotbłyšćuja tuchwilne połoženje na polu delnjoserbskeje spisowneje rěče.