„Absolutny wopytowarski rekord“
Budyšin (SN/bn). Němsko-Serbske ludowe dźiwadło je w minjenych dwanaće měsacach dohromady něhdźe 111 000 přihladowarjow na cyłkownje 858 zarjadowanjach zličiło. Něhdźe 7 400 wopytowarjow na dokładnje 78 serbskorěčnych programach woznamjenja „absolutny rekord po lěće 1989“, kaž w nowinarskej zdźělence NSLDź rěka. Najwjetšej publikumowej magnetaj w tym zwisku běštej činohra Esther Undisz „Šěrcec Hanka“ po noweli Jurja Kocha „Židowka Hana“ kaž tež zhromadnje ze Serbskim ludowym ansamblom loni w decembru zwoprawdźeny „mobilny adwentny kalender“ pod hesłom „Hody jědu“.
„Najebać ćežke wobstejnosće na spočatku lěta wjeselimy so, zo je nam telko přihladowarkow a přihladowarjow swěrnje wostało. Njeměrne a ćežke časy nas nadal wužaduja. Ćim wjetša je žadosć za zhromadnym dźiwadłowym dožiwjenjom, kotrež hódnoty sadźa, móc dawa a wězo tež zabawja“, intendant NSLDź Lutz Hillmann podšmórny.
Čas bilancowanja a inwentury
Politiske a kulturne akcenty na přechodźe do 2023
Budyšin (SN/mb/at). Přechod do noweho lěta wužiwachu načolni politikarjo na zwučene wašnje za narěč wo načasnych bytostnych prašenjach towaršnosće. Zwjazkowy kancler Olaf Scholz (SPD) rěčeše wo „ćežkim lěće 2022“, kotrež je „imperialistiska nadběhowa wójna“ Ruskeje přećiwo Ukrainje zawinowała. Kóždy móže w tutej situaciji stawizny sobu pisać, na přikład ze zlutowanjom energije abo z pomocu ćěkancam z Ukrainy. Scholz chwaleše wosebje angažement 29 milionow čestnohamtsce aktiwnych w Němskej a inowatiwne kročele za wuwiwanje hospodarstwa kaž recycling baterijow w Carnym Gózdźe.
Ministerski prezident Braniborskeje, Dietmar Woidke (SPD) praješe, zo su „hordźi“ na zasydlenje twornje Tesla, „sobu najwjetšu inwesticiju industrije“. Wosebje je zaručenje dźěłowych městnow w rafineriji w Schwedće z podpěru zwjazkoweho knježerstwa wuzběhnył.
Kompetenca institutnikow prašana
Budyšin (SN/at). Z rozsudom, we wobłuku změny strukturow w Budyskim a Zhorjelskim wokrjesu Němski centrum astrofyziki (NCA) wutworić, wurosće tež za Serbski institut wužadanje. Jeho wědomostne dopóznaća su za zdźěłanje cyłkowneho koncepta NCA požadane.
Kaž serbske slědźenišćo krótko do hód zdźěli, budźe wone na wudźěłanju koncepta za slědźenje wo transformacijach jako wobstatk cyłkowneho koncepta NCA wobdźělene. Drježdźanska Techniska uniwersita budźe za natwarnu fazu třoch lět zamołwitosć jako projektowy nošer přewzać. Pod jeje nawodom wšelake wědomostne zarjadnišća dźěłaja. Tak stara so Serbski institut předewšěm z nowym wotrjadom regionalne wuwiće a škit mjeńšin sobu wo fachowu koordinaciju inowaciskich wobłukow. Na tele wašnje móža institutnicy na jednej stronje na powšitkowne serbske potrěbnosće w zwisku z nastaćom slědźerskeho wulkoprojekta pokazać, na tamnej pak swójsku specifisku serbsku ekspertizu kaž tež swoje kompetency w slědźenju wo transformacijach a w transformatiwnej wědomosći do natwara NCA přinošować.
Čitajće w nowym rozhledźe (30.12.22)
Zejlerjowe wuprajenje „Nowe lěto, nowe časy“ hodźi so derje k nowemu lětnikej Rozhlada, kotryž wuńdźe wotnětka přezcyłnje barbny. Tak skutkuje wuhotowanje nětko bóle čerstwe, wosebje pak profituja z toho nastawki k wuměłskim temam, dokelž móža čitarjo wukładowanjam awtorow lěpje sćěhować. W aktualnym wudaću nastupa tole recensiji Marije Suchec wo wustajeńcy „Wšo je krajina. Serbski moler Jan Buk“ w Budyskim Serbskim muzeju a Wernera Měškanka wo wustajeńcy „Hella Stoletzki | měki / soft“, kotraž so tuchwilu w Choćebuskej Wuměłstwowej hali Łužica pokazuje. Dale wobsahuje januarske čisło komentar Pětra Šołty „Nudlowa poliwka na holanskej krajinje“, hdźež rozestaja so na žortne wašnje z akcijemi wobswětoškitarjow, kotřiž wobškodźa po wšěm kraju wuměłske twórby w muzejach. Denise Schallenkammer je přinošk wo wuznamje „serbskeho filma“ napisała. W nim wopisuje ćežke stejišćo filmoweho tworjenja w zašłosći.
Nowostka z LND
Dobra nalada we wospjet přepjelnjenej barace
Nuknica (SN/bn). Towarstwo barakka je po dwulětnej přestawce znatych přičin dla wčera mjeztym hižo 9. raz koncert pod hesłom „Hody nimo – Punkrock fever“ wuhotowało. W kopatej połnej Nukničanskej barace zahraštej skupinje JeDi z Berlina a GT z Wulkich Rědorjec (Großröhrsdorf). „Znate přičiny“ běchu planowanemu wustupej duwa Circolo Viciozo, tohorunja ze stolicy Němskeje, krótkodobnje zadźěwali. Je takrjec zastupujo zaspěwa a zahudźi spontanje Choćebuski spěwytwórc resp. „akustisce agěrowacy punk“ Yuppiescheuche.
JeDi zahajichu wječor z hesłu koncertoweho rjadu wotpowědowacej melanžu punka a „garažoweho“ rocka. Serbsce so z „my smy skupina GT“ předstajaca band doda sylnje na groove wusměrjenu wariantu alternatiwneho rocka ze zaměškami metala a dooma. Yuppiescheuche na gitarje da koncertej ze swójskimi, towaršnostnokritiskimi štučkami kaž tež z adapcijemi znatych spěwow najwšelakorišich žanrow wuklinčeć. Zarejowacy sej publikum dźakowaše so wšitkim skupinam dołho aplawdujo a zasłuži sej tak wot kóždeje kapały přidawk.
Dołhu tradiciju pokročowali
experiMINT
Radwor (SN/MiP). Přez socialne medije dosćahny nas wupisanje zajimaweju dźěłoweju městnow Staršiskeje iniciatiwy Radwor z.t. W tutej pytaja projektowu asistencu a projektowe nawodnistwo za projekt „Serbski experiMINT campus Radwor“, kotryž je we wobłuku spěchowanskeho programa „Serbska rěč a kultura w změny strukturow“ wot Załožby za serbski lud spěchowany a najprjedy raz hač do lěta 2026 schwaleny.
Hłowny zaměr campusa je, wosebje dźěći a młodostnych serbsce za přirodowědu zahorić, potajkim tematiki z tak mjenowanych MINT-předmjetow, a tak zajim za powołanja w tutym wobłuku budźić. Nic mjenje wažny aspekt projekta je, wobdźělnikam nowe serbske rěčne rumy z fachowej techniskej a přirodowědnej terminologiju wotkryć.
Slepjanske dźĕćetko w Budyšinje – pad přiswojenja kultury ...
Budyske Wjacławske wiki w adwenće přiwabjeja syły domoródnych a turistow, samo z Čěskeje. Zo njebychu ryzy městnosć konsuma hodownych chłóšćenkow abo darow byli, je so Budyski kulturny zarjad tež lětsa zaso wo bohaty kulturny poskitk postarał. Chwalobny wotmysł je, ludźom, nic naposledk turistam, tež bohatosć kultury našeje dwurěčneje kónčiny zbližeć. Do serbskich poskitkow słušachu mjez druhim hodowny koncert chóra „Budyšin“ na Hłownym torhošću, adwentne spěwanje serbskeho towarstwa Škit z.t. hromadźe z wopytowarjemi wikow a hodowny program dźěći Radworskeje serbskeje katolskeje pěstowarnje.
