Hosći tež delnjoserbsce witali
Nowe towarstwo załožene
Lüchow-Dannenberg (SN/JaW). Horstka přećelow Serbow je sobotu w Lüchowje-Dannenbergu towarstwo Serbski přećelski a dźěłowy kruh załožiła. Za předsydu wuzwolichu na załoženskej zhromadźiznje Ernsta Steltu, zdźěli towarstwo na naprašowanje. Cyłk ma tuchwilu dźesać čłonow, pjeć dalšich je čłonstwo přizjewiło.
Kaž wuchadźa z wustawkow, kotrež Serbskim Nowinam předleža, je sej towarstwo za prěnjorjadny nadawk stajiło, „drjewjansko-połobske herbstwo historiskeho kulturneho regiona Hannoverskeho Wendlanda kaž tež zhromadne serbske namrěwstwo susodnych regionow spěchować a wožiwić“.
„Wosebje wažne je nam wuske zhromadne dźěło z Domowinu, a to hłownje w nadregionalnym serbsko-słowjanskim muzejowym kruhu“, rěka z předsydstwa towarstwa. Dale su sej za nadawk stajili serbske korjenje wsow regiona a tam bydlacych swójbow přeslědźić kaž tež wotemrětu drjewansko-połobšćinu wožiwić. Swoje skutkowanje financować chcedźa předewšěm z přinoškow a pjenježnych darow kaž tohorunja ze zjawnych spěchowanskich pjenjez.
Dr. Jan Pětr Jordan
Strowi zas!
Na pjeć linkach, w formaće listoweje znamki, čitach w Serbskich Nowinach wo tym, zo přeprošeja k zhromadnemu spěwanju a „přinjesće sej sobu instrument za zhromadne hudźenje“. Na Smolic statoku w Hórkach, sobotu wječor, „Serbja zbliska a zdaloka su witani“. Pokazach noticku žonje. Njemóžachmoj sej wujasnić, štó na zhromadne spěwanje přeproša. Tajka skromna reklama – štó so na nju dohlada? Na serbske wječory jězdźimoj, dalokož móžno, z młodymi w swójbje. W tym padźe pak sej njezwažichmoj jich sobu wzać. Što potom, hdyž budu tam sedźeć a kóžde poł hodźiny rjec, zo chcedźa domoj. Naju wobmyslenja njeběchu na městnje. Přimam doprědka: Za naju budźe spěwny wječor na Smolic kuble w Hórkach wjeršk žiweje serbskeje kultury lěta, byrnjež so wone hakle započało. Byli smy a zaso budźemy pola Čilakow – tak so cyłk młodych Serbow mjenuje. Jenički hněw za naju bě, zo njejsmoj młodych sobu wzałoj.
Ekumeniski póstny seminar
Smochćicy (SN/bn). „Cyrkwje a wójna – Dźensa so wo měr starać“ je hesło, pod kotrymž wuhotuja Ewangelsko-lutherski cyrkwinski wobwod Budyšin-Kamjenc, Budyski dekanat a Towarstwo Cyrila a Metoda lětsa ekumeniski póstny seminar w Smochčanskim Domje biskopa Bena. Tež w lěće 2018, w kotrymž zhladujemy na wšelake róčnicy w zwisku z bojowniskimi rozestajenjemi, kaž na přikład na 1 000 lět Budyskeho měra abo na kónc Prěnjeje swětoweje wójny, knježi w mnohich kónčinach njeměr. W srjedźišću seminara steji tuž prašenje, kotre prócowanja wo měr su ze stron cyrkwjow zwoprawdźene abo kotre runje su kaž tež, što konkretnje w tymle zmysle zdokonjeja a kotre směrnicy nastupajo wójnu a měr měli křesćanam z orientaciju być.
Myto Gaußej
Myto Jeana Améryja spožčichu Karlej-Markusej Gaußej minjenu njedźelu w rumnosćach Akademije wuměłstwow w Berlinje. Je to wuznamjenjenje za europsku literarnu esejistiku. Gauß pućuje w zmysle Jeana Améryja (1912–1979), wuznamneho awstriskeho spisowaćela, hižo wjele lět po Europje. Mnohe zběrki je wo tym napisał.
Serbskaj dudakaj w Słowakskej
We wobłuku mjezynarodneho festiwala dudakow „31. Gajdošské fašiangy“ w Słowakskej staj minjeny kónc tydźenja tež serbskaj hudźbnikaj wustupowałoj.
Malá Lehota (TN/SN). Na přeprošenje „Cechi słowakskich dudakow“ – Gildy słowakskich dudakow – přebywaštaj instrumentalistaj-dudakaj Serbskeje folklorneje skupiny Sprjewjan Steffen Kostorž a Tomasz Nawka na 31. Gajdošskich fašiangach – zapusće dudakow – minjeny kónc tydźenja w słowakskej Malej Lehoće a wokolinje.
Cyłkownje wustupowaše tam 25 skupin z dwanaće krajow, mjez druhim ze Słowakskeje, Čěskeje, Běłoruskeje a Němskeje. Nimo toho bě tam tež cyłk grjekskich hudźbnikow, bydlacych w sewjeročěskim Javorníku a organizowanych w Asociace Řeckých Obcí v České Republice – Zjednoćenstwje grjekskich wosadow w Čěskej republice. Dudakaj z Łužicy předstajištaj na festiwalu serbsku dudowu hudźbu. Na přeco wupředatych a přepjelnjenych žurlach zaklinčachu na štyrjoch festiwalnych koncertach wuspěšnje a w dobrym zwuku troje serbske dudy: měchawka, měchawa a kozoł.
Ptačokwasnej programaj SLA wulki wuspěch
Budyšin (SN/bn). Lětuši wječorny ptačokwasny program Serbskeho ludoweho ansambla „Po serbskich slědach“ je so wčera na wospjet wupředatej žurli SLA z wuspěšnym poslednim předstajenjom skónčił. Wulkeho naprašowanja dla běchu zarjadowarjo krótkodobnje přidatne předstajenje organizowali, tak zo su inscenaciju cyłkownje 13 město spočatnje planowanych dwanaće króć pokazali.
