Staw po 3. běhu

štwórtk, 16. julija 2015 spisane wot:

Kóžde lěto wubědźuja so wohnjowe wobory zarjadniskeho zwjazka Při Klóšterskej wodźe w hašenju. Lětsa zetkawaja so kameradojo dohromady dźewjeć króć, zo móhli potom najspěšnišu woboru 2015 mytować. Nimo dalšich woborow z pjeć gmejnow stej tež młodźinskej wohnjowej woborje z Ralbic-Róžanta a Pančic-Kukowa/Wotrowa pódla. Wonej pak runje tak do cyłkowneho dypkoweho systema zapřijatej njejstej kaž wobornicy ze Salowa, Brěžkow a delnich Sulšec. Minjeny pjatk dobychu we Worklecach kameradojo ze Sulšec před Konjecami-Šunowom a Sernjanami-Róžantom.

Z tabulki wučitaće, štó ma po třoch z dźewjeć běhow dotal naj­lěpše wuhlady na pokal zarjadniskeho zwjazka Při Klóšterskej wodźe 2015:

1. Konjecy-Šunow (51 dypkow), 1. Wor­­klecy (51), 3. Sernjany-Róžant (49), 4. „Swj. Beno“ Pančicy-Kukow (42), 4. Gmejnska wobora Ralbicy-Róžant (42), 6. Pěskecy (40), 7. Hórki (16), 8. Smjer­dźaca (12)

Trening za nowu sezonu so započał

štwórtk, 16. julija 2015 spisane wot:
Tele dny započinaja wjacore koparske towarstwa za nowu sezonu trenować. Wutoru na přikład stej krajny ligist Jednota Kamjenc kaž tež wokrjesny wyši ligist DJK Sokoł Ralbicy/Hórki trening startowałoj. Na wobrazu wojujetaj Antonius Wałda (nalěwo) a Bosćij Bjeńš hižo wo kóždy bul. Jutře w Chrósćicach prěni króć trenuja, přichodnu wutoru čini to wokrjesny ligist SJ Njebjelčicy. W přichodnych tydźenjach w Serbskich Nowinach zhoniće, z kotrymi hrajerjemi so jednotliwe mustwa zesylnichu resp. štó je serbske koparske towarstwa wopušćił. Foto: Jurij Bjeńš

Beachvolleyball dale dźe

štwórtk, 16. julija 2015 spisane wot:

Tabulka hry/sadźby/dypki

1. Rjelka/Lipič  7 14 : 2 14

2. Smoła/Bjeńš 8 14 : 7 12

3. Eckert/Brězan 6 11 : 3 10

4. Wahlicht/Bětnar 6 8 : 5 8

5. Škit Budyšin 8 8 : 11 8

6. Šołta/Šołta 7 8 : 9 6

7. Gedik/Ješka 6 5 : 10 2

8. Šěn/Gal 7 4 : 13 2

9. Langa/Hantuš  7 2 : 14 0


W serbskej beachvolleyballowej lize zahwizdaja so dźensa wot 17 hodź. prěnje hry 2. połserije. Dotal drje hišće wšitke partije 1. połserije wuhrate njejsu (pjeć hišće pobrachuja), časa a wjedra dla pak so nětko hižo wróćohry přewjeduja. Štóž ma lóšt, móže sej dźensa sćěhowace dwójki wobhladać: Stefan Gedik/Jan Ješka, Beno Šołta/Metod Šołta, Maćij Šěn/Daniel Gal, Benedikt Smoła/Jurij Bjeńš a hrajerjej Škita Budyšin. Srjedź septembra dyrbjeli wšitke hry prěnjeje serbskeje beachvolleyballoweje ligi wotměte być. Dokelž dwójka Marko Smoła/Lukas Kubic zranjenja a časa dla wjace sobu njehraje, wobsteji aktualna tabulka jenož hišće­ z dźewjeć mustwow.Jurij Bjeńš

Němskopazličanski jubilej

štwórtk, 16. julija 2015 spisane wot:

Tradicionalny Němskopa­z­ličanski ko­par­ski turněr – mjeztym połstaty – w při­hoće na nowu sezonu budźe 24. julija pod hesłom „111 lět organizo­wany sport w Němskich Pazlicach“. We 18 hodź. zet­ka­tej so mustwje starych knjezow: Němske Pazlicy – Přećelski kruh starych knjezow. Po tym přewjedu błyskowy turněr mustwow wo­krjesneje wyšeje a wokrjesneje ligi. Pódla su zakitowar titula So­koł Ralbicy/Hórki kaž tež SJ Njebjelčicy, Ze­leno-běli Sepicy a domjace mustwo Na­twar Němske Pa­zlicy. W 19.15 hodź. budźetej poł­finalej, hodźinu pozdźišo hra wo 3. městno a w 21.15 hodź. finale.

Fanojo změja w Němskich Pazlicach móžnosć, sej hižo raz nowe mustwowe zestawy wobhladać. SN

Derje hrali, ale podleželi

srjeda, 15. julija 2015 spisane wot:

Budissa Budyšin

– Dynamo Drježdźany 2:3 (2:2)

Zestawa domjacych: J. Jakubov, Große – Kolan, Heppner, Klippel, Pfanne, Fröhlich, Čermák, Kral, Hoßmang, Hausdorf, Rupf, Walther, Rosendo, Hausch, Reher, Salewski, Barnickel, A. Jakubov, Heineccius

Před 3 300 přihladowarjemi su ko­parjo Budissy wčera wot spočatka sem turbo zašaltowali. Po 18 mjeńšinach hižo we wrotach hosća klinkaše, jako Alexander Jakubov z krótkeje distancy přetwori. Jeno tři mjeńšiny pozdźišo postaji sudnik jědnatku za domjacych, jako bu Salewski foulowany. Nowopřichad Rupf ju wěsće přetwori. Přihladowarjo njewěrjachu swojimaj wočomaj, wšako běchu to prěnje dwoje přećiwniske wrota za třećeho ligista w dotalnych testowych hrach. Dynamo pak wotući a w 32. min. skrótši. Müller bě z hłójčku wuspěšny. Njetraješe dołho a hižo steješe 2:2. Testroet přewiny Jakubova z billiard-wrotami.

Daniel Rupf nětko Budyšan

srjeda, 15. julija 2015 spisane wot:

Pola regionalneho koparskeho ligista Budis­sy Budyšin je přichodny nowopřichad podpisał. Daniel Rupf přińdźe wot FC Carl Zeiss Jeny do sprjewineho města a zesylnja wotnětka srjedźne polo Budissy. W Stollbergu rodźeny započa Rupf hižo­ tam swoje kopački šnórować. Dale ćehnješe jeho do Aue, hdźež so samo hač do prěnjeho mustwa předrě. Dalše stacije běchu Saksojo Lipsk, VFC Plauen a hižo mjenowane mustwo z Jeny, hdźež steješe w minjenej sezonje 18 razow w regionalnej lize na trawniku.

W trenarju Tomašu Henčlu, kiž je 29lětneho koparja w prěnich testowych hrach wobkedźbował, zawostaji wón hižo­­ dobry zaćišć: „Z Danielom dóstanjemy nazhoniteho hrajerja, kiž našu ligu dosć derje znaje. Nimo toho je nje­směr­nje sylny w dwubojach a derje třěla. Wjeselu so na njeho“, Henčl nowopřichad Daniela Rupfa chwali. SN

26. raz wo Kulow-cup so wubědźowali

srjeda, 15. julija 2015 spisane wot:
Dohromady jědnaće mustwow wojowaše minjenu sobotu při Kulowskim měšćanskim haće wo nětko hižo tradicionalny Kulow-cup. Na nim wobdźěleja so stajnje póstniske gardy a mło­dźinske kluby Kulowa. Lětuši organizator Kulowminati, něhdyši juniorojo C a B Módro-běłych Ku­low, dźěše jako dobyćer z turněra, po tym zo bě Dźěłarnistwo w finalu z 2:0 jasnje porazył. Hra wo třeće městno běše napjećiša. Po regularnym času steješe hišće­ 0:0, hakle w třělenju jědnatkow přesadźi so mustwo Söffner z 1:0 přećiwo Dołhej gardźe. Werner Müller

Znowa dešć w Nuknicy

wutora, 14. julija 2015 spisane wot:

Beachvolleyballowa tura młodeje žołmy Radija Satkule zahajena

Swoju beachvolleyballowu turu 2015 je młoda žołma Radija Satkule wčera w Nuknicy zahajiła. Wosom mustwow bě do małeje wsy přichwatało, zo bychu prěni raz za wulki turněr wosrjedź aw­gusta w Miłoćicach trenowali.

Jako wuhrachu serbske cyłki w dwěmaj staflomaj finalne hry, bě drje pomróčene, ale suche a ćopło. Při poslednich hrach wo zaměstnjenja, započa so kapać. To je klasikar, hdyž pozastanje Satkula-beachtura w Nuknicy. Najebać lochki dešć pak wšitke mustwa hač do kónca swoje duele wuhrachu. Finalna hra mjez sadowej solotwju (Ludwig Eckert, Marcel Rjelka, Damaris Handrikec a Tina Herrmanec) a Róžantom bě hač do połojcy wurunana. Potom pak přesadźi so klasa Worklečanskeho cyłka, štož so na kóncu tež we wuslědku 21:13 špihelowaše.

Saněrowanje sportownje postupuje

wutora, 14. julija 2015 spisane wot:

Tójšto wuradźowanjow, poskitkow, wobzamknjenjow, wjele podpismow a hišće wjace dobreje wole běchu trěbne, prjedy hač móžachu sportowcy ST Marijineje hwězdy ze saněrowanjom sanitarnych rumnosćow w swojej hali započeć. Wězo jenož, kaž wot spočatka z gmejnskeho boka rěkaše, z pjenjezami a dźěłowej mocu­ towarstwa. Financielnu naležnosć jara wolóži, zo přizwoli na jednej stronje SAB spěchowanske srědki a na tamnej stronje pokaza jara wjele darićelow šćedriwu ruku. Wokomiknje je hišće něhdźe 3 600 eurow, kotrež maja so na te abo tamne wašnje nahromadźić, zo by cyłkowna potrjeba něhdźe 20 000 eurow zawěsćena była.

Twarske dźěła zahajichu so po jutrach. Dotal su wšitke stare sanitarne připrawy wutwarjene, špundowanja we wo­běmaj dušowarnjomaj ponowjene, wopłóčkowe roły wobnowjene, suchotwar a nowo­instalacija wodowodow w dušowarni mužow zwoprawdźenej. Tak móže Achim Kral ze Smjerdźaceje přichodny tydźeń kachlicy kłasć započeć.

Beachsoccer we Wojerecach

wutora, 14. julija 2015 spisane wot:
Dohromady dźewjeć mustwow je so minjenu sobotu we Wojerecach na koparskim turněrje hinašeho razu wobdźěliło. Mustwa njewubědźowachu so tam na trawniku abo twjerdym hrajnišću, ale na mjechkim pěsku. Turněr doby imobilijowa firma „Žiwjenske rumy“, kotraž bě turněr zhromadnje z FC Łužicu Wojerecy organizowała. Na wobrazu widźimy Ralbičana Dennyja Gloxyna, kotrehož Fabian Bejma (čo. 6) při wulk­otnej třělwje wobkedźbuje. Dohromady hraješe šěsć młodych Serbow z Ralbic a wokoliny za pozdźišeho dobyćerja. Foto: Werner Müller

nawěšk

SERBSKE NOWINY podpěruja:

Novi Sad – kulturna stolica Europy

nowostki LND