Kapałka 90 lět

Smochćicy. 10. meje 1927 bě biskop Christian Schreiber poswjećił kapałku tehdyšeho Smochčanskeho měšniskeho seminara. Składnostnje tohole jubileja swjeći starobiskop Joachim Reinelt jutře we wosmich w kapałce Domu biskopa Bena Božu mšu. Na nju a na snědań su zajimcy wutrobnje přeprošeni.

Rozmołwa wo rjemjesle

Pančicy-Kukow. Skupiny CDU gmejnow zarjadniskeho zwjazka Při Klóšterskej wodźe přeprošeja štwórtk, 11. meje, w 19 hodź. wobydlerjow a rjemjeslnikow-předewzaćelow na zjawne zarjadowanje do jědźernje dźěłarnjow za zbrašenych swjateho Michała w Pančicach-Kukowje. Prezident sakskeho rjemjeslniskeho zjednoćenstwa Roland Ermer porěči na temu „Rjemjesło ma złote dno – płaći to tež dźensa?“.

Na kofej do muzeja

Budyšin. Dalše zarjadowanje w rjedźe „Kofej w třoch“ wotměje so jutře, srjedu, w Budyskim Serbskim muzeju. Pod hesłom „Daj Bóh zbožo“ předstaja tam zajimcam wot 15 hodź. najwšelakoriše nabožne­ předmjety ze zběrki muzeja. Zastup­ płaći 4,50 eurow.

Serbske blido w stolicy

Na přednošk a wodźenje

Budyšin. Wo serbskich stawiznach Hodźijskeje wosady přednošuje dr. Jenš Buliš srjedu, 10. meje, w 19 hodź. w Budyskim Serbskim muzeju. Pod hesłom „Trotz Warichius und Wendenpapst“ zaběra so wón w přednošku z wuznamnymi wosobinami serbskeho žiwjenja a što je z jich skutkowanja hač do dźensnišeho zwostało. Wot 18 hodź. powjedźe kuratorka Andrea Pawlikowa po wosebitej wustajeńcy wo reformaciji. Zastup płaći pjeć eurow.

Na serbske blido

Choćebuz. Nałožowanje serbskeje rěče w hortach steji w srjedźišću serbskeho blida zajutřišim, srjedu, we 18 hodź. w Choćebuskim měšćanskim muzeju. Z Anku Gräfowej z Witaj-horta Wětošowskeje zakładneje šule, z kubłarkomaj horta Žylowskeje zakładneje šule kaž tež z dalšimi hosćimi chcedźa wo tym rěčeć, kak projekt Witaj po šulskej wučbje nałožuja. Zajimcy su wutrobnje witani.

Mejemjetanje a rańše piwko

Pančicy-Kukow. Jutře, 6. meje, dźěći a młodostni w Kukowje na klóšterskej łuce w 16 hodź. meju mjetaja. Wječor prosytej kapała SerBeat a CTP-Crew DJ Team k rejam. Njedźelu wot 11 hodź. witaja Chróšćanscy muzikanća na rańše piwko. Popołdnju zaspěwa chór Šule Ćišinskeho, a rejwanska skupina Kamenz can Dance předstaji swój program.

Zahaja mejski swjedźeń z reju

Łuh. We Łuze, njedaloko Haslowa, wotměje so jutře, sobotu, hižo 71. mejemjetanje. We 18 hodź. dźěći Njeswačanskeje pěstowarnje Němskeho čerwjeneho křiža „Maks a Moric“ swjedźeń z reju wokoło mejskeho štoma zahaja. Po mejemjetanju je dźěćaca disko a po tym su dorosćeni do reje prošeni. W něhdźe 23 hodź. chcedźa potom młodostni po starodawnym wašnju meju mjetać.

Do hudźbneje šule