Štwórta serbska debata rjad diskusijow na podiju lětsa zakónčiła

Wojerecy (SN/MG). Na podiju žurle Visavis we Wojerecach sedźa štyrjo mužojo. Dawid Statnik, předsyda Domowiny, cyle nalěwo, pódla njeho Mato Krygaŕ, předsyda serbskeho ewangelskeho towarstwa, potom Marcel Brauman, šefredaktor Serbskich Nowin a moderator debaty, a nic naposledk Hagen Domaška, aktiwist za Serbski sejm. Woni potajkim zakónča wčera nawječor lětuši rjad diskusijow pod titulom Serbska debata. Tema: „Štó zastupuje serbski lud? Přichod politiskeje participacije“.

Wuchadźejo z tutoho prašenja wuwiwaja hosćo na podiju cyle wšelakore předstawy wo tym, što móhło serbskemu ludej tyć, a što jemu skerje škodźi. Domaška rěči na spočatku debaty wo politiskej participaciji, wo towarstwach jako móžnosć wuwiwanja nowych idejow a wo tym, zo tuchwilne zastupnistwo Serbow přez Domowinu dosahace njeje. Wo „mjezoće w reprezentaciji serbskeho ludu“ wón rěči. Politiski system měł so změnić. Zo móhł Serbski Sejm tutu mjezotu wupjelnić, je za njeho jasne.