Sydom wulkopředewzaćow
Spěchować serbsku rěč a kulturu pak wobstatk lisćiny naprawow Zwjazka
Drježdźany/Budyšin (SN/at). Sydom wulkopředewzaćow wopřijima lisćina naprawow, z kotrymiž podpěruje Zwjazk strukturnu změnu po kóncu wudobywanja brunicy we łužiskim rewěrje Sakskeje. Spěchowanje serbskeje rěče a kultury je tam z podtitlom „za kulturne namrěwstwo, identifikaciju a zhromadnosć“ jako jedne kruće zapisane. Dalše su nowotwar a elektrifikacija železniskeje čary Arnsdorf–Kamjenc–Hóznja–Wojerecy–Grodk, wutwar zwjazkoweje dróhi B 178 mjez Žitawu a Niederoderwitzom, dwukolijowy wutwar a eletrifikacija železniskeje čary Berlin–Choćebuz–Běła Woda–Zhorjelc, wutworjenje wotnožki zwjazkoweho zarjada za hospodarstwo a kontrolu wuwožowanjow w Běłej Wodźe, mjezydisciplinarne slědźenišćo za kumštnu inteligencu w Zhorjelcu kaž tež jedyn slědźerski wulkocentrum z hač do 1 500 dźěłowymi městnami.
Tysacy pokutow w koronapandemiji rozesłali
Drježdźany (dpa/SN). Sakske komuny su wot měrca 2020 znajmjeńša 28 500 pokutow w zwisku z ranjenjom předpisow koronapandemije dla rozesłali. Žadanja bjezwokrjesnych městow a wokrjesow wučinjeja něhdźe 3,5 milionow eurow, kaž naprašowanje powěsćernje dpa wunjese. Najwjace ranjenjow registrowachu w krajnej stolicy Drježdźanach. Tu je porjadowy zarjad po swójskich informacijach ludźom 4 737 warnowanskich a chłostanskich wukazow ranjenja korona-postajenjow dla pósłał. Zwjetša jednaše so wo ranjenje předpisow kontaktneho wobmjezowanja dla. Nastupajo cyłkownu sumu pjenježnych žadanjow warnowanskich abo chłostanskich wukazow dla je Lipsk na wodźacym městnje. Tam wučinjeja cyłkowne žadanja 614 415 eurow, zdźěli měšćanske zarjadnistwo.
Deklaracija serbskeho ludu nastupajo swójsku indigenosć
Serbski sejm je na swojim posedźenju deklaraciju 12. junija wobzamknył. Serbske Nowiny wobsah dokumentuja:
Serbski sejm, swobodnje wuzwoleny parlament serbskeho ludu, zwěsća:
Něhdźe 1 500 lět wobsydla ze zapadosłowjanskich kmjenow zrosćeny lud našu domiznu. Tudy je naš zdawna zdźědźeny sydlenski kraj a naš žiwjenski zakład, kotryž naši prjedownicy wobdźěłachu, wobstarachu a za nas a našich potomnikow škitachu a zachowachu. Naš lud a naš sydlenski kraj bu wotwonka přez cuze mocy zdobyty. Přiwšěm smy sebi našu rěč a naše tradicije přez lětstotki zachowali. Mamy krutu wolu, swoju samostatnu identitu, kulturu a rěč wožiwić, zdźeržeć a dale wuwiwać. Chcemy to z nutřkownym samopostajowanjom kaž tež z mócnym soburozsudźowanjom zdokonjeć.
Za nas je cyle wěste, zo je serbski lud indigeny, awtochtony narod. K tomu so jasnje wuznawamy a wozjewjamy dospołne wužiwanje prawow, kotrež zwisuja z ILO-konwenciju 169, dojednanjom wo awtochtonych a w kmjenach žiwych ludach w njewotwisnych krajach, 1989, a z rezoluciju 61/295, deklaraciju Zjednoćenych narodow wo prawach indigenych ludow, 2007.
To a tamne (28.06.21)
Dale žane wujasnjenje nimaja w USA za něhdźe 140 zjawow na njebju, kaž z runje wozjewjeneje rozprawy zakitowanskeho ministerstwa wuchadźa. Tak nimaja žanych pokiwow na to, zo tči za mjez druhim wot pilotow a mariny USA wobkedźbowanymi „njeidentifikowanymi powětrowymi fenomenami“ minjeneju lětdźesatkow tajna technika Chiny, Ruskeje abo zwonkazemskich swětnišćowych nastrojow. Přiwšěm nochcedźa to zasadnje wuzamknyć.
Cyła wjes na předań je w Šotiskej. Powostanki wsy Lawers ze 17. lětstotka a něšto kraja maja 145 000 eurow wunjesć. W rozwalinach šeri pječa hišće duch wuspěšneje zaprajerki tehdyšeho časa z mjenom Lady of Lawers. Žona bě wjacore podawki wěšćiła, kaž twar ćahow a parnikow. Posledni wobydlerjo běchu wjes spočatk 20. lětstotka wopušćili.
Ludźo přeja sej uniju na čole
Berlin (dpa/SN). Dźeń a wjace Němcow přeje sej zwjazkowe knježerstwo pod nawodom CDU/CSU. To je wuslědk naprašowanja instituta Infratest dimap. Na prašenje, štó měł nowe zwjazkowe knježerstwo nawjedować, hłosowaše 38 procentow ludźi za uniju, wosom procentow wjace hač před měsacom. Za wot SPD nawjedowany kabinet wupraji so 16 proc., jedyn procent mjenje hač w meji. Koaliciju pod nawodnistwom Zelenych móhło sej 16 proc. naprašowanych předstajić, minus pjeć procentow.
Pytaja dale za zhubjenymi
Miami (dpa/SN). Po dźělnym sypnjenju dwanaćeposchodoweho bydlenskeho domu w zwjazkowym staće USA Floridźe pytaja z wotmachom za móžnymi dalšimi woporami. Pomocnicy pytaja z psami, specielnymi kamerami a poskanskimi nastrojemi, medije rozprawjeja. Dotal je hišće 99 ludźi po njezbožu w Surfside njedaloko Miami Beach zhubjenych. Znajmjeńša jedyn wobydler je žiwjenje přisadźił. Dotal su 37 ludźi z rozwalinow wuswobodźili. Twarjenje z 80tych lět bě so w nocy na štwórtk zdźěla zwjezło.
Altmaier za wolóženja
Ćežke njewjedro na juhowuchodźe Čěskeje je sej znajmjeńša tři ...
Žane wolóženja za němskich fanow
Dołhi program
Berlin (dpa/SN). Na swojim poslednim posedźenju tuchwilneje wólbneje doby měješe Zwjazkowa rada – zastupnistwo zwjazkowych krajow – dźensa nic mjenje hač 135 dypkow na dnjowym porjedźe. Mjez nimi bě 86 zakonjow zwjazkoweho sejma, telko kaž hišće nihdy w stawiznach komory krajow. Wobzamknyć chcychu mjez druhim nowy zakoń wo dodawanju tworow, klimoškitny zakoń a zakoń, kiž zaruča cyłodnjowske hladanje dźěći. Dalše temy běchu podźěl žonow we wodźacych pozicijach wulkich předewzaćow, reforma tobakoweho dawka a reforma hladanja.
Dźěl zakonjow, z kotrymiž je so Zwjazkowa rada dźensa zaběrała, bě zwjazkowy sejm hakle minjenu nóc schwalił.
Žadyn wjeršk EU z Putinom
To a tamne (25.06.21)
Ćelo na awtodróze A 4 je w nocy na štwórtk zasadźenje policije zawiniło. Zastojnicy dyrbjachu A 4 njedaloko wot-jězdki Wüstenbrand do směra na Erfurt dospołnje zawrěć. Skónčnje so poradźi, skoćo popadnyć. Wutoru bě cyłkownje wosom ćelatow ćeknyło. Za někotrymi přeco hišće pytaja. Policija prosy šoferow w regionje wo wosebitu kedźbnosć.
Nimale tři promile alkohola w kreji měještaj wodźerjej nakładneju awtow, jako jeju policija kontrolowaše. 37lětny jědźeše po awtodróze A 2, jako ze swojim Lkw-jom škitne wobhrodźenje po dołhosći něhdźe sto metrow wobškodźi. Šofera pak to njestaraše. Něšto pozdźišo jeho policija kontrolowaše a zwěsći 2,58 promilow. Dalši, 35lětny bě na A 14 do směra na Schwerin po puću, hdźež je chětro njewěsteho jězdźenja dla napadnył. Pola njeho naměrichu 2,96 promilow.
