Offenbach (dpa/SN). Słónčny, dešćikojty a ćopły: Z přerěznej temperaturu 19,0 stopnjow bě lětuši junij po informacijach Němskeje wjedroweje słužby třeći naj­ćopliši wot zapisowanja wjedra w lěće 1881. Tak leži junij wo 3,6 stopnjow nad přerězkom mjezynarodneje referencneje doby 1961–1990, kaž rěčnik wjedroweje słužby wčera po dotalnym wuhódnoćenju datow wjace hač 2 000 wjedrarnjow Němskeje zdźěli. Přirunujo z aktualnišej a ćoplišej přirunanskej dobu 1991–2020 wučinja rozdźěl přeco hišće 2,6 stopnjow. Předewšěm w druhej třećinje měsaca bě prěnja lětuša žołma horcoty za ludźi dosć napinaca. 19. junija su w Berlinje 36,6 stopnjow naměrili.

Z 95 litrami dešća na kwadratny meter ležeše junij tež nad wjelelětnym pře­rězkom 85 litrow, předewšěm wulkich zliwkow z krupami dla.

Waršawa (dpa/SN). Wonkowny minister Heiko Maas (SPD) je so dźensa na wopyt do Pólskeje podał. We Waršawje wočakowaše jeho kolega w zastojnstwje Zbigniew Rau. Jedne z ćežišćow rozmołwow je bjezdwěla wjele diskutowany němsko-ruski płunowód Nord Stream 2.

Do wopyta Maasa bě minister Rau w hóstnym přinošku za dźenik Frankfurter Allgeneine Zeitung Němsku před „imperialnymi paslemi“ ruskeho prezidenta Wladimira Putina warnował. Z dotwarom płunowoda nastanje na wuchodnej flance NATO wěstotny deficit, Rau twjerdźi. Ruska z pipelinu wotwisnosć Europy wot ruskeho płuna dale zesylni a ma tak w konfliktnym padźe składnosć, ćišć wukonjeć.

Nord Stream 2 drje njeje jenički kontrowersny dypk w němsko-pólskich poćahach. Na wopyće zwjazkoweho prezidenta Franka-Waltera Steinmeiera bě sej statny prezident Andrzej Duda twar wopomnišća za pólske wopory nacionalsocializma w Berlinje hač do lěta 2024 žadał. Nimo toho Waršawa na tym wobstawa, Polakam w Němskej status mjeńšiny spožčić.

Naprašowanje k stejišću ludźi aktualnu statnu formu nastupajo

Stuttgart/Drježdźany (dpa/SN). W Němskej starosći so wjetšina ludźi wo staw demokratije a wo agresiwnosć w zjawnosći. To je wuslědk kraje přesahowaceho naprašowanja Roberta Boschoweje załožby a organizacije More in Common, kotryž su wčera w Stuttgarće předstajili. Aktualnje starosći so 65 procentow woprašanych „často wo połoženje demokratije“ a wobkedźbuje, zo je zjawna debata w Němskej dale a bóle z hidu pjelnjena (70 procentow).

Roberta Boschowa załožba a organizacija More in Common stej w Němskej, Francoskej, Wulkej Britaniskej, Pólskej a USA poměr ludźi k demokratiji přepytowałoj. Slědźenskej institutaj YouGov a Kantar běštej so k tomu spočatk lěta 2021 wjace hač 10 000 ludźi w tychle krajach naprašowałoj.

Lubosć k zwěrjatam je pjaneho kolesowarja pječa pohnuła po seklojtej čarje jězdźić. Wón bě so šlinkam wuwinyć chcył, zo njeby je přejěł, kaž policistam rjekny. Swědk bě zastojnikow alarmował, dokelž bě kolesowar cyłu kolesowansku šćežku za sebje trjebał. Test alkohola wunjese, zo drje njeběchu šlinki jenička přičina: Pola muža naměrichu 2,5 promilow.

Kónc němskeje wubranki na europskich koparskich mišterstwach je třećinje wobydlerjow Němskeje wšojedne. To je wuslědk reprezentatiwneho naprašowanja slědźenskeho instituta YouGov mjez 1 731 ludźimi nad 18 lětami. Na prašenje za začućemi po zwrěšćenju mustwa rjekny 35 procentow „zo so wo to njerodźa“. 27 proc. poda, zo „njejsu překwapjeni“. 15 proc. je „jara přesłapjenych“, wosom procentow so „rudźi“ a jenož pjeć procentow je „rozhněwanych“.