Bad Saarow (dpa/SN). Zwjazkowy financny minister Olaf Scholz (SPD) žada sej nowy rozmach na dobro wuchodneje Němskeje. Přeco hišće ma so tójšto wuchodnych Němcow za wobydlerjow druheje klasy, rjekny Scholz wčera na wuchodoněmskim hospodarskim forumje w braniborskim Bad Saarowje. Wón skedźbni na rozdźěle nastupajo dochody, zamóženje a zdźědźenja kaž tež na pobrachowace koncernowe centrale a slědźenske institucije. „To njeje spomóžne za našu towaršnosć a za Němsku scyła.“ Dotalny natwar na wuchodźe bě přede­wšěm napodobnjenje zapada. „Štóž pak stajnje jenož nachwatuje, njemóže nihdy prěni być.“ Zaměr měł być, nowe a do přichoda sahace technologije na wuchodźe zasydlić. Tak njenastanu jenož nowe přede­wzaća, ale tež derje płaćene dźěłowe městna na dobro ludźi. Hladajo na mobilitu pokaza Scholz na twar noweje twornje awtotwarca Tesla a na zawod elektroawtow Volkswagen w Zwickauwje. Runje na polu klimoweje neutrality je tole wuchodnej Němskej hoberska strategiska šansa.

Schwerin (dpa/SN). Nutřkowny minister Mecklenburgsko-Předpomorskeje Torsten Renz (CDU) chce awtorow hidypołnych a hrožacych poselstwow w interneće z anonymity storhnyć, zo móhł jich za to pochłostać. „W interneće ranja, hroža a šćuwaja. Njemóžemy pak spisarjow zwěsćić, dokelž dadźa so na platformach z fantazijowymi mjenami registrować“, rjekny minister powěsćerni dpa. Wón připowědźi, zo chcył na jutře zahajacej so konferency nutřkownych ministrow wotpowědny namjet zapodać, kotryž Delnja Sakska hižo podpěruje. Z nim zasadźatej so wobaj krajej za winowatosć k identifikaciji w socialnych syćach. Renz lubi sej z toho tež wěsty kubłanski efekt. „W nadróžnym wobchadźe je kóždy šofer z čisłowej tafličku po puću a dyrbi z pokutu ličić, je-li přespěšnje jěł. Tež w in­terneće prawidła skerje dodźerža, hdyž přeńdźenja hnydom chłostaja“, je minis­ter Renz přeswědčeny. „Hida a šćuwanje w syći stej mjeztym njeznjesliwu měru docpěłoj. Tomu dyrbimy so ze wšěmi srědkami spřećiwjeć.“

Fachowcy liča z widźomnym wotputanjom koronapandemije

Berlin (dpa/SN). Něhdźe połojca wšitkich ludźi Němskeje nad 60 lětami je po informacijach zwjazkoweho ministra za strowotnistwo Jensa Spahna (CDU) ze šćěpjenjom pře koronawirus dospołnje škitana. Wjace hač 80 procentowe z teje skupiny je znajmjeńša prěnju sykawu dóstało, Spahn wčera zdźěli.

Podźěl jónu šćěpjenych hladajo na cyłe wobydlerstwo zwjazkoweje republiki bliži so z 48,4 procentami 50 procentam, štož wotpowěduje 40,2 milionomaj ludźi, kaž Roberta Kochowy institut informuje. Dospołny škit před wirusom matej 26,2 procentaj, potajkim 21,8 milionow ludźi. Cyłkownje su po informacijach instituta dotal 60,7 milionow dozow seruma pře­trjebali, jeničce minjeny kónc tydźenja 622 000.

Nawoda indiskeje sekty z 38 mandźelskimi a 89 dźěćimi je 76lětny zemrěł. Ziona Chana bydleše ze swójbu w domje z wjace hač sto stwami. Mjeztym je wjes, w kotrymž bydleše, turistiska atrakcija. Někotre medije rozprawjeja, zo měješe Chana hišće wjace žonow a dźěći. Prěnju žonu bě sej jako teenager wzał, poslednju jako 60lětny. Polygamija je drje tež w Indiskej zakazana, někotre kmjeny pak maja wuwzaćnu dowolnosć.

W nohajcach je policist w nocy podhladneho přesćěhał, doniž jemu kolegojo na pomoc njepřijědźechu. W swojim swobodnym času policist wobkedźbował, kak so porik na dróze wadźi. Krótko na to 20lětny muž špihele parkowacych awtow wotkopa. „Chwile sej črije wobuć policist w chwatku njeměješe“, policija piše. Jako zastojnicy 20lětneho dosahnychu, so tón mócnje wobaraše.