Na zarjadowanju před Braniborskimi wrotami w Berlinje su ...
Witaja přiměr w Gazaskim pasmje
New York (dpa/SN). Generalny sekretar UNO António Guterres wita přiměr mjez Israelom a militantnymi Palestinjanami w Gazaskim pasmje. Wšitke wobdźělene strony wón namołwja so na dojednanje dźeržeć, kaž wčera wječor w New Yorku rjekny. Nětko dźe wo spěšny nowonatwar a wo to, zahajić chutne rozmołwy, nawoda UNO wuzběhny. Zjednoćene narody chcyli Israel a Palestinjanow při tym podpěrać. Israelčenjo a Palestinjenjo běchu so po namjeće Egyptowskeje na přiměr dojednali, kotryž płaći wot dźensnišeho ranja w 2 hodź.
Prezident USA Joe Biden ma přiměr mjez Israelom a militantnymi Palestinjanami za „woprawdźitu šansu“, na Bliskim wuchodźe rozrisanje na dobro trajneho měra namakać. USA su zwólniwe palestinski awtonomijowy zarjad z humanitarnej pomocu za nowonatwar podpěrać, podšmórny Biden we Washingtonje.
Ćipki njemorić
Njesměrny wukon
Wuskutki korony tež hišće klětu
Podstupim (dpa/SN). Koronapandemija braniborsku krajnu kasu z wida knježerstwa tež klětu hišće poćežuje. „Ze skónčenjom etatoweho lěta njebudu wuskutki pandemije dawno hišće nimo“, rjekny financna ministerka Kathrin Lange (SPD) wčera w krajnym sejmje. Wona so za to zasadźowaše, zo kraj wjace kreditow bjerje hač dotal planowane, zo by wuskutki mrětwy zmištrować móhł. Braniborske knježerstwo je za to dodatny etat za dalše 515 milionow eurow předpołožiło. Dotal běchu za lětsa něhdźe 235 mio. eurow za wosebite wudawki korony dla zaplanowali. Wjetšina pjenjez je mjeztym wudata, za předewzaća, šule a pěstowarnje. Hač nowu cyłkownu sumu 750 mio. eurow hač do kónca lěta woprawdźe trjebaja, njeje z wida financneje ministerki hišće jasne. Štož zbudźe, móhli nalutowankam kraja přidać. Wona pak chcyła na wěstej stronje być, Lange rjekny. „Měć je lěpje, hač trjebać.“
Mjenowana sada je plista wšěm, kotřiž přeco hišće na pjenježnu pomoc stata čakaja, kritizowaše šef frakcije Lěwicy Sebastian Walter. Wón chcył nimo toho wědźeć, kak so nowa suma zestaja.
To a tamne (21.05.21)
Njewšědne transportne přeće je pola policije w delnjobayerskim Hauzenbergu posměwk zbudźiło. Jaty tamnišeho jastwa chcyše po swojim pušćenju z policajskim awtom domoj dowjezeny być. Wotpowědnu próstwu je wón policiji w lisće napisał. Ta wšak bě jeho tež do jastwa přiwjezła, jaty argumentuje. Nimo toho nima žane pjenjezy za domojjězbu. Policija je próstwu wotpokazała: „Darmotny tarif“ płaćeše jeničce za tamjězbu.
Hudźić w New-Yorkskej podzemskej železnicy je bórze zaso móžno. Wot 4. junija smědźa hudźbnicy z wotpowědnej dowolnosću we wagonach podzemskeje znowa wustupować, dyrbja pak sej nadal nós a hubu zakryć a wěstotny wotstawk dodźeržeć. Nimo toho jim radźa so šćěpić dać. Něhdźe 350 skupin a jednotliwcow wob lěto w podzemskej z milionami pasažěrow 7 500 króć wustupuje.
Dwójny etat schwaleny
Drježdźany (dpa/SN). Sakski krajny sejm je dźensa dwójny etat swobodneho stata za lětsa a klětu schwalił. Z něhdźe 43,18 miliardami eurow chce kraj najebać koronakrizu telko pjenjez wudać kaž hišće nihdy. Zo móhła Sakska sćěhi pandemije zmištrować, bě parlament hižo loni nowemu zadołženju hač do šěsć miliardow eurow přihłosował. Wčera je krajny sejm generalnu debatu ze zakónčacym wuradźowanjom zahajił.
Podhladny před sudnistwom
Frankfurt n. M. (dpa/SN). Před Frankfurtskim wyšim krajnym sudnistwom započa so dźensa proces přećiwo powołanskemu oficěrej Zwjazkoweje wobory. Wumjetuja 32lětnemu planowanje stat wohrožaceho chłostajomneho njeskutka z prawicarskoekstremistiskich motiwow. Statne rěčnistwo z toho wuchadźa, zo přihotowaše wón nadpad na wysokorjadnych politikarjow. Za to bě so jako syriski ćěkanc registrować dał, zo by podhlad na ćěkancow wjedł.
Za přepytowansku komisiju
Transportny helikopter NH90 Zwjazkoweje wobory ćišća tule z wulkeho ...
Maas pyta za wupućom z konflikta
Berlin (dpa/SN). Zwjazkowy wonkowny minister Heiko Maas (SPD) je dźensa na wopyće w Israelu a w palestinskich kónčinach wuslědźić spytał, što móhło mjezynarodne zjednoćenstwo statow k přiměrej w Gazaskim pasmje přinošować. Předewšěm pak dźe jemu wo signal solidarity z tymi, „kotřiž dyrbja so wodnjo a w nocy wo swoje žiwjenje strachować“, rjekny Maas minjenu nóc, prjedy hač do Tel Aviva wotleća. W tym zwisku wón přećelstwo Němskeje z Israelom hišće raz potwjerdźi runje tak kaž podpěru Němskeje na dobro Palestinjanow, na kotruž móžachu so woni „tež w ćežkich časach“ stajnje spušćeć.
Kaž Heiko Maas potwjerdźi, chcył wón při swojich rozmołwach zwěsćić, kak móhli puć wróćo k měrowym jednanjam mjez Israelčanami a Palestinjanami namakać, „byrnjež so to tuchwilu jara daloko zdalene zdawało. Zadwělowanosć a bjeznadźijnosć stej wěstotny problem. Israelčenjo a Palestinjenjo trjebaja zaso perspektiwu za měrniwy přichod.“ Hewak je přichodna eskalacija jenož prašenje časa, minister rjekny.
Lawrow a Blinken so zetkałoj
Reykjavik (dpa/SN). Wonkowny minister Ruskeje Sergej Lawrow je na swojim prěnim zetkanju z wonkownym ministrom USA Antonyjom Blinkenom zwólniwosć Moskwy potwjerdźił, poćahi z Washingtonom normalizować. Lawrow dźakowaše so Blinkenej za składnosć wosobinskeje rozmołwy, zdźěli powěsćernja Interfax. Prěnjorjadnje staj politikarjej wo tym rěčałoj, kak hodźał so rusko-ameriski poměr najebać wšitke diferency dale wuwiwać. Blinken rjekny čakacym žurnalistam: „Njeje žane potajnstwo, zo mamy diferency.“ Lawrow mjenowaše dwě hodźinje trajacu rozmołwu z Blinkenom „konstruktiwnu“.
Dotal njeje znate, hač staj Lawrow a Blinken tež móžny wjeršk ruskeho prezidenta Putina a prezidenta USA Joewa Bidena načałoj. Krjeml njeje na wotpowědny namjet Bidena dotal reagował, dokelž chcył połoženje najprjedy analyzować. Wobrěčeć chcyštaj politikarjej tež najnowšu eskalaciju konflikta mjez Israelom a Palestinjanami a połoženje w Afghanistanje po cofnjenju wojakow NATO.
