London (dpa/SN). Britiski premierminister Boris Johnson je z wukazanej nanuzowanej přestawku parlamenta wichor rozhorjenosće zbudźił. Wčera wječor su so sta ludźi spontanje před parlamentom a před sydłom knježerstwa zhromadźili, zo bychu přećiwo zawrěću parlamenta protestowali. Internetnu peticiju přećiwo dwělomnej naprawje je w běhu něšto hodźin wjace hač milion ludźi podpisało.

Tež w rjadach swójskeje konserwatiwneje strony Borisa Johnsona jewi so spjećowanje. Po informacijach medijow chcyše nawodnica šotiskich konserwatiwnych Ruth Davidson hišće dźensa wotstupić. Nastork wotstupa su pječa priwatne při­činy. Medije pak na to tukaja, zo je strona Johnsona dla hłuboko pačena. Tón bě wčera delnjej komorje nanuzowanu přestawku napołožił, zo njemóhł parlament brexitej tola hišće zadźěwać.

Z wubědźowanjom Sakskeho fondsa „Čiń sobu!“ skruća swobodny stat zhromadnosć. Wšako zmóžnja z mytowanjom projekty, kotrež bychu pobrachowacych pjenjez dla wěčnje „ležo wostali“. Nazhonjenja třoch mytowanych na wčerawšej wuměnje nastupajo lětuše wubědźowanje wobkrućeja zwólniwosć a wolu wobydlerjow, swój žiwjenski wobswět hódniši sčinić. Bjez pjenjez ničo njeńdźe. Hač stej to busowy transport šulerjow na projekt wo Ćišinskim w župje „Michał Hórnik“ abo widźomna pokazka na techniske stawi­zny swójskeje wsy Barta. Wobaj přikładaj tomu polěkujetej, runje młodej generaciji wobłuki z domizny zbližić, kotrež zdawachu so w minjenych lětach skerje zanjechane. Hesło „Čiń sobu!“ je wjace hač prosta namołwa. Z njej budźe Sakska tež klětu ideje wobydlerjow na dobro zhromadnosće spěchować, hdźež su komunam wuskeho financneho korseta dla často ruce sputanej. Mudrych myslow dźě je dosć. Axel Arlt

Budyšin (SN/at). Najpozdźišo po aprylskim nominowanskim zjězdźe sakskeje Lěwicy bě jasne, zo tale dotal narodnym mjeńšinam dosć wotewrjena strona w nowym Sakskim krajnym sejmje prěni raz po lěće 1990 žanoho serbskeho zapósłanca w swojej frakciji njezměje. Za wuprajenje, hač chcyła so frakcija w nowej wólbnej periodźe docyła ze serbskimi temami zaběrać a štó měł za to zamołwity być, je hišće přezahe. We wudaću SN z 22. awgusta načolny kandidat Lěwicy Rico Gebhardt přilubja: „... budu-li znowa předsyda frakcije Lěwicy, wuwołam serbskosć za šefowu naležnosć.“

Hišće na poslednim posedźenju Sakskeho krajneho sejma 2. julija bě Gebhardt zaćišć zbudźił, zo jeho strona serbskeho zapósłanca njetrjeba: Zo „wjelelětny zapósłanc sakskeje CDU Marko Šiman přichodnemu krajnemu sejma znowa přisłuša, to sej za Serbowki a Serbow w tymle kraju woprawdźe přeju“. To wuchadźa z protokola posedźenja. Nutřwołanje z frakcije CDU, zo je Lěwica swojeho Serba na poslednje městno krajneje lisćiny wotsunyła, njeje dokumentowane.

Njewšědne zasadźenje za wohnjowych wobornikow w Braunschweigu: Dźěd bě z wnučku „policiju“ hrał a jej z wjeselom ručne puta přičinił. Wšako tajke hišće z časa pola policije wobsedźeše. Skónčnje pak njemóžeše železne puta wočinić, dokelž njehodźeše so klučik wjace wjerćeć. Tak pytachu dźěd, wnučka a jeje mać pomoc pola wohnjoweje wobory, kotraž holcu z klěšćemi wuswobodźi. Jako dźak za swoju zmužitosć smědźeše sej wnučka jězdźidłowu halu wobhladać.

Něhdźe 22 000 ludźi wobdźěli so wčera we wuchodošpaniskim Buñolu na tradicionalnej bitwje „La Tomatina“. Kaž přeco poslednju srjedu w awgusće je něhdźe 9 000 wobydlerjow Buñola zhromadnje z hosćimi tomaty na so mjetało. Po informacijach zarjadowarja bě to 150 tonow, 5 000 kilogramow wjace hač loni. Po Guinnessowej knize rekordow je to najwjetša žiwi­dłowa bitwa swěta.