Debata wo wobchadźenju z prawicarskopopulistiskej stronu

Berlin (dpa/SN). Po wólbnych wuspěchach AfD w Braniborskej a Sakskej jewja so přiběrajcy hłosy w druhich politiskich stronach, kotrež maja za wopačny puć, wot wolerjow a sympatizantow tuteje strony so raznje wotmjezować. Městopředsyda FDP Wolfgang Kubicki rjekny, zo „njebudźe hižo dosahać, AfD wumjezować a wočornić“. Frakciska předsydka Lěwicy Sahra Wagenknecht wobžaruje wotcuzbnjenje swojeje strony wot teje woršty wolerjow a dawa Lěwicy sobuwinu na sylnym rozmachu AfD.

CDU a SPD běštej při wólbach krajneju sejmow masiwnje hłosy zhubiłoj, móžetej pak we wšelakich konstelacijach zaso ministerskeho prezidenta stajić, socialdemokraća w Braniborskej a křesćanscy demokraća w Sakskej. AfD bě so we woběmaj krajomaj z wulkim wotstawkom jako druha najsylniša móc etablěrowała. Wot toho časa debatuja, kak z prawicarskimi populistami wobchadźeć.

W tym padźe je słowo „kuzłać“ přiměrjene. Štóž z maturantow so mjenujcy bjez ćežow internetnje wo studijne městno požada, tón móže – tak znajmjeńša so zda – kuzłać. Přizjewjenske portale so požadarjej hakle krok po kroku wotwěraja. Za tych, kotřiž serbsce rěča a chcedźa so na přikład z wučerjom stać, su zadźěwki wyše. Wšako maja namakać přidatny kašćik, w kotrymž nakřižikuja, zo serbšćinu wobknježa. Derje je, zo móža maturanća přerězk matury wo 1,0 zwyšić, hdyž poprawny za numerus clausus njedosaha. Poskitk sakskeho knježerstwa, kotryž pomha sej kwalifikowany serbskorěčny dorost zdobyć. Zabyć pak njeměli na to, zo trjebamy w Serbach při wšěch mjenowanych lěpšinach dobrych fachowcow. Z mjenowanej pomocu stata stanu so na te wašnje tež młodźi ludźo wučerjo, kotřiž maja wučerjenje w kreji, tež hdyž censury wo tym njeswědča. A tež to mam za ku­zło. Na dobro wšěch! Milenka Rječcyna

Gumijowa atrapa hłowy krokodila drje přińdźe bórze do měšćanskeho muzeja badensko-württembergskeho Kirchheima unter Teck. Atrapa symbolizuje dny trajacy wopačny alarm srjedź junija. Te­hdy je město wjacore jězory we wokolinje zawrěło, po tym zo běchu ludźo twjerdźili, zo su krokodile we wodźe. Tež jako so jedyn tajki jako atrapa wukopa, ludźo dale wo nich rěčachu. Gumijowy krokodil je tuž jako „dźěl měšćanskich stawiznow“ wažny za muzej města.

Noweho sobuwobydlerja na swojim dźěłowym městnje ma wot najnowšeho britiski premierminister Boris Johnson. Na Downing Street čisło 10 w Londonje bydli wotnětka młody Jack-Russell-terrier. Johnson bě 15 tydźenjow stareho psa ze swojej přećelku Carrie Symonds ze zwěrjatownje přiwzał. Pos ma wšak so nětko z kocorom Larryjom jako dawnym wobydlerjom Downing Street 10 aranžować.

London (dpa/SN). W zwadźe wo wustupje Wulkeje Britaniskeje z EU bjez zrěčenja je so dźensa dotal njesłyšane mocyměrjenje mjez knježerstwom a parlamentom započało. Opozicija a skupina něhdźe 20 rebelow konserwatiwneje knježerstwoweje frakcije chcetej premierministra Borisa Johnsona nuzować, zo swój dotalny kurs brexita změni a dobu wustupa podlěši. Johnson to wotpokazuje a chce kraj najpozdźišo 31. oktobra z EU wjesć, z abo bjez zrěčenja.

Čłonojo strony rozsudźa

Rom (dpa/SN). Wažny termin to po puću k nowemu italskemu knježerstwu: Čłonojo populistiskeho hibanja Pjeć hwězdow mějachu dźensa hač do 18 hodź. chwile, internetnje wo móžnej koaliciji ze socialdemokratiskej stronu PD a z njestronskim premierom Giuseppu Contu na čole wothłosować. W padźe pozitiwneho wuslědka chcył Conte hižo jutře nowe knježerstwo předstajić. Koaliciske jednanja su wulkich wobsahowych rozdźělow dla wobćežne.

Wobydlerjo protestowali