Drježdźany (dpa/SN). Organizacije ze Sakskeje a wšeje Němskeje hotuja so na demonstraciju „Njedźělomne“ za wotewrjenu a swobodnu towaršnosć jutře w Drježdźanach. „Wočakujemy wjacore dźesaćtysacy protestowacych“, rjekny Felix Müller, jedyn z rěčnikow zwjazkarstwa, powěsćerni dpa. Wosebitej ćahaj, z kotrymajž přijědu wobdźělnicy z Berlina, běštej hižo srjedu wuknihowanej.
„Njedźělomne“ je zwjazkarstwo iniciatiwow, kotrež so přećiwo rasizmej a za runoprawnu towaršnosć zasadźeja. Po informacijach zarjadowarjow něhdźe 400 organizacijow namołwu k demonstraciji jutře připołdnju podpěruje, mjez nimi 200 iniciatiwow ze Sakskeje. Wobdźěleny je tež třěšny zwjazk sakskeje organizacije migrantow DSM, kotryž swojich čłonow za demonstraciju mobilizuje.
Berlin (dpa/SN). Najebać přiběracu kritiku sankcijow EU přećiwo Ruskej dla njewidźi zwjazkowy wonkowny minister Heiko Maas žaneje přičiny, chłostanske naprawy zběhnyć. Na wopyće w Moskwje wón wobkrući, zo dyrbjała so Ruska w konflikće na wuchodźe Ukrainy najprjedy raz hibać. „Dotal njeje so to stało. A dołhož tomu tak je, budźe ćežko wo sankcijach rěčeć“, rjekny politikar SPD. Kaž pak praji, je wón w rozmołwach z Moskwu zaćišć zdobył, zo je nastupajo rozrisanje konflikta na wuchodźe Ukrainy nowych impulsow. Tak zasadźa so Maas za bórzomne rozmołwy mjez Ruskej a Ukrainu z posrědkowanjom Němskeje a Francoskeje.
Na wuchodźe Ukrainy wojuja wot lěta 2014 proruscy separatisća a ukrainske knježerstwowe jednotki přećiwo sebi. Němska a Francoska hižo pjeć lět spytatej, we wobłuku tak mjenowaneho Normandijoweho formata mjez Ukrainu a Ruskej posrědkować. Po nastupje noweho prezidenta Wolodimira Zelenskeho kónc meje přiběra nadźija, zo so tčacy wostaty konflikt rozrisa. Tež Zelenskij žada sej bórzomne wjerškowe zetkanje.
Z ruku we woknje tčacy wostał je paduch w Berlinje. Do toho bě 61lětny spytał nachilene wokno na zadnim dworje bydlenskeho domu wočinić, zo móhł so do bydlenja zadobyć. Jako dale njemóžeše, wołaše wo pomoc. Wobydlerjo alarmowachu policiju, kotraž podhladneho wuswobodźi a zaja. Dokelž bě so tón snadnje zranił, dachu jeho w chorowni ambulantnje zastarać.
Při wjacorych amplach za pěškow w Berlinje-Mitte a Friedrichshainje-Kreuzbergu su njeznaći čerwjenu a zelenu swěcu z rěčnymi šablonemi polěpili. Ample pokazuja nětko swěćace so hesła kaž „Go vegan“ při zelenej a „Stop Meat“ při čerwjenej swěcy. Policija móžeše šablony wotstronić, dokelž njeběchu lěpjate. W jednym padźe pak trjebachu wohnjowo- borny rěbl. Kak běchu njeznaći nalěpki tak wysoko připrawić móhli, njewědźa.
Martin Dulig
SPD
Holger Zastrow FDPMichael Kretschmer
CDU
Jörg Urban AfDNimamy wšak serbskich kandidatow, ale na přikład direktny kandidat z wólbneho wokrjesa 55 – Budyšin 4 – Dirk Nasdala, kiž nastupi na 10. městnje našeje lisćiny, je předsyda přirady za serbske naležnosće města Wojerec a zasadźa so jako předsyda frakcije Swobodnych wolerjow w Budyskim wokrjesnym sejmiku za zajimy Serbow kaž tež za to, serbsku rěč a kulturu hajić.
Fota: z wólbneho materiala kandidatow
W Sakskej wolimy 1. septembra nowy krajny sejm. Serbski sydlenski rum wupřestrěwa so po sydom wólbnych wokrjesach. Wuchadźišćo to Domowinje, z nich sydom direktnych kandidatow na wólbny forum 14. awgusta do Budyskeho Serbskeho domu přeprosyć. Zarjadowanje je znowa hromadźe z redakciju Serbskich Nowin přewjedła. Zastupjene běchu strony CDU, AfD, Lěwica, SPD, Zwjazk 90/Zeleni, FDP a Swobodni wolerjo. Nimo jich kandidata z wólbneho wokrjesa 55 (Wojerecy, Radwor) nastupja wšitcy tamni w Budyskim wólbnym wokrjesu (wk 56). Nažel njebě žana strona kandidatku za podij přizjewiła.
Wo rěči w zjawnosći
Washington (dpa/SN). Najnowšich iritacijow Grönlandskeje dla staj wonkownaj ministraj USA a Danskeje telefonowałoj. Při tym rěčeštaj wo „sylnišej mjezsobnej kooperaciji z Danskej a Grönlandskej w Arktisy, zdźěli wonkowny minister USA Mike Pompeo po rozmołwje ze swojim kolegu Jeppu Kofodom, wobkrućejo zdobom „wuske partnerstwo“. Trump bě za spočatk septembra planowany wopyt Danskeje wotprajił, dokelž nochce jemu skandinawiski kraj Grönlandsku předać.
Johnson pola Macrona
Paris (dpa/SN). Po swojim nastupnym wopyće pola zwjazkoweje kanclerki Angele Merkel (CDU) je britiski premierminister dźensa w Francoskej za swoje postupowanje nastupajo wustup Wulkeje Britaniskeje z Europskeje unije wabił. W Parisu wočakowaše jeho francoski statny prezident Emmauel Macron. Johnson chce wobstejace zrěčenje wo brexiće změnić a znowa jednać. Merkel je wčera zwólniwosć k rozmołwam signalizowała, změny zrěčenja pak wotpokazała.
Dale wuradźowali
Drježdźany (dpa/SN). Hroženje ze zamordowanjom přećiwo kandidatce za zwjazkowe předsydstwo SPD: Sakska ministerka za integraciju Petra Köpping je do wčerawšeho čitanskeho zarjadowanja w Brandisu pola Lipska hroženje ze zamordowanjom dóstała. Hroženje bě do čitanja z knihi Köpping „Integrujće tla najprjedy raz nas“ z e-mailku we wobydlerskim běrowje ministerki dóšło.
Kaž Petra Köpping připowědźi, wona plan swojich zjawnych wustupow hroženja dla njezměni. „Njemóže być, zo je dźeń a wjace politikarjow tajkim hroženjam wustajenych.“ Po informacijach medijow je policija ministerku za čas zarjadowanja škitała. Hišće wčera dopołdnja bě Köpping na zarjadowanju we Wilsdruffje komunalnym politikarjam radźiła zjawnosć informować, su-li tajke smjertne hroženja dóstali.
Berlin (dpa/SN). Zwjazkowy minister za hospodarstwo Peter Altmaier je naćisk zakonja wo rozdźělenju wjacorych miliardow eurow na dobro wot skónčenja zmilinjenja brunicy potrjechenych kónčin předpołožił. Zo njetrjebali při druhich předewzaćach Zwjazka na dobro brunicowych kónčin lutować, planuja přidatne „zesylnjace srědki“ za jednotliwe ministerstwa, rjekny politikar CDU.
Němska chce lěta 2038 klimje škodźace zmilinjenje brunicy skónčić, wotpowědujo wobzamknjenju wuhloweje komisije. Tomu so w kónčinach, hdźež wotwisuja tysacy dźěłowych městnow wot brunicy, spjećuja. Jeli so wšitko radźi, móhli naćisk zakonja hižo 28. awgusta w zwjazkowym knježerstwje schwalić. Štyri dny pozdźišo su w potrjechenymaj Braniborskej a Sakskej wólby noweju krajneju sejmow.
W zakonju dźe mjez druhim wo to, rozdźělić 14 miliardow eurow za wosebite inwesticije w brunicowych kónčinach Braniborskeje, Sakskeje, Saksko-Anhaltskeje a Sewjerorynsko-Westfalskeje.
Podstupim (dpa/SN). Něšto dnjow do wólbow Braniborskeho krajneho sejma je so ministerski prezident Dietmar Woidke (SPD) za „wjaceschodźenkowe“ skónčenje zmilinjenja brunicy we Łužicy zasadźał, Zeleni porno tomu za spěšny kónc brunicy. „Dźesać procentow němskeho zastaranja z milinu přinošuje Łužica“, rjekny Woidke wutoru we wusyłanju telewizije RBB „Wólbna arena“, w kotrymž je šěsć načolnych kandidatow stron na prašenja přihladowarjow wotmołwjało. „Zdobom dyrbimy so krok po kroku klimje napřećo neutralniši stać.“
Načolny kandidat AfD Andreas Kalbitz wupraji so we wusyłanju za „rozumny kónc brunicy. Tež my wěmy, zo su fosilne surowizny jónu přetrjebane. Prašenje pak je, kak zmištrujemy strukturnu změnu město strukturneho łamka.“ Tohodla je do skónčenja plan přichoda trěbny a žadyn plan wotwiwanja. Ze zmilinjenjom brunicy přestać chcedźa w lěće 2038, štož ma so z miliardami eurow podpěrać.