Póstnicy w Kölnje zahajene
Köln (dpa/SN). Prěni króć po třoch lětach móža póstniske nory zaso bjez wobmjezowanjow korony dla swjećić. W Kölnje zetkachu so tuž dźensa dźesaćitysacy na žónske póstnicy. W lěće 2020 njemějachu daloko sahace naprawy, štož bě k rozšěrjenju wirusa přinošowało. W slědowacym lěće 2021 póstnicy dospołnje wupadnychu. Loni wotměchu žónske póstnicy pod 2G-plus-wuměnjenjemi. Lětsa smědźa wšitcy zaso po zwučenym wašnju swjećić.
Pytaja 1 800 nowych wučerjow
Podstupim (dpa/SN). Hladajo na pobrachowacych wučerjow chce braniborska kubłanska ministerka Britta Ernst (SPD) z nowymi naprawami wučbu na šulach zawěsćić. Na šulach w Braniborskej pytaja za přichodne šulske lěto 1 800 nowych wučerjow, ministerka wčera zdźěli. Dokelž telko wukubłanych pedagogow njenamakaja, měli tuchwilni wučerjo dlěje wuwučować. Tež dźělnje přistajeni wučerjo měli wjace hodźinow wučby podawać.
Zemja so njezměruje
Operaciski system z mjenom DaVinci budźe přichodnje w Měšćanskim ...
Žane nuzowe přebywanišća
Freiberg/Drježdźany (dpa/SN). Wokrjes Srjedźna Sakska chce swójske přebywanišća za ćěkancow zarjadować. Pozadk toho je, zo je dale a ćešo, wotpowědne kwartěry namakać. Ze swójskimi kapacitami móhł wokrjes fleksibelniši być. Z planami je wokrjes po cyłej Sakskej přikład. Tuchwilu je za wšitke wokrjesy wulke wužadanje, ćěkancow zaměstnić. Temu chcedźa dźensa tež na wosebitym wjeršku ze zwjazkowej nutřkownej ministerku Nancy Faeser (SPD) wobjednać, při čimž žadaja sej wokrjesy wjace podpěry Zwjazka.
Wšitke wokrjesy nochcedźa nuzowe přebywanišća, na přikład w sportowych halach, přihotować. „Wužadanje je, hodźace so bydlenja namakać“, wuswětli zastupowaca jednaćelka Sakskeho sejma krajnych wokrjesow Veronika Müller do zeńdźenja ze zwjazkowej ministerku.
Znowa chaos
Wólbny krimi z pokročowanjom
Berlin (SN). Wólbny krimi w Berlinje pokročuje. Hakle wčera wuličene wólbne lisćiki drje njejsu wuslědk wólbow wulce wobwliwowali. Tak dósta SPD přidatnje 88 hłosow a Zeleni 80 hłosow. Tuž je SPD samo móhła snadny předskok wot 105 na 113 hłosow wutwarić. Konsekwency pak maja wuličene hłosy listowych wólbow za wólbny wokrjes 3 w Lichtenbergu.
Direktna kandidatka Lěwicy Claudia Engelman ma nětko runje telko hłosow kaž dotal wodźacy kandidat CDU Dennis Haustein. Štó měł direktny mandat dóstać, rozsudźi po wólbnym zakonju los. Ćahnyć ma los přisłušny wólbny nawoda wobwoda. To ma so po krajnym wólbnym porjedźe we wobłuku wobwodneho wólbneho wuběrka přewjesć, kotryž so přichodnu póndźelu schadźuje. Lěwica sej mjeztym hižo žadaše, zo maja so wšitke wólbne lisćiki wobwoda hišće raz wuličić. Hakle potom měł los rozsudźić.
Dnownu wodu lěpje škitać
Tež za trajacu suchotu je wodowy management trěbny
Lipsk/Choćebuz (dpa/SN). W regionach, hdźež je suchoty dla dale a mjenje wody, dyrbi so management wody polěpšić. K tomu tež słuša, zo tam wjace datow zběraja, měni nawoda Němskeho monitora za suchotu při Helmholtzowym centrumje za wobswětowe slědźenje (UFZ) Andreas Marx. Po jeho słowach njejsu ličby za Němsku dosahace, na přikład nastupajo mnóstwa ze zemje klumpaneje dnowneje wody. „Runje w času změny klimy a wjace ekstremnych podawkow su dokładne daty wo wodowym etaće jara wažne.“ Daty dnowneje wody na měrjenskich dypkach pak hodźeli so wužiwać. Jeli so pegele zniža, dyrbjeli zarjady reagować. „Podawki suchoty maja so runje tak kaž te wulkeje wody rozjimać“, fachowc wuzběhnje.
Dale po starym?
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238
tel.: 03591 / 577 232 faks: 03591 / 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Zamołwita za rozšěrjenje: Manja Bujnowska 577 262
Předań nawěškow: Janka Rögnerowa 577 220 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
To a tamne (16.02.23)
Ratar je 1 200 kilometrow po Thailandskej nóžkował, zo by so na dnju Walentina ze žonu woženił, kotruž njeje hišće nihdy wosobinsce zetkał. 52lětny Suthep bě 56lětnu předawarku Thanapu před pjeć měsacami w interneće zeznał, jako sej rybowu pastu pola njeje skaza. Thanapa je swojeho Suthepa najprjedy skerje žortnje namołwjała, pěši k njej do daloko zdaleneje južneje prowincy Satun přińć. Suthep je wěc chutnje brał. Na dnju Walentina je wón Satun docpěł a so ze Thanapu zmandźelił.
Nurjerjo francoskeho cłownistwa su pod z Brazilskeje přijědźenej łódźu 180 kilogramow kokaina w hódnoće wjace hač 15 milionow eurow namakali. Nurjerjo běchu něšto spodźiwne při łódźi pod wodu wuhladali a to bliže přepytowali, zarjad wčera zdźěli. Kapitana łódźe su cłownicy najprjedy raz zajeli.
Zbytne lisćiki dźensa wuliča
Berlin (SN). Tři dnjow po wospjetnych wólbach w Berlinje dźensa zjawnje poslednich 466 wólbnych lisćikow wuliča. W Berlinje Lichtenbergu su lisćiki přepozdźe dóšli a njemóžachu so tuž minjenu njedźelu sobu ličić. Dźensa dopołdnja započachu lisćiki wuličić, štož móhło po słowach wólbneho nawodu wobwoda Axela Hungera cyły dźeń trać. Prawdźepodobnje pak budźe dźensa hišće mjezywuslědk wozjewjeny. Hladajo na rozdźěl 105 hłosow mjez SPD a Zelenych móhł so njedźelniši wuslědk hišće změnić.
Wuwučuja rjadownje hromadźe
Wiefelstede (SN). Přemało wučerjow dla chcyše zakładna šula w delnjosakskim Wiefelstede něhdźe 300 šulerjam jedyn wučbny dźeń šmórnyć. Wčera su wšelake medije wo tym rozprawjeli, a kultusowe ministerstwo je samsny dźeń reagowało. Tak je přepruwowanje wujewiło, zo su tola hišće kapacity, tak zo móža šulerjo wšitkich pjeć dnjow do šule přińć. Rjadownje jednoho lětnika maja so přechodnje hromadźe wuwučować.
Měnjenja młodostnych zapřijeć
