Berlin (dpa/SN). Lěkarske praksy Němskeje dóstanu přichodny tydźeń prěni króć telko šćěpiwa přećiwo koronawirusej, kaž su skazali. To rjekny šef předsydstwa zwjazka kasowych lěkarjow Andreas Gassen powěsćerni dpa. Praksy běchu z něhdźe 2,3 milionami dozow mjenje šćěpiwa skazali, hač je k dispoziciji. Nětko wuskutkuja so tež prózdniny w dźeń a wjace zwjazkowych krajach. Tójšto pacientow je na dowolu, a dale a wjac ludźi je mjeztym hižo šćěpjenych.

Merkel pola Johnsona a queen

London (dpa/SN). Zwjazkowa kanclerka Angela Merkel (CDU) poda so dźensa do Wulkeje Britaniskeje. Tam wočakowaštaj ju premierminister Boris Johnson a kralowna Elizabeth II. Planowane bě wuradźowanje z Johnsonom w jeho rezidency Chequers sewjernje Londona. Nawječor chcyše queen zwjazkowu kanclerku na hrodźe Windsor witać. Zetkanje z 95lětnej kralownu je Angeli Merkel wosebita česć, kaž jeje rěčnik zdźěli. Kanclerka chce so po tym puću z njej rozžohnować.

Žane wotprawjenja w USA

Berlin (dpa/SN). Šef kanclerskeho zarjada Helge Braun (CDU) njeliči nazymu z dalšim lockdownom koronawirusa dla. „Dołhož šćěpjenja derje skutkuja, njepřińdźe lockdown na njedobro tych, kotřiž su šćěpjeni, do prašenja“, rjekny Braun we wusyłanju MDR Aktuell. „Wjele wobłukow, kotrež běchu minjeny čas kompletnje zawrjene, dyrbja za tónle wulki dźěl wobydlerstwa wotewrjene wostać.“ Braun nimo toho připowědźi, zo nochce zwjazkowe knježerstwo přichodnje jeničce na incidencu hladać, za to bóle na ličby schorjenjow a na połoženje w chorownjach nowych na koronawirus schorjenych pacientow dla.

London (dpa/SN). Byrnjež Chorwatska na europskich koparskich mišterstwach hižo zastupjena njebyła, postara so wona z wulkim skandalom wo mjezynarodnu kedźbnosć. Tak su hrajerjo wokoło kapitana Luki Modrića wšitke štyri partije na hrudźi wopačnu chorhoj Chorwatskeje měli. Čerwjeno-běły šachowy muster započina so normalnje horjeka nalěwo z čerwjenym kašćikom. Chorwatska wubranka pak hraješe z nawopačnym mustrom, kotrež započina so z běłym kašćikom. To dopomina na režim Ustaša, kiž bě w Druhej swětowej wójnje poboku nacistiskeje Němskeje wojował a je surowe wójnske złóstnistwa předewšěm na serbiskich ciwilistach a wójnskich jatych zawinował.

Chorwatski koparski zwjazk rěčeše wo „njewotpohladnym zmylku“, na kotryž njeběchu so dohladali, a je so pola koparskich fanow zamołwił. Zwjazk chce za koparske trikoty zamołwitu firmu namołwić, interne konsekwency sćahnyć. Chorwatske mustwo bě hižo wospjet z prawicarskimi symbolemi napadnyło.

Wjace hač 30 króć nuzowe čisło wolił je sydomlětny hólc w Mnichowje a zawini tak zasadźenje policije. Pachoł bě tak mjenowanu smartwatch wužiwał – naručny časnik, z kotrymž móžeš tež telefonować. Zastojnicy podachu so na to k městnu, hdźež hólčec bydleše. Tam so wukopa, zo bě smartwatch k narodninam dóstał, zo pak njemóžeše ju hišće posłužować.

Z kašćikom piwa je wonkowny minister Heiko Maas swój dołh pola Britow zarunał. Wón bě so z britiskim kolegu w zastojnstwje Dominicom Raabom sadźił, zo Němska na koparskich EM přećiwo Jendźelskej dobudźe, čemuž wšak na kóncu tak njebě. Po poražce 0:2 we Wembleyjowym stadionje Maas kašćik piwa we wulkopósłanstwje Wulkeje Britaniskeje woteda. Tam přizna, zo je sej z Raabom w mjezynarodnych prašenjach poprawom pře­zjedny, nic pak w kopańcy.