Saksojo najlubši hosćo
Na braniborskich stanowanišćach liča z wulkim nawalom dowolnikow
Podstupim (dpa/SN). Wobhospodarjerjo stanowanišćow Braniborskeje wočakuja w lěću hoberski nawal dowolnikow a dale trajacy trend campinga.
Tójšto camperow, kotřiž bychu hewak do wukraja jěli, so lětsa z wulkeho dźěla za Němsku rozsudźeja“, rjekny wiceprezident Zwjazka campingoweho hospodarstwa Braniborskeje Jörg Klofski powěsćerni dpa. Jako bě w meji wotwidźeć, zo budźe po prěnich naprawach korony dla w lěću zaso móžno stanować, je ličba skazankow jara přiběrała. „Někotryžkuli z kolegow je tykačk wućahnył, zo by telefon prosće raz mjelčał“, Klofski potwjerdźi.
Po prěnich wotewrjenjach na Bože spěće móžeše branša stanowanišća poněčim zaso bóle wućežić. Spočatnje pak rjadowanja nastupajo sanitarny wobłuk wobchodnistwo hišće haćachu. Camperojo bjez nuznika w awće tuž scyła hakle njepřijědźechu. Wotpowědnje małe běchu wobroty.
Wutrobne zetkanje na mjezy po 83 dnjach dźělenja
Wulki Šunow/Varnsdorf (SN). Mjeztym 53 lět pěstuje dobrowólna wohnjowa wobora w sakskim Wulkim Šunowje (Großschönau) wuske přećelske styki k wobornikam w čěskim Varnsdorfje a wokolinje. Za nuzowy pad maja tam samo dojednanje wo mjezsobnej pomocy. Tak móža wobornicy mjezu překročić, njedyrbjeli-li mocy susoda hižo dosahać. Na tajke něšto njebě minjene 83 dnjow k myslenju. Koronawirusa dla wosta mjeza mjez Wulkim Šunowom a Warnoćicami zawrjena. Z betonowymi zawěrami a płotami bě dróha zaraćena. Ani přećelski wopyt njebě w tym času móžny.
To a tamne (09.06.20)
Poćehnjenje łoža je paducha we Wormsu přeradźiło. 40lětny bě so minjenu nóc do bydlenja zadobył. Jako wobydlerka to pytny, wona swojeho žiwjenskeho partnera zazwoni. Tón poda so hnydom na puć k domej a zetka muža, kiž w poćehnjenju poslešća něšto transportowaše. Dokelž bě jemu cycha znata, wón paducha narěča. Tón swoju rubiznu nablaku pušći a ćekny. Muž pak jeho dosahny a policistam přepoda.
Pilotny projekt ze 6 000 němskimi turistami chcedźa na Mallorce a druhich balearskich kupach přewjesć. Tak chcedźa pruwować, hač su nastupajo wěstotne naprawy koronawirusa dla na hoberski nawal turistow přihotowani, z kotrymž liča po wotewrjenju mjezow 1. julija. Němsku su wuzwolili, dokelž je tam poměrnje mało infekcijow z wirusom. Do karanteny turisća njetrjebaja.
Přećiwo rasizmej protestowali
Demonstracije po wšěm swěće – minister Spahn namołwja k wotstawkej
Berlin (dpa/SN). Po wšěm swěće su kónc tydźenja statysacy ludźi přećiwo rasizmej a policajskej namocy demonstrowali. Nastork bě smjerć Afroameričana Georgea Floyda w USA při brutalnej policajskej akciji kónc meje. Tež w Němskej dźěchu ludźo w mnohich městach na dróhu. Wosebje wjele bě jich w Mnichowje z něhdźe 25 000 ludźimi.
W USA dóńdźe k demonstracijam w Philadelphiji, New Yorku, Washingtonje a dalšich městach. Při tym bě wočiwidne, zo wuwiwa so Washington na centrum protestow. Hněw demonstrantow měri so wosebje přećiwo prezidentej Donaldej Trumpej, kotremuž wumjetuja, zo njeje so dotal jasnje přećiwo rasizmej wuprajił. Město toho je demonstrantam hrozył, wójsko přećiwo nim zasadźić.
Dźak zjawnym medijam
Magdeburg/Berlin (B/SN). Zastupjerjo diecezanskeje a katolskeje rady wuchodnych biskopstwow su so zjawnym medijam za live-wusyłanja Božich słužbow za čas korony dźakowali. Wotpowědne listy pósłachu intendantam, programowym direktoram a redakciskim nawodnistwam. Wujednali běchu je 25. apryla we widejokonferency „wuchodneju radow“. Tež předsyda rady katolikow Dagobert Glanz słuša k podpisarjam. Lětne zetkanje diecezanskeje a katolskeje rady słuži tomu, sej informacije wuměnjeć a zhromadne stejišća sej zdźěłać.
Nowy akcijny program
Wuradźuja wo dalšej pomocy
Meerane (dpa/SN). Sakske krajne knježerstwo je so dźensa do dwaj dnjej trajaceje klawsury podało. W Meerane wuradźuja wo dalšich akcijach pomocy w tuchwilnej koronakrizy. Nětko dźe wo to, dowěru a optimizm posrědkować a swójsku zamołwitosć ludźi sylnić, kaž ministerski prezident Michael Kretschmer (CDU) do zahajenja posedźenja zdźěli. Po informacijach medijow planuje knježerstwo pomocny paket 50 milionow eurow za kulturu a turizm.
Njewěri hroženju Trumpa
Berlin (dpa/SN). Bywši wulkopósłanc USA w Němskej John Kornblum njeliči z tym, zo prezident USA Donald Trump swoje hroženje zwoprawdźi a ameriskich wojakow z Němskeje wotćehnje. „Trump stajnje wjele připowědźa, ale njejedna“, rjekny Kornblum nowinarjam. Wón je sej wěsty, zo je Trump hněwny na zwjazkowu kanclerku Angelu Merkel (CDU), kotraž bě swoje wobdźělenje na wjerškowym zetkanju G 7 we Washingtonje koronapandemije dla wotprajiła. Donald Trump bě připowědźił, zo chcył 9 500 ameriskich wojakow z Němskeje cofnyć.
Karantena w Jendźelskej
Kretschmer: Měru wobchować
Wjace skotu na pastwje rězać
Nowa app korony dla bórze hotowa
Berlin (dpa/SN). Minister za strowotnistwo Jens Spahn je připowědźił, zo chce w běhu tydźenja warnowansku app koronawirusa dla předstajić. „Telko časa trjebamy za wuwiće, dokelž stajamy wysoke naroki“, rjekny minister Spahn w nowinje Rheinische Post. Tak dyrbja razne předpisy nastupajo škit datow a energijowu eficiencu spjelnić. „App, kotraž w běhu něšto hodźin akumulator mobilneho telefona wuprózdni, nichtó njewužiwa.“ Spahn chce tomu zadźěwać, zo mnozy aplikaciju zaso wotstronja, dokelž přewjele energije přetrjebuje.
„Hdyž přichodne tydźenje něšto milionow ludźi wo app přeswědčimy, sym hižo spokojom“, Jens Spahn wuswětla. „Wirusej zadźěwać je mustwowa hra. Kóždy, kiž sej app na swój mobilny telefon sćehnje, při tym pomha.“ Spahn připowědźa w tym zwisku wobšěrnje zapołoženu wabjensku akciju zwjazkoweho knježerstwa.
Zwjazkowe knježerstwo chce z tak mjenowanej tracing-app rjećaz infekcijow koronawirusa lěpje sćěhować. Je-li něchtó pozitiwnje na koronu testowany a registrowany, system tamnych wužiwarjow app awtomatisce warnuje.
