To a tamne (27.04.20)
Stara a jednora šijawa je so w hornjobayerskim Morsbachu wo rjany podawk postarała. Wobsedźer nastroj wjace njetrjebaše a wotstaji jón na kromu puća jako dar. Zo bě mašinu něhdy jako schow pjenjez wužiwał, je 56lětny dawno zabył. 21lětny wza šijawu sobu domoj a namaka w njej tysac eurow. Dokelž wobsedźerja njeznaješe, prošeše policiju wo pomoc, a ta 56lětneho wuslědźi, kiž bě telko sprawnosće dla hnuty.
Pjany kolesowar je so w Zhorjelcu dowěrliwje na zastojnikow Zwjazkoweje policije wobroćił. Zastojnicy běchu w nocy na njedźelu wobkedźbowali, zo 20lětny chětro chabłajo po dróze jědźe. Prjedy hač móžachu jeho zadźeržeć, muž pola nich zasta a so přećelnje wopraša: „Móžeće mje domoj dowjezć?“ Woni pak wzachu jeho sobu na policajsku stražu, hdźež je test alkohola 1,8 promilow wunjesł.
Ličby dale přiběraja
Berlin (dpa/SN). Po najnowšich informacijach Roberta Kochoweho instituta je so po cyłej Němskej mjeztym wjace hač 150 000 ludźi z koronawirusom natyknyło. To je 2 340 wjace hač wčera. Ličba na wirus zemrětych je na 5 321 rozrostła. 107 000 ludźi je chorosć přetrało. Institut z toho wuchadźa, zo je woprawdźita ličba potrjechenych wo wjele wjetša. Wosebje wjele padow korony maja w Bayerskej, Sewjerorynsko-Westfalskej a Badensko-Württembergskej.
Poslednje lětadło přilećało
Kapstadt/Berlin (dpa/SN). Dobre pjeć tydźenjow po zahajenju akcije nawróta němskich turistow z wukraja, kotřiž njemóžachu so koronapandemije dla hižo sami nawróćić, je poslednje lětadło přilećało. Wot wonkowneho ministerstwa skazana mašina je wčera wječor w južnoafriskim Kapstadće z něhdźe 300 pasažěrami wotlećała. Bě to najwobšěrniša akcije toho razu w němskich stawiznach. Němske wulkopósłanstwa po wšěm swěće staraja so hišće wo někotre jednotliwe pady. Cyłkownje 240 000 ludźi su z lětadłami wróćo do domizny přiwjezli.
Konjunkturny paket schwaleny
Naprawy hišće njezmjechčić
Berlin (dpa/SN). Zwjazk a zwjazkowe kraje chcedźa po informacijach zwjazkoweje kanclerki Angele Merkel (CDU) najzašo hakle 6. meje wo móžnych wolóženjach nastupajo koronakrizy dla wukazane wobmjezowanja zjawneho žiwjenja rozsudźić. Wuskutki póndźelu zahajeneho wotewrjenja wobchodow hodźa so hakle po 14 dnjach posudźować, rjekny Merkel wčera wječor w Berlinje. Dalše wolóženja budu pozdźišo.
Blüm njeboh
To a tamne (24.04.20)
Přetwarjene žwjenkačkowe awtomaty na dobro pčołkow so w Němskej dale rozšěrjeja. Za projekt, kotryž běchu před poł lětom w Dortmundźe z jeničkim awtomatom zahajili, je mjeztym po wšej Němskej 20 sobuwojowarjow. Přetwarjene nastroje wudawaja nopaški ze symješkami, kotrež překasancam w časach zazyglowanych płonin, pesticidow a monokulturow pomhaja přežiwić. Wuchowarjo pčołkow akcija jara zwjesela.
Małeho leoparda mylnje za kóčku měli a sobu domoj wzali su dźěći w Nepalu. Woni běchu małe rubježne zwěrjo při hrajkanju na kromje lěsa namakali. Jako pak wone naraz cyle hinak mjawčeše hač kóčka, informowaše swójba sobudźěłaćerjow weterinarneho zarjada. Tući dowjezechu małeho leoparda do stacije za namakane dźiwje zwěrjata, dokelž njeby w lěsu sam přežiwił.
Trump hrozy Iranej
Washington (dpa/SN). Prezident USA Donald Trump je swoje hroženje přećiwo Iranej wospjetował, zo da jeho patruljowe čołmy zničić, dyrbjeli-li so wone ameriskim wójnskim łódźam do puća stajić. USA njebudu sej pod jeho wjednistwom prowokacije Irana – kaž njedawno w Persiskim zaliwje – lubić dać, rjekny Trump we Washingtonje. Minjeny tydźeń je marina USA zdźěliła, zo bě so jědnaće iranskich čołmow jich wójnskim łódźam „strašnje a prowokantnje“ bližiło.
Čłowjeske prawa škitać
New York (dpa/SN). Generalny sekretar UNO António Guterres sej w boju přećiwo koronawirusej žada, čłowjeske prawa dodźeržeć. We widejowym poselstwje šwika wón „nadměrne wuskutki na wěste zhromadźenstwa“, přiběracu hidu w interneće a nadpady na skupiny, kotrež su škita wosebje potrěbni. Hladajo na nacionalizm, populizm a awtoritarny nawod móhła kriza w někotrych krajach składnosć represiwneje politiki być. „To je njeakceptabelne. Knježerstwa su za swoje naprawy zamołwite.“
Maas: Lětsa žadyn dowol
Krajny rada škita dla skeptiski
Bad Belzig (dpa/SN). Prezident sejma braniborskich wokrjesow Wolfgang Blasig (SPD) je nastupajo wužiwanje škita před koronawirusom skeptiski. „Bychmy do wěsteho wubědźowanja přišli, štó je najaktiwniši“, rjekny krajny rada wokrjesa Podstupim-Srjedźna marka powěsćerni dpa. „Běchmy so w Braniborskej na to dorozumili, zo wužiwanje tajkeho škita poručimy, zo pak nima winowatosć być.“ Nětko je Braniborska dalšu kročel šła. Wot přichodneje póndźele dyrbja ludźo we wobchodach, busach a tramwajkach škit za hubu a nós wužiwać, kaž su wčera rozsudźili. W Berlinje je tajki wot póndźele we wobchadnych srědkach winowatostny, nic pak we wobchodach.
Wužiwanje škita za hubu a nós móže ludźi tež stresować. Na to skedźbnja fachowc za rěč ćěła Dirk Eilert. „Je-li dźěl mjezwoča zakryty, njemóže rozmołwny partner wěste signale widźeć. Wosebje posměwk je wažny dźěl mjezyčłowjeskeje socialneje komunikacije.“
Planuja podpěru korony dla
Wulka koalicija dalše pomocne naprawy pandemije dla wobzamknyła
Berlin (dpa/SN). W boju přećiwo masiwnym hospodarskim sćěham koronapandemije dla je so wulka koalicija na dalše naprawy w hódnoće wjacorych miliardow eurow dojednała. Tak chcedźa mjez druhim wjace pjenjez za krótkodźěło płaćić, zo bychu předewšěm mało zasłužacym pobrachowace dochody wurunali. Runočasnje podlěša dobu, w kotrejž bjezdźěłnostny pjenjez płaća. Wot krizy potrjecheni hosćencarjo płaća přichodnje snadniši nadhódnotowy dawk.
Zaso kemši hić
To a tamne (23.04.20)
Sławny běh po schodach New-Yorkskeho Empire State Building su tónraz koronapandemije dla wotprajili. Zarjadowanje chcedźa hakle klětu zaso přewjesć, kaž organizatorojo zdźěleja. Wobdźělnikow su mjeztym informowali. Poprawom bě 43. běh toho razu 12. meje planowany. Loni bě Polak Piotr Łobodziński 1 576 schodźenkow znateho twarjenja w Manhattanje w dźesać mjeńšinach a pjeć sekundach zmištrował a tak dobył.
Koronawirus pola domjaceho skotu zwěsćili su prěni króć w USA. Dwě kóčce w zwjazkowym staće New York su pozitiwnje na wirus testowali. Skoćeći, kotrejž bydlitej na rozdźělnymaj městnomaj zwjazkoweho stata, měještej problemy při dychanju. W jednym padźe bě tež wobsedźer kóčki pozitiwny. Dotal njeje dopokazow, zo móže domjacy skót wirus přenjesć.
