Francoski lětadłonošak „Charles de Gaulle“ steji w přistawje ...
Wažna ličba korony woteběra
Unija w krizy přidobudźe
Žadaja sej jasne perspektiwy
Šansy špatne njejsu
W Africe hrozy katastrofa korony
Drježdźany (dpa/SN). Pomocna organizacija Lěkarjo bjez mjezow boji so katastrofalnych wuskutkow koronapandemije w Africe. „Ćežke pady lěkować snadneje ličby intensiwnych stacijow dla scyła móžno njeje“, rjekny za organizaciju dźěłacy epidemiologa Maximilian Gertler Drježdźanskim nowinarjam.
Samo najjednoriše škitne naprawy njejsu žiwjenskich wuměnjenjow dla w afriskich statach móžne. „Štóž dyrbi z wjacorymi wosobami w małej chaće bjez wody žiworić, tón móže so jenož jara ćežko před infekciju škitać“, Gertler rjekny. Dalši problem su ćěkancy, kotřiž nimaja scyła žane bydlenje abo bydla w stanowych lěhwach pod špatnymi hygieniskimi wobstejnosćemi.
„Lěkarjo bjez mjezow“ podpěruja tójšto afriskich statow, lěkarski personal wukubłać, izolaciske centrumy a desinfekciske stacije zarjadować kaž tež fachowe poradźowanje skićić, Gertler naliči. Kaž pobrachowace škitne srědki tež zawrjene mjezy afriskich statow organizaciju wužaduja. „Tak njesmědźa sobudźěłaćerjo přijěć, kotrychž nuznje trjebamy.“
To a tamne (17.04.20)
Wospjet zwonjenje cyrkwinskich zwonow přetorhnył je šup (Waschbär) w Löwenhagenje pola Göttingena. Zwěrjo, kotrež hižo dlěši čas na łubi ewangelskeho Božeho domu bydli, bě ručicu elektriskeho motora zwonow na druhi bok połožiło. Zamołwići wěsty čas trjebachu, zo bychu zwěsćili, zo šup trójne wšědne zwonjenje stajnje zaso přetorhnje. Šup smě dale na łubi wostać, ručicu chcedźa z groćanej konstrukciju wobdać, tak zo njemóže jón šup hižo dosahnyć.
Wjace hač 20 000 eurow namakała a hnydom wotedała je 60lětna žona w poruhrskim Mühlheimje. Žona bě w předrumnosći banki na pjenježnym awtomaće čornu tobołu namakała. W njej běchu pjenjezy we wobalkach a dwaj klučej. Sprawna namakarka tobołu w susodnym nakupowanskim centrumje woteda. Policija nětko za wobsedźerku toše pyta.
Ličby dale přiběraja
Berlin (SN). W Němskej je so hač do wčera wječora 134 753 ludźi z koronawirusom natyknyło. Kaž powěsćernja dpa rozprawja, je dotal znajmjeńša 3 804 ludźi na sćěhi wirusa zemrěło. Po trochowanju Instituta Roberta Kocha je 68 200 ludźi chorosć přetrało. Kaž Sakska zdźěli, bě tam wčera dotal 94 wosobow na wirus zemrěło, 3 955 je natyknjenych.
Telko woporow kaž nihdy
Washington (dpa/SN). W USA je wčera w běhu 24 hodźin telko ludźi zemrěło, kaž hišće nihdy do toho: Uniwersita Johnsa Hopkinsa je po wšěch Zjednoćenych statach cyłkownje 2 494 smjertnych padow koronawirusa dla registrowała. Dotal najwyšu ličbu smjertnych woporow běchu zawčerawšim, wutoru, ze 2 303 zličili. Wot spočatka epidemije je w USA wjace hač 28 300 ludźi na sćěhi infekcije z wirusom zemrěło. Najebać to je prezident Donald Trump připowědźił, zo chcył zjawne žiwjenje zaso normalizować, dokelž je wjeršk epidemije přewinjeny.
Zaso žane knježerstwo
Amnesty: Škitać zakładne prawa
Berlin (dpa/SN). Organizacija za škit čłowjeskich prawow Amnesty International warnuje před přiběracym wobmjezowanjom zakładnych prawow w Europje w zwisku z koronakrizu. Hižo loni běchu wotpowědne tendency wobkedźbowali. Wuwiće so dale pospěša, organizacija w swojej rozprawje zwěsća. „Škit zakładnych prawow je runje w krizach wosebje wažny“, rjekny šef němskeje wotnožki Markus Beeko.
Sakski politikar FDP Torsten Herbst ma wčera připowědźene podlěšenje najwažnišich wobmjezowanjow koronakrizy dla z pomocu wukazow za prawnisce problematiske. „Wo podlěšenju hłuboko sahacych zasahnjenjow do swobody wobydlerjow a indiwidualnych prawow njesmě jenož sakske krajne knježerstwo rozsudźić“, Herbst piše. Sakski krajny sejm měł wo tym debatować a rozsudźić.
