To a tamne (04.12.20)
Z awtom nana a ze 120 km/h staj 13lětnaj hólcaj w Garbsenje pola Hannovera před policiju ćěkałoj. Hólcaj běštaj wobsadce policajskeho awta napadnyłoj, dokelž skutkowaštaj „jara młodaj“. Jako chcychu zastojnicy jeju kontrolować, stupi „šofer“ na płun. Ze 120 km/h smaleše awto tež po dróhach, hdźež bě jeno 30 km/h dowolenych. Z pomocu dalšeho policajskeho jězdźidła móžachu ćěkaceju skónčnje zadźeržeć a zajeć. Wukopa so, zo słuša awto nanej młodeho šofera.
Listy do přichoda pósłać móža wobydlerjo Freiburga. Wyši měšćanosta Martin Horn jich namołwja swoje dožiwjenja w časach koronapandemije napisać, zo bychu ludźo za sto lět wo tym zhonili. Wočinić maja so listy hakle w lěće 2120, hdyž swjeći Freiburg tysactu róčnicu wobstaća. Listy z adresu wotpósłarja přijimuja w radnicy hač do 15. julija 2021.
Zakaz wobkrućeny
Bremen (dpa/SN). Za sobotu planowana wulkodemonstracija tak mjenowanych prěkimyslerjow přećiwo koronapolitice w Bremenje wostanje zakazana. Tamniše zarjadniske sudnistwo je wčera wječor zakaz měšćanskeho zarjadnistwa wobkrućiło, dokelž ma strach infekcijow za přewulki. Organizatorojo akcije mjeztym na wyšim zarjadniskim sudnistwje přećiwo zakazej skorža. Iniciatiwa prěkimyslerjow bě 20 000 wobdźělnikow přizjewiła.
Hrozy masiwna chudoba
New York (dpa/SN). Dołhodobne wuskutki koronapandemije móhli po informacijach UNO ličbu jara chudych ludźi na swěće na wjace hač miliardu powjetšić. Tajkemu wuwiću hodźi so wokomiknje hišće zadźěwać, rěka w dźensa wozjewjenym přepytowanju swětoweje organizacije. Fachowcy běchu tři wšelake scenarije naćisnyli. Hač woprawdźe k najhóršemu dóńdźe, wotwisuje wot rozsudow politikarjow. Inwestować měli woni do socialnych programow, digitalizacije a do boja přećiwo změnje klimy.
Nowe wumjetowanja Trumpa
Z tradicionalnym zaswěćenjom wjace hač 50 000 pisanych lampičkow ...
Wobmjezowanja podlěšene
Berlin (dpa/SN). Koronapandemije dla wukazane wobmjezowanja zjawneho žiwjenja ze zawrjenymi hosćencami, muzejemi, dźiwadłami a wólnočasnymi institucijemi su hač do 10. januara podlěšene. To su němska kanclerka Angela Merkel (CDU) a ministerscy prezidenća zwjazkowych krajow na swojim wčerawšim wuradźowanju wobzamknyli. „Zasadnje wostanje wšitko, kaž je. Hodowne wuwzaća maja so hišće zrjadować“, rjekny kanclerka po wuradźowanjach.
Po informacijach powěsćernje dpa běchu sej předewšěm Angela Merkel, sewjerorynsko-westfalski ministerski prezident Armin Laschet(CDU) a bayerski ministerski prezident Markus Söder (CSU) přiwótřenje naprawow žadali. Tak mjenowany dźělny lockdown płaći wot spočatka nowembra. Najebać naprawy su ličby natyknjenjow z koronawirusom dale wulke. Roberta Kochowy institut je 22 046 nowych padow registrował.
Mjeńšinu mjelčeli
Trier (dpa/SN). Dwaj dnjej po amokowej jězbje w Trieru su tam dźensa smjertne wopory njeskutka a wšěch dalšich potrjechenych wopominali. Wyši měšćanosta Wolfram Leibe bě wobydlerjow napominał, w 13.46 hodź. mjeńšinu dołho za morjenych a zranjenych mjelčeć. W měsće a po cyłym biskopstwje zwonjachu zwony cyrkwjow.
Při amokowej jězbje, kiž bě so wutoru runje w 13.46 hodź. započała, bě 51lětny muž ze swojim awtom pjeć ludźi morił – mjez nimi dźewjeć tydźenjow stare dźěćo a jeho nana – a je 18 dalšich zranił. Wón sedźi mjeztym w přepytowanskej jatbje.
Wjace prawicarjow w policiji
Frakcija Lěwicy w sakskim nutřkownym ministerstwje so naprašowała
Drježdźany (SN). W rjadach sakskeje policije je minjene lěta k wjele wjace podawkam dóšło – zastopnjowanym jako „podhladne pady nastupajo prawicarski ekstremizm“ –, hač bě dotal znate. To wuchadźa z małeho naprašowanja Kerstin Köditz, rěčnicy frakcije Lěwicy w Sakskim krajnym sejmje za antifašistisku a nutřkownu politiku. Tak zwěsćichu wot lěta 2014 dalše dwaceći wusahowacych padow, jeničce lětsa šěsć. Wobdźěleni běchu na nich 23 zastojničow a zastojnikow kaž tež po tarifje přistajeni. Pod smužku je rěč wo 37 padach.
Hoberski eksperiment
To a tamne (03.12.20)
Pjeć króć w běhu dweju hodźin su taksi před šulu w sewjerorynsko-westfalskim Bergisch-Gladbachu błyskali, jako přespěšnje w pasmje jědźeše, hdźež je jeno 30 km/h dowolenych. Mobilny błyskač bě w policajskim awće zatwarjeny. Čehodla bě šofer stajnje zaso přespěšny, je policiji hódančko. Wšako dyrbi wón nětko z pokutu cyłkownje něhdźe sto eurow ličić.
Na internetneho rumpodicha přihotuja ludźi lětsa w delnjosakskim Göttingenje. Tamniša posrědkowarnja rumpodichow na dźěłowej agenturje je mysličku zrodźiła, po tym zo su wosobinske wopyty koronapandemije dla wotprajili. Loni bě wosom rumpodichow něhdźe sto domjacnosćow wopytało. Tónraz chcedźa wosebity běrow z wotpowědnym wuhotowanjom zarjadować, hdźež móža ludźo zazwonić. Hač maja z dźěćimi kruće abo lubje rěčeć, to starši rozsudźa.
Britaniska serum dowola
London (dpa/SN). Britiski zarjad za dohladowanje lěkow je dowolił, serum němskeho předewzaća Biontech z Mainza a jeho ameriskeho partnera Pfizer přećiwo koronawirusej wužiwać. Hižo přichodny tydźeń ma srědk w kraju wužiwajomny być, zdźěli Londonske knježerstwo. „Pomoc je po puću“, piše strowotniski minister Matt Hancock w interneće. Wulka Britaniska je 40 milionow dozow skazała. Je to prěnje přizwolenje seruma BNT162b2 po cyłym swěće.
Přepytuja wobtykanje
Washington (dpa/SN). Justicne zarjady USA su přepytowanja móžneho wobtykanja w Běłym domje dla zahajili. Při tym dźe wo podhlad, zo je sej něchtó wobhnadźenje prezidenta z wjele pjenjezami kupił. Wo kotry njeskutk konkretnje dźe, njeje dotal znate. Prezident USA ma po wustawje daloko sahace prawa. Mjez druhim smě wón zasudźenych skućićelow wobhnadźić. Pječa su wjacore digitalne składy datow, kompjutery a mobilne telefony sćazali, kotrež nětko wuhódnoćeja.
Wjele woporow korony dla
