Derje trenowany duchowny je w Pólskej tomu zadźěwał, zo paduch jałmožnicu z cyrkwje w Kamionkach njedaloko Po­znanja pokradnje. Dźakowano swojim wjelelětnym nazhonjenjam jako marathonowy běhar móžeše farar pěši ćěkacemu paduchej sćěhować. Překwapjeny rubježnik jałmožnicu pušći a bjez njeje ćekny. Policija pak móžeše jeho po dokładnym wopisowanju fararja spěšnje wuslědźić. 25lětny skućićel bě prawdźepodobnje tež w druhich cyrkwjach Poznańskeho biskopstwa pobył.

Prěni a dotal jenički muzej parfima w Braniborskej wočakuje wot julija swojich hosći w Reichenbergu na sewjeru kraja. Załožił je jón muž ze Šwicarskeje, kiž bě so do Braniborskeje přesydlił. Widźeć je přehladka ze 16 000 eksponatami w bywšim kulturnym domje ratarskeho prodrustwa we wsy z 300 wobydlerjemi.

Berlin (dpa/SN). Wonkowni ministrojo čłonskich statow Europskeje unije su dźensa dwaj dnjej trajacu konferencu zahajili, zo bychu wo sankcijach přećiwo Běłoruskej a wo móžnej reakciji na konflikt mjez Turkowskej a Grjekskej zemskeho płuna dla wuradźowali. Po internych informacijach planuja sankcije přećiwo 15 do 20 wosobam w Běłoruskej, ko­třiž su za wólbne falšowanja a za namóc přećiwo demonstrantam zamołwići.

Pence nominowanje přiwzał

Washington (dpa/SN). Wiceprezident USA Mike Pence je wčera wječor nominowanje zjězda republikanow za druhu dobu zastojnstwa přiwzał. Jemu je wulka česć, Americe z tutym nadawkom słužić směć, rjekny Pence w swojej narěči na zjězdźe republikanow w Baltimore w staće Maryland. Nimo toho kritizo­waše Pence kandidata demokratow Joewa­ Bidena. Swojim wolerjam přilubi Pence prawo a sprawnosć w USA, hdyž prezidenta Donalda Trumpa znowa wola.

Zakituje zakaz demonstracije

Drježdźany (dpa/SN). Štóž w Sakskej přichodnje swoju hubu a nós w bliskowobchadźe abo wobchodach njezakrywa, ma 60 eurow pokuty zapłaćić. Wot 1. septembra płaći mjenujcy nowe škitne postajenje koronawirusa dla, kotrež ma hač do 2. nowembra wobstać. Pokutu žadać smědźa sej porjadowe zarjady, postaji zawčerawšim sakski ka­bi­net w Drježdźanach. Policija pak smě zarjadnikow sobu podpěrać. „Kriza njeje hišće ke kóncej“, apelowaše sakski minister za nutřkowne naležnosće Roland Wöller (CDU) na ludźi a pozbudźi jich, w zajimje swójskeje strowoty prawidła dodźeržeć.

Berlin (dpa/SN). Hladajo na zaso přibě­race ličby z koronawirusom natyknjenych wosobow zwjazkowe knježerstwo dalše wolóženja w tym zwisku wotpo­ka­zuje a chce předpisy samo hišće při­wó­třić. Tak chcyła zwjazkowa kanclerka Angela Merkel (CDU) přesadźić, zo sej wot kóždeho znajmjeńša 50 eurow žadaja, kiž škitny nahubnik njewužiwa. Tole wuchadźa po informacijach powěsćernje dpa z naćiska, kotryž chcyše Merkel dźensa na zetkanju z ministerskimi prezidentami zwjazkowych krajow wobzamknyć.

Předwidźane mjez druhim je, zo wostanu wulkozarjadowanja kaž ludowe swjedźenje, sportowe zarjadowanja z přihladowarjemi, wjetše koncerty, festiwale a wjesne třělcowske swjedźenje po předstawach kanclerki znajmjeńša hač do 31. decembra zakazane. Wuwzaća su w kónčinach ze snadnymi ličbami infekcijow móžne, je-li zaručene, zo přińdu wopytowarjo z tuteje kónčiny. Priwatne swjedźenje wostanu na 25 wobdźělnikow wobmjezowane. Zwonka priwatneho wobłuka smě so 50 wosobow zeńć.