Durinska ministerka za ratarstwo Birgit Keller (Lěwica) je dźensa ...
Gabriel uniju wjerška G 20 dla raznje přima
Wo boju přećiwo złóstnistwu
Italskej pomhać
Waršawa (dpa/SN). Zastupnicy čłonskich statow Europskeje unije schadźowachu so wčera na zarjadowanju agentury za škit mjezow Frontex we Waršawje. Tam su wuradźowali, hač njemóhli łódźe z wuchowanymi ćěkancami z Italskeje do druhich přistawow EU dale pósłać. Zeńdźenje wotmě so na žadanje knježerstwa w Romje. Wone sej žada, zo měła so wuchowanska misija EU „Triton“, kotruž Frontex koordinuje, na druhe kraje rozšěrić. Dotal sćelu we wobłuku Triton wšitke łódźe z ćěkancami do italskich přistawow.
Kaž Frontex po wuradźowanju zdźěli, chcedźa dźěłowu skupinu załožić, kotraž trěbne změny pruwuje a nowy plan za wuchowansku misiju zdźěła. Přezjedni sej běchu, zo měli Italsku bóle podpěrać. Móžnym změnam dyrbjeli nimo Frontex a Italskeje wšitke potrjechene kraje přihłosować. Zwjazkowe knježerstwo žadanje Italskeje dotal skeptisce wobhladuje, dokelž móhło to dalšich migrantow pohnuć so na strašnu jězbu po Srjedźnym morju nastajić.
Konflikty na Balkanje přewinyć
Towaršnosć za wohrožene ludy prosy němsku kanclerku wo pomoc
Triest (dpa/SN/MkWj). Z wušim hospodarskim zhromadnym dźěłom chcedźa politisce zamołwići tradicionalne konflikty mjez šěsć krajemi zapadneho Balkana poněčim přewinyć. To je zaměr konferency wodźacych zastupnikow Serbiskeje, Albanskeje, Bosniskeje, Makedonskeje, Montegra a Kosowa, kotruž su dźensa w sewjeroitalskim Triesće přewjedli. Wobdźěliła je so na njej tež zwjazkowa kanclerka Angela Merkel (CDU), kotraž bě tule kóždolětnu konferencu před třomi lětami do žiwjenja zwołała. Konkretnje dźe wo twar awtodróhow a płunowodow mjez krajemi kaž tež wo jednotne cłowne postajenja.
Wjace šulerjow
Transporty bóle kontrolować
Drježdźany (dpa/SN). Zeleni sej žadaja, transporty skotu w Sakskej časćišo kontrolować. Dotalne kontrole pokazuja, kak trěbne tajke naprawy su, rjekny frakciski šef Zelenych w krajnym semje Volkmar Zschocke nowinarjam. Přepruwowanja pak měli so personelnje lěpje zawěsćić a na wšu Saksku rozšěrić.
Po informacijach ministerstwa za škit přetrjebarjow běchu wot julija 2016 do meje 2017 cyłkownje 16 wotpowědnych kontrolow w nadróžnym wobchadźe přewjedli. Při tym zwěsćichu wjacore ranjenja weterinarnych předpisow. Zschocke w tym zwisku kritizuje, zo so wot ministerki Barbary Klepsch (CDU) loni připowědźene zesylnjene kontrole nimale jenož na awtodróhu A 4 we wobłuku Kamjeničanskeje policajskeje direkcije wobmjezuja. „Wot systematiskich kontrolow po wšej Sakskej je tale praksa hišće chětro zdalena. Trjebamy nuznje personalne zesylnjenje hamtskich weterinarow a wobchadneje policije“, Zschocke rozłoži. Kontrolerojo pak njetrjebachu žane transporty přetorhnyć.
To a tamne (12.07.17)
Po awtodróze do šule nóžkował je dwanaćelětny hólc w Hornjej Pfalcy. Policija dósta wčera wjacore telefonaty, po kotrychž je dźěćo ze šulskej tobołu na A 3 pola Nittendorfa po puću. Zastojnicy je na to sobu wzachu. Kaž so wukopa, bě sej hólc w šulskim busu do Regensburga wusnył. Jako wotući, wón wustróžany na přichodnej staciji wulěze. Hakle po tym pak zwěsći, zo scyła hišće w Regensburgu njeje, a so pěši na puć nastaji.
Lotowe zbožo wunuzować chcyše sej njeznaty paduch w Hornjej Frankskej. W Thiersheimskej kupnicy spakosći wón wčera tyzku ze 450 losami bayerskeje loterije a je na to wšitke zwočinjał. Z dobyćerskimi losami poda so do bliskeho Thiersteina, hdźež jemu jeničce 78 eurow wupłaćichu. Poprawom wšak lubja losy hač do 300 000 eurow. Telko zboža pakostnik njeměješe.
Rozdźěle njezamjelčeć
Berlin (B/SN). Posołka reformacije Margot Käßmann žada sej hladajo na ekumeniske přibliženje wuznaće k trajnym rozdźělam ke katolskej cyrkwi. „W konfesionelnych rozdźělach chowa so tež kreatiwna móc“, rjekny 58lětna teologowka. „Zjednoćena cyrkej by runje tak wostudła była kaž zjednoćena strona.“ Něhdyša biskopka a předsydka rady Ewangelskeje cyrkwje w Němskej mjenowaše na přikład bamžowstwo, česćowanje swj. Marije kaž tež zrozumjenje cyrkwje a eucharistije jako trajne diferency.
Křesćenjo maja so dźeń a ćešo
Dźakny koncert za policistow
Hamburg (dpa/K/SN). Tydźeń po šefach statow a knježerstwow přeprošatej nowina Hamburger Abendblatt a Połobska filharmonija tež policistow, kotřiž su wjerška G 20 dla zasadźeni byli. Sławne ćěleso wuhotuje štwórtk wosebity koncert z pianistom Sebastianom Knauerom. Wšěch 2 000 městnow wobsadźa zastojnicy z partnerom z cyłeje Němskeje a dóstanu požadane zastupjenki darmo. „Za nich koncertować je mi naležnosć wutroby“, zwurazni solist koncerta.
Tillerson pyta za rozrisnjom
Kuwait-město (dpa/K/SN). Ameriski wonkowny minister Rex Tillerson je so do Kuwaita podał, zo by pytał za rozrisanjom konflikta Katara dla. Wječor zetka so wón z kuwaitskim emirom, šajchom Ahmedom, kotrehož kraj w naležnosći posrědkuje. Naslědnje wopyta Tillerson tež Sawdi-Arabsku, Bahrain, Zjednoćene arabske emiraty a Egyptowsku. Mjenowane kraje maja na Katar rjad žadanjow a nałožuja přećiwo njemu sankcije, dokelž podpěruje pječa teroristow.
Zakoń wobkrućeny
